«قازاقستان، وزبەكستان جانە رەسەي گاز بويىنشا كەلىسسوزدەردى جەدەلدەتۋگە كەلىستى»، - دەپ ءمالىم ەتتى وزبەكستاننىڭ ەنەرگەتيكا مينيسترلىگى.

«9 اقپاندا سانكت-پەتەربۋرگتە وزبەكستان رەسپۋبليكاسىنىڭ ەنەرگەتيكا ءمينيسترى جورابەك مىرزاماحمۋدوۆ، «گازپروم» ااق باسقارما توراعاسى ا.ميللەر جانە قر ەنەرگەتيكا ءمينيسترى بولات اقشولاقوۆ ۇشجاقتى كەزدەسۋ وتكىزدى»، – دەلىنگەن حابارلامادا.

مەملەكەتتەر قازاقستان اۋماعى ارقىلى وزبەكستانعا رەسەيلىك تابيعي گازدى جەتكىزۋ ماسەلەلەرىن، اتاپ ايتقاندا، ۇشجاقتى جۇمىس توبى جۇرگىزگەن الدىن الا تەحنيكالىق بايقاۋدىڭ ناتيجەلەرىن، جەتكىزۋدىڭ قولدا بار مۇمكىندىكتەرىن، سونداي-اق اعىمداعى جىلدىڭ قاڭتارىندا قول قويىلعان «جول كارتاسىن» ىسكە اسىرۋدى تالقىلادى.

ۆەدومستۆو وسى كەزدەسۋدىڭ قورىتىندىسى بويىنشا ۇشجاقتى زەرتتەۋلەردىڭ كەلەسى كەزەڭىن جەدەلدەتۋ، سونداي-اق، ۇشجاقتى كەزدەسۋدى قىسقا مەرزىمدە قايتا ۇيىمداستىرۋ تۋرالى ۋاعدالاستىققا قول جەتكىزىلگەنىن اتاپ ءوتتى.

رەسەي ءسىم باسشىسىنىڭ ورىنباسارى ميحايل گالۋزين وتكەن جىلدىڭ 26 جەلتوقسانىندا تاسس-قا بەرگەن سۇحباتىندا «ۇشتىك گاز وداعىن قۇرۋعا ايتارلىقتاي كەدەرگىلەر جوعىن ءارى رەسەيدىڭ سەرىكتەستەرى وسى باعىتتاعى ءىس-ارەكەتكە دايىن وتىرعانىن» جەتكىزگەن.

«ۇشتىك گاز وداعىن» قۇرۋ يدەياسى رەسەيمەن قاتار، ءبىزدىڭ ارىپتەستەرىمىز: قازاقستان مەن وزبەكستاننىڭ دا قىزىعۋشىلىق تۋدىرادى. وسى سالاداعى ءوزارا ءىس-قيمىل ەنەرگەتيكالىق قاجەتتىلىكتى، حالىقتىڭ الەۋمەتتىك-ەكونوميكالىق تۇراقتىلىعى مەن ءال-اۋقاتىن قامتاماسىز ەتۋ ءۇشىن قاجەت.

وزبەكستان رەسپۋبليكاسىنىڭ جوباعا قاتىسۋ، قاتىسپاۋىنا كەلەر بولساق، پرەزيدەنت پۋتين 9 جەلتوقساندا بىشكەكتە وتكەن ەاەو ءسامميتى اياقتالعاننان كەيىن، ءباسپاسوز ءماسليحاتى بارىسىندا ىقتيمال ەنەرگەتيكالىق اليانس قۇرۋ بويىنشا جۇمىس باستالعانىن اتاپ ءوتتى. رەسەي سەرىكتەستەرى وسى باعىتتاعى بىرلەسكەن ءىس-قيمىلدارعا دايىن. يدەيانى جۇزەگە اسىرۋ ءۇشىن ەشقانداي ماڭىزدى كەدەرگىلەر جوق، بىراق، ەڭ الدىمەن، ۇلكەن جۇيەلى جۇمىس اتقارىلۋى كەرەك. اسىرەسە ساراپتامالىق دەڭگەيدە. قازىر ونى ءۇش ەلدىڭ قۇزىرەتتى مينيسترلىكتەرى جۇرگىزىپ جاتىر»، - دەپ ايتقان.

بىراق قازاقستان «ۇشتىك گاز وداعىن» قۇرۋ بويىنشا ەشقانداي رەسمي ۇسىنىس كەلىپ تۇسپەگەنىن ايتتى.

ال، «گازەتا.uz» باسىلىمى رەسەي «ۇشتىك گاز وداعىن قۇرۋ» دەگەن جەلەۋمەن قازاقستان مەن وزبەكستاننىڭ گاز تاسىمالداۋ جۇيەسىن يەمدەنىپ العىسى كەلەدى. اسىرەسە «ورتالىق ازيا – ورتالىق» گاز قۇبىرى ارقىلى قىتايعا گاز تاسىمالداۋ قۇقىعىن الۋدى كوزدەپ وتىر»، - دەپ جازدى.

ايجان تەمىرحان

Abai.kz