پرەزيدەنتتىڭ تاپسىرماسى بويىنشا جەتىسۋ وبلىسىندا بالقاش جانە الاكول كولدەرىنىڭ جاعالاۋ ايماعىن كۇتىپ ۇستاۋ قىزمەتىمەن اينالىساتىن كوممۋنالدىق كاسىپورىندار قۇرىلۋدا. بۇل تۋرالى وبلىس اكىمى بەيبىت يساباەۆ تۋريستىك الەۋەتى ۇلكەن پانفيلوۆ اۋدانى تۇرعىندارىمەن كەزدەسۋى كەزىندە ايتتى، - دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.

- پانفيلوۆ اۋدانى – تۋريستىك الەۋەتى جوعارى وڭىرلەردىڭ ءبىرى.  اۋداندا 28 تۋريستىك نىسان جۇمىس ىستەيدى، وندا بيىلعى جىلدىڭ 1-جارتىسىندا 18 مىڭ كەلۋشىگە قىزمەت كورسەتىلىپ, وتكەن جىلدىڭ سايكەس كەزەڭىمەن سالىستىرعاندا كورسەتكىش 4,7%-عا ارتتى. بۇل ىشكى جانە شەتەلدىك تۋريستەردىڭ ايماققا دەگەن قىزىعۋشىلىعىنىڭ ارتۋىن كورسەتەدى. اۋداندا «جاركەنت مەشىتى»، اۋليەاعاش، سونداي-اق كەرىماعاش پەن «جاركەنت-اراسان» شيپاجايلارى سياقتى ءتۋريزمدى دامىتۋعا قولايلى جەرلەر بولعاندىقتان، تۋريستەر لەگىن كوبەيتۋگە بولادى. وسى ورايدا ءتۋريزمدى ودان ءارى قارقىندى دامىتۋ ماقساتىندا وبلىستا تۋريزم باسقارماسى قۇرىلدى، وعان قوسا 5 اۋداندا تۋريزم ءبولىمى اشىلدى. سونىڭ ءبىرى – سىزدەردىڭ اۋداندا. ءبولىم كەلەسى جىلدان باستاپ تولىققاندى جۇمىس ىستەيتىن بولادى، - دەگەن ءوڭىر باسشىسى الماتى وڭىرىنەن دەمالۋشىلارعا «الماتى-قورعاس» اۆتوجولىمەن كەلۋگە قولايلى جاعداي جاسالعانىن، بيىل «سارىوزەك-كوكتال» وبلىستىق ماڭىزى بار اۆتوجولى جوندەلىپ، تالدىقورعان جاقتان كەلەتىن تۋريستەر ءۇشىن دە جول جاعدايى جاقسارعانىن اتاپ ءوتتى.

جاڭادان قۇرىلعان «بالقاش تازالىق» جانە «الاكول تازالىق» كاسىپورىندارى بالقاش جانە الاكول جاعالاۋلارىن تازالاۋ، قاتتى تۇرمىستىق قالدىقتاردى شىعارۋ، قوعامدىق سانيتارلىق توراپتاردى كۇتىپ ۇستاۋ، كوشە جارىقتاندىرۋ جۇيەسىنە قىزمەت كورسەتۋ، تروتۋارلار مەن جول بولىكتەرىن تازالاۋ، اۋماقتاردى كوگالداندىرۋ سياقتى بىرقاتار ناقتى مىندەتتەردى اتقارادى. «الاكول تازالىق» كوممۋنالدىق مەكەمەسىنە 40-تان استام، «بالقاش تازالىققا» 20-دان استام شتات بەرىلەدى. ال ماۋسىمدىق كەزەڭدە قوسىمشا جۇمىسشىلار تارتىلادى. مەكەمەلەردىڭ ارقايسىسىنا 20-دان استام ارنايى تەحنيكا ساتىپ الۋ جوسپارلانىپ وتىر. بۇل تىزىمدە بۋلدوزەر، ەكسكاۆاتور، اۆتوگرەيدەر، تريتسيكل، قوقىس تاسىعىش، اۆتوگيدروكوتەرگىش، جۇك كولىكتەرى، قايىق، اۆتوكران ت.ب. ارنايى تەحنيكالار بار. مۇنداي كوممۋنالدىق مەكەمەلەردىڭ جۇمىسى كول جاعالاۋلارىنىڭ سانيتارلىق جاعدايىنا وڭ ىقپال ەتەتىن بولادى.

جالپى، جەتىسۋ وبلىسىندا بالقاش جانە الاكول كولدەرى جاعالاۋىنىڭ ينفراقۇرىلىمىن دامىتۋ جۇمىستارى جالعاسۋدا.

اتاپ ايتقاندا، ءۇشارال اۋەجايىنىڭ ۇشۋ-قونۋ جولاعى جاڭارتىلدى. «تالدىقورعان - ءۇشارال»، «ءۇشارال - دوستىق» اۆتوكولىك جولدارىن جاڭعىرتۋ جۇمىستارى اياقتالدى. اقشي اۋىلىندا كارىز جۇيەسىنىڭ قۇرىلىسى ءبىتىپ، كارىز تازالاۋ نىسانى سالىنا باستادى. بەسكولدەن اقشيگە دەيىن ۇزىندىعى 56 شاقىرىمنان استام 110 كۆت ەلەكتر جەلىسى تارتىلىپ، قوسالقى ستانتسيالار سالىندى. جاعالاۋدى بەكىتۋ جۇمىستارى جالعاسۋدا.

سول سياقتى بالقاش جاۋعالاۋىندا بەي-بەرەكەت قۇرىلىسقا جول بەرمەۋ ماقساتىندا بالقاش جاعالاۋى ايماعىنىڭ ەگجەي-تەگجەيلى جوسپارى ازىرلەنگەن. بۇعان دەيىن لەپسى اۋىلىنان بالقاش جاعالاۋىنا دەيىنگى جول جاسالىپ بىتكەن بولاتىن. ال بيىلعى جازعى ماۋسىمدا «الماتى – وسكەمەن – لەپسى - اقتوعاي» اۆتوكولىك جولى كولىك قاتىناسى ءۇشىن اشىلىپ، قازىر اباتتاندىرۋ جۇمىستارى جۇرگىزىلىپ جاتىر. سونىمەن قاتار بالقاش جاعالاۋىندا ينجەنەرلىك-كوممۋنيكاتسيالىق جەلىلەر تارتىلۋدا. اتاپ ايتقاندا 9,3 كم جاعالاۋ جولى، 32 كم سۋ جەلىسى، 17 كم كارىز جەلىسى، 36 كم ەلەكتر جەلىسى سالىنادى.

Abai.kz