وتكەن دۇيسەنبىنىڭ باستى جاڭالىعى امەريكا پرەزيدەنتى بايدەننىڭ اۋە شابۋىلى دابىلىن ەلەمەي, كيەۆتە ەركىن ءجۇرۋى بولدى. اق ءۇي باسشىسىنىڭ ۇشاعى تىنىق مۇحيتتى كوكتەي ءوتىپ، پولشاعا قونىپ، ودان 10 ساعات پويىزعا وتىرىپ، ۋكراينا استاناسىنا جەتكەن. جاسى سەكسەندەگى ادام ءۇشىن تىعىز ۋاعىت كەستەسىنىڭ جۇيكەگە سالماق سالارى انىق. وعان كرەملءدىڭ يادرولىق قارۋ قۇقايىن قوسىڭىز.

پرەزيدەنت بايدەن مىرزا زەلەنسكيمەن كەزدەسكەندە: «بۇدان ءبىر جىل بۇرىن، سىرت كوز ورىس اسكەرى تەز ارادا ۋكراينا استاناسىن باسىپ الادى دەپ ويلاپ ەدى. ارادا ءبىر جىل ءوتتى، كيەۆ بۇرىنعىداي ەڭسە كوتەرىپ تۇر. ۋكراينا اسقاق تۇر. دەموكراتيا دا نىق تۇر. امەريكالىقتار سىزدەرمەن بىرگە، الەم جۇرتى دا سىزدەرمەن بىرگە»، - دەدى.

پۋتينگە قاراتا: «ول ءبىزدى بىرىگە المايدى، ۇزاققا شابامىن دەپ ويلادى. قازىر ميىندا نە بەر ەكەنىن ءبىر قۇداي بىلەدى. سەبەبى ول وڭباي قاتەلەستى»، - دەدى. كيەۆكە قۇرى كەلمەي 700 تانك باستاتقان قۇنى 500 ميلليون دوللاردىق جاڭا اسكەري كومەگىنىڭ ءتىزىمىن جاريالادى. زەلەنسكي اق ءۇي باسشىسىمەن الىس ارالىققا جەتەتىن قارۋ جايىندا تالقىلاعانىن جەتكىزدى.

اق ءۇيدىڭ ءباسپاسوز حاتشىسى بايدەننىڭ ۋكرايناعا باراتىنىن رەسەي تاراپقا بىرەر ساعات بۇرىن ەسكەرتكەنىن مالىمدەدى. ونىڭ ەكى يادرولىق دەرجاۆا اراسىندا ىقتيمال قاقتىعىستىڭ تۋىنداۋىنىڭ الدىن الۋ ماقساتىندا جاسالعان قادام ەكەنىن ايتتى.

وسىلايشا دەموكراتيالى الەم جەتەكشىسى رەسەي اسكەرىنىڭ ۋكرايناعا باسىپ كىرگەنىنىڭ ءبىر جىلدىعى قارساڭىندا ءوزىنىڭ قاتاڭ پوزتسياسىن كرەملگە اشىق كورسەتىپ قايتتى. ونىڭ الدىندا «ميۋنحەن قاۋىپسىزدىك جيىنىندا» اقش-تىڭ ورىنباسار پەرەزيدەنتى: «پۋتين ادامزاتقا قارسى قىلمىس جاسادى»،- دەپ ايىپتاسا، امەريكا مەملەكەت ىستەر حاتشىسى قىتايلىق ارىپتەسىنىڭ كوزىنە تىكە قاراپ: «رەسەيگە قارۋ بەرسەڭدەر، ارتى جامان بولادى»،- دەپ قاتاڭ ەسكەرتكەن ەدى.

ءپۋتيننىڭ دە ۋكراينا سوعىسىنىڭ ءبىر جىلدىعىنا وراي قىتاي باسشىسىنا ساۋىن ايتىپ، حالىققا جولداۋ ارناۋعا قامدانىپ جاتقانى بەلگىلى. اق ءۇي باسشىسى ونىڭ الدىن وراپ كەتتى. ماسكەۋگە قىتايدىڭ سىرتقى ىستەر وكىلى كەلدى. زەلەنسكي قىتاي تاراپقا رەسەيگە قارۋ بەرسە ءۇشىنشى دۇنيەجۇزىلىك سوعىس باستالاتىنىن ەسكەرتتى.

پۋتينگە ەندى ۋكراينامەن عانا ەمەس، كۇللى باتىسپەن سوعىسىپ جاتقانىن جەڭىلىستىڭ باستى سەبەبى ەتىپ، اقتالۋدان باسقا جول قالمادى.

Abai.kz