وسىعان دەيىن باق-تا باحمۋت قورعانىسىنا قاتىستى بىرقاتار ماڭىزدى اقپارات جاريالاندى. ءبىر كەزدەرى تىرشىلىگى قىز-قىز قايناپ جاتقان، 70 مىڭنان اسا ادامى بولعان شاعىن قالاشىقتىڭ قازىرگى كۇيىن سوزبەن سيپاتتاۋ مۇمكىن ەمەس. تۇتاس قالا ءۇيىندى-قيراندىعا اينالعان. سوعان قاراماستان، ءۇي-جايلارىن تاستاپ كەتپەگەن بەيبىت حالىق بار، باحمۋتتا. ولاردىڭ سانى 5 مىڭعا جۋىقتايدى.

رەسەيدىڭ قاندىقول قاساپشىلاردان قۇرالعان «ۆاگنەر» جەكە جاساعىنىڭ باسشىسى، تەرەڭ قالتالى وليگارح ەۆگەني پريگوجين وسىنىڭ الدىندا پرەزيدەنت زەلەنسكيگە ۇندەۋ جاساپ، باحمۋتتى تولىق قورشاۋعا شاق قالعانىن ايتقان. «اسكەرىڭىزدى امان ساقتاعىڭىز كەلسە، باحمۋتتان الىپ كەتىڭىز»، - دەگەن.

ال ۋكراينا اسكەري باسشىلىعى باحمۋتتاعى جاعدايدىڭ كۇردەلى ەكەنىن ايتىپ، باسىمدىق بىردە جاۋ جاعىندا بولسا، بىردە ۋكراينا اسكەرى جاعىندا ەكەنىن مالىمدەگەن.

باق-تا، باتىس اسكەري سارپاشىلارىنىڭ ۋكرايناعا كەڭەس بەرىپ، اسكەردى ساقتاۋ ءۇشىن باحمۋتتان شەگىنۋ كەرەكتىگىن ايتقانى جازىلدى. وسىدان سوڭ، ۋكراينا باحمۋتتان شەگىنە مە دەگەن سۇراق قوعام تالقىسىنا ءتۇستى.

كەشە ۋكراينا پرەزيدەنتى ۆلاديمير زەلەنسكي اسكەري باسشىلىقتىڭ جيىنىن وتكىزىپ، باحمۋت ماسەلەسىن تالقىلادى.

زەلەنسكي:

«مەن اسكەري باسشىلىقتىڭ شۇعىل جيىنىن وتكىزدىم. باحمۋتتىڭ ماسەلەسىن تالقىلادىق. گەنەرال سىرسكيدەن دە، باس قولباسشى زالۋجنىيدان دا باحمۋت قورعانىسى جايلى سۇرادىم. «باحمۋتتان شەگىنەمىز بە، الدە قورعانىستى جالعاستىرامىز با»، - دەپ تالقىلادىق. ەكەۋى دە باحمۋتتى قورعاۋىمىز كەرەكتىگىن ايتتى. «شەگىنبەيمىز، قورعانىستى كۇشەيتۋ كەرەك»، - دەدى ەكى گەنەرال دا. بۇل پوزيتسيا ءبىراۋىزدان ماقۇلداندى. ءبىز باحمۋتتى بەرمەيمىز. قورعانىستى كۇشەيتەمىز. شەگىنبەيمىز. مەن وسى باعىتتا جۇمىستى كۇشەيتۋگە تاپسىرما بەردىم»، - دەدى.

ءسويتىپ، ۋكراينا باحمۋتتان شەگىنبەيتىن بولدى. ايتا كەتەيىك، باحمۋت ۋكراينانىڭ دونەتسك وبلىسىنداعى شاعىن قالاشىق. سوعىسقا دەيىن مۇندا 71 مىڭنان اسا ادام ءومىر سۇرگەن. «الەمنىڭ ەكىنشى اسكەرى»، - دەپ اسپەتتەلىپ كەلگەن رەسەي ارمياسى باحمۋتتى بىلتىرعى جىلدىڭ مامىر ايىنان بەرى شابۋىلداپ، باعىندىرا الماي كەلەدى.

Abai.kz