كۇنى كەشە الەۋمەتتىك جەلىدە «قازاقستاننىڭ مەملەكەتتىگى جوق» دەگەن جازبا قالدىرعان قازاقستاندىق تاەكۆونديست گلەب لىمار ارتىنان ءوز سوزىنە تۇسىنىك بەردى. وعان سەنسەك اككاۋنتى الدە كىمدەر جاعىنان بۇزىلعاندىقتان، بۇعاتتالعان. جوعارىداعى پىكىر «مەنىڭ ازامات ءارى سپورتشى رەتىندەگى بەدەلىمە قاتتى نۇقسان كەلتىردى»، - دەپتى ول ۇندەۋىندە.

قازاق تاريحىنا قاتىستى مۇنداي ۇشقارى پىكىردىڭ ءبىرىنشى رەت ايتىلىپ تۇرماعانى، تەرىستىك كورشىمىزدىڭ باق-تارى جۇمىلا كىرىسىپ قۇلاعىمىزعا سىڭىرە باستاعانى جۇرتقا ايان. قازاق حاندىعىنىڭ 550 جىلدىق مەرەيتويى قارساڭىندا رەسەي پرەزيدەنتى پۋتين ستۋدەنتتەرمەن كەزدەسۋىندە: «قازاقتا مەملەكەت بولماعان»، - دەپ سەنىممەن ايتقان ەدى. ونىڭ زوڭگىلەسى مەدۆەدەۆ تە سولتۇستىكتەگى وبلىستارىمىزدى «ورىس جەرى»، - دەپ جازبا جاريالاپ، سوڭىنان «اككاۋنتىم بۇزىلدى، پىكىر مەنىكى ەمەس»، - دەپ اقتالعان.

ەندى سول مەدۆەدەۆ رەسەي قاۋىپسىزدىك كەڭەسى توراعاسى سالاۋاتىمەن اقپاراتتىق بومباسىن امەريكا مەن ەۋروپاعا قاراتىپ وتىر. وتكەن اپتادا ورىستىڭ قاپتاعان باسىلىمدارىنا اتىشۋلى سۇحباتتار بەرىپ، اۋىزبەن وراق ورىپ، باتىسقا ءدوڭ ايبات كورسەتتى. گااگا سوتىنىڭ «ءپۋتيندى سوعىس قىلمىسكەرى» دەپ تانىپ، قۇرامىنداعى ەلدەرگە تۇتقىنداۋعا وردەر بەرگەنى بەلگىلى. وعان ءىرى ەلدەر قولداۋ بىلدىرە باستادى. ءبىرىنشى بولىپ گەرمانيانىڭ زاڭ سالاسىنىڭ باسشىسى پۋتين گەرمانياعا اتتاپ باسسا، بىردەن تۇتقىندايتىنىن مالىمدەدى. انگليا حالقارالىق سوتقا مۇشە 42 ەلدىڭ وكىلدەرىن لوندونعا جيناپ، ءپۋتيندى قۇرىقتاۋ ءۇشىن بىرلەسە قيمىلداۋ كەرەكتىگىن اقىلداستى. ۋكرايناعا ساپارلاي كەلىپ، «سوعىستىڭ اكەلگەن قاسىرەتىن ءوز كوزىممەن كوردىم، الەمدە ءتارتىپ ورناتپاسا بولمايتىنىنا كوزىم جەتتى»، - دەگەن جاپون باسشىسى دا سوتتىڭ ۇكىمىن مۇلتىكسىز ورىندايتىنىن ايتتى. جازدا وڭتۇستىك افريكادا التىن ءوندىرۋشى بەس ەلدىڭ (رەسەي، قىتاي، ءۇندىستان، برازيليا، وڭتۇستىك افريكا) ءسامميتى وتەتىنى بەلگىلى. قارا قۇرلىق ەلىنىڭ بيلىگى دە گااگا سوتىنىڭ ۇكىمىن ەسكەرۋسىز قالدىرمايتىنىن قاداپ ايتتى. وسىنىڭ بارىنە شامدانعان مەدۆەدوۆ اقپاراتتىق قۇقايىن گەرمانيا مەن نيدەرلاندقا باعىتتادى. «توبەلەرىڭنەن قۇداي مەن ورىستىڭ يادرولىق وق تۇمسىعى ءتونىپ تۇر»، - دەپ قورقىتپاق بولدى.

ناۋرىزدىڭ 20 مەن 22 ارالىعىندا قىتاي باسشىسىنىڭ ماسكەۋدە ساپاردا بولىپ، پۋتينمەن بىرلەسكەن مالىمدەمە جاساعانى بەلگىلى. شي توراعانىڭ رەسەيگە ساپارىن قورتىندىلاعان ساياسي ساراپشىلار «رەسەي – قىتايدىڭ شيكىزات بازاسىنا، ەنەرگەتيكالىق وتارىنا اينالدى»، - دەپ باعا بەرگەن. مەدۆەدەۆتىڭ ونداي پىكىرلەرگە دە شامدانعانى سۇحباتىنان انىق كورىندى. قىتايدىڭ امەريكانى الدە قاشان باسىپ وزىپ، الەمنىڭ ءبىرىنشى ەكونوميكاسىنا اينالعانىن العا تارتىپ، اقتالۋمەن بولدى. امەريكا ساراپشىلارىنىڭ «2038 جىلعا قاراي رەسەي ىدىرايدى»، - دەگەن بولجامىنىڭ ءوڭىن اينالدىرىپ «رەسەيدەن بۇرىن امەريكا ىدىرايدى»، - دەپ كوسىلدى. «ۋكراينا قىرىمعا شابۋىل جاساسا، اتوم قارۋىن قولدانامىز»، - دەپ بارىپ، تىزگىنىن ارەڭ ىرىكتى.

مەدۆەدەۆتىڭ ايتقاندارىنىڭ قۇر بوس ءسوز ەمەس ەكەنىن دالەلدەگىسى كەلگەندەي پۋتين دە بەلارۋسكە تاكتيكالىق يادرولىق قارۋلاردى ورنالاستىراتىنىن جەتكىزدى. ءوتىنىش لۋكاشەنكو تارابىنان تۇسكەن ەكەن. لۋكاشەنكونىڭ ونىمەن كىمدى قورقىتقىسى كەلگەنى بەلگىسىز. ۋكراينا تارابى ونى «بەلارۋس رەسەيدىڭ يادرولىق بارىمتاسىنا ءتۇستى»، - دەپ باعالادى. وعان جاۋاپ رەتىندە ناتو 300 مىڭ اسكەرىن پولشا، ەستونيا، لاتۆيا قاتارلى ەلدەرگە ورنالاستىراتىن بولدى. رەسەي جاقتان الدە ءبىر وعاش قيمىل بايقاسا، جەرمەن جەكسەن ەتپەك.

ەسبول ۇسەنۇلى

Abai.kz