وتكەن جىلى «وزبەكستان كونستيتۋتسياسى وزگەرەدى» دەگەن ساتتە ۇلكەن شۋ شىقتى. سەبەبى «قاراقالپاقستاننىڭ ستاتۋسىنا قاتىستى وزگەرىس ەنگىزىلەدى» دەگەن ماسەلە ايتىلدى. ارتى ايعاي-شۋ، قاقتىعىسقا ۇلاستى. كوپشىلىك وزبەكستان كونستيتۋتسياسىنا قاتىستى تەك سول وزگەرىس اياسىندا تالقى جاساپ، پرەزيدەنتتىك مەرزىمدى جاڭارتۋ بويىنشا ماسەلەنى كوپ ايتپادى. كولەڭكەدە قالدى.

ەندى مىنە، بۇگىن وزبەكستان سەناتىنىڭ ۆيتسە-سپيكەرى سادىق سافوەۆ: «كونستيتۋتسياعا وزگەرىس ەنگىزۋ وزبەكستان پرەزيدەنتىنىڭ قازىرگى مەرزىمىن ەسەپتەمەي (وبنۋلەنيە), قايتا سايلاۋعا تۇسۋگە مۇمكىندىك بەرەدى»، - دەدى.

وزبەكستان پرەزيدەنتى سوڭعى جىلدارى بىرقاتار ساياسي جانە ەكونوميكالىق رەفورما جاساعان ەدى، بىراق ءوزىنىڭ تاعىنا كەلگەندە «پۋتيندىك جولدى» تاڭداعان سياقتى. پۋتين دە 2020 جىلعى كونستيتۋتسيالىق رەفورمادان كەيىن ءوزىنىڭ مەرزىمىن جويىپ، قايتا سايلاۋعا ءتۇسۋ قۇقىعىن بەكىتىپ العان ەدى.

ورتالىق ازياداعى بەس ەلدى الىپ قاراساق، بيلىك اۋىسۋدىڭ ەڭ قيىن فورماسى تۇركىمەنستاندا سياقتى. اكەدەن بالاعا تاق قالدى.

ەكىنشىسى ول تاجىكستان. تاجىكستاندا ءالى باسشى اۋىسپادى، سول راحمون 1994 جىلدان بەرى وتىر. كەي ساراپشىلار راحمون ءوز ۇلىن تاققا دايىنداۋدا دەيدى، قازىر ونىڭ ۇلى دۋشانبەنىڭ مەرى.

وتكەن جىلى قازاقستاندا پرەزيدەنتتىك مەرزىم ءبىر مارتەدەن ارتىق وتىرۋعا مۇمكىندىك بەرمەيتىندەي ەتىپ، مەرزىم ۇزاقتىعى 7 جىل بولىپ بەكىتىلدى. كونستيتۋتسياعا «ءبىر مەرزىمنەن ارتىق وتىرۋعا بولمايدى» دەپ بەكىتىپ تاستاعانى دا قۇپتارلىق ءىس بولدى-اۋ.

ورتالىق ازيا بويىنشا ەڭ كوپ پرەزيدەنت اۋىسقان قىرعىزستان ەلى (توڭكەرىس جانە ىشكى تولقۋ) بولسا، ەندى مىنە وزبەكستان كونستيتۋتسياعا وزگەرىس ەنگىزىپ، ميرزيەەۆكە مۇمكىندىك اشپاق. كەزىندە كاريموۆ تا سولاي ەتكەن ەدى.

ميرزيەەۆتىڭ مەرزىمى 2026 جىلى ءبىتۋى ءتيىس. ەندى ونىڭ پرەزيدەنتتىك مەرزىمى وزگەرگەن كونستيتۋتسيا بويىنشا جاڭارسا (وبنۋلەنيە), وندا ول تاعى ەكى مەرزىم وتىرۋ مۇمكىندىگىنە يە بولادى. ياعني 2036 جىلعا دەيىن وتىرۋى ىقتيمال...

Abai.kz