كۇنى كەشە بەلگىلى بولعانداي، قر ءماجىلىسى سايلاۋىندا وسك اقپاراتى بويىنشا جەڭىسكە جەتكەن بەلگىلى جۋرناليست، قوعام قايراتكەرى ەرمۇرات باپي وزگە تاۋەلسىز دەپۋتاتتارعا ۇندەۋ جاساپتى.

ەرمۇرات باپي ءوزىن-ءوزى ۇسىنۋ ارقىلى ماجىلىسكە وتكەن وزگە ارىپتەستەرىنە كۇش بىرىكتىرىپ، «حالىق بلوگى» فراكتسياسىن قۇرۋدى ۇسىنعان.

«سونىمەن، پارلامەنتتىك سايلاۋدىڭ رەسمي قورىتىندىسى شىقتى: الماتىنىڭ الاتاۋ جانە اۋەزوۆ اۋدانىنان مەنىڭ ۇمىتكەرلىگىم ءۇشىن 24 مىڭعا جۋىق سايلاۋشى داۋىس بەرىپتى.

ەڭ الدىمەن، ۇلبىرەگەن ءۇمىتىن ماعان امانات ەتكەن سايلاۋشىلارىما العىس ايتامىن! جۇرەگىمە ءتۇيىپ بەرگەن، ءبىر باسىما ءۇيىپ بەرگەن اماناتتىق پارىزدى وتەۋگە ءولارمان بولا الماسام - ماعان سىن!

ارينە، مەن بۇعان دەيىن 25 جىلدىق «دات»-پەن بىرگە حالىقتىق مۇددە جولىندا قانشالىقتى قىزمەت قىلسام، ەندىگى جەردە سول جولىمنان اينىماسىم انىق. بىزدە ۇلتتىق ۇستانىم مەن قازاقى مۇڭ-زاردان باسقا جول جوق.

ەندىگى جەردەگى ماقساتىم - پارلامەنتتىڭ قاق ورتاسىندا وپپوزيتسيالىق وردا قۇرۋ. مۇنداي «وعاش» ويلى ازاماتتار اليانسى بۇگىنگى «جاڭا قازاقستان» قۇرامىز دەگەن بيلىكتىڭ ىقىلاسىنا دا سايكەس كەلۋى ءتيىس دەپ ويلايمىن.

وسى مۇرات جولىندا، بۇعان دەيىن بىرەر سۇحباتىمدا ايتقانىمداي، جاڭادان سايلانعان دەپۋتاتتارعا «حالىق بلوگى» پارلامەنتتىك فراكتسياسىن قۇرۋدى ۇسىنامىن. جاڭا جاعدايدا جاڭا فورماتتا جۇمىس ىستەپ، پارلامەنتكە تىڭ پارمەن بەرەيىك. ناتيجەسىن الداعى ۋاقىت پەن ءبىزدىڭ ەل ءۇشىن ەتەر ەڭبەگىمىز كورسەتەر.

امان بولايىق، اعايىن!  ناۋرىز قۇتتى بولسىن!»، - دەيدى ەرمۇرات باپي.

Abai.kz