مەملەكەتتىك رامىزدەرگە قۇرمەتپەن قاراۋ ءار ازاماتتىڭ مىندەتى. ەل تاريحىندا باتىر بابالارىمىز جورىققا شىققاندا، ەلىن پيعىلى تار جات جۇرتتىقتاردان قورعاعان كەزدە دە تۋ كوتەرىپ، رۋحتانعانى جازىلعان. سوندىقتان مەملەكەتتىك نىشاندارعا دەگەن قۇرمەت ارقاشان بيىك بولۋعا ءتيىس. ولار جاستاردىڭ ەلىن، جەرىن سۇيۋگە، ءپاتريوتيزمدى بويىنا سىڭىرۋگە جەتەلەۋى كەرەك. مەملەكەتتىك رامىزدەر كەشەگى تاريحتى بۇگىنمەن جالعاستىرۋشى، ساباقتاستىقتىڭ جارقىن كورىنىسى.

ۇلتتىق رامىزدەر ءار ەلدە ارقانداي ماعىناعا يە. مىسالى، باۋىرلاس تۇركيا ەلىندە ءۇيدىڭ قابىرعالارىنان، بالكونداردان، بيىك جەرلەرلەر تۋدىڭ ءىلىنىپ تۇرعانىن كوپ بايقايمىز. مۇنداي ءۇردىس الەمنىڭ كوپتەگەن ەلدەرىندە تاراعان. قازاقستاندا دا 2020 جىلى پرەزيدەنت قاسىم-جومارت توقاەۆ ۇلتتىق نىشاندارعا قاتىستى زاڭدى قايتا قاراۋدى تاپسىردى.

پرەزيدەنت Twitter-اككاۋنتىندا «پارلامەنت دەپۋتاتتارى مەن ەلىمىزدىڭ پاتريوت ازاماتتارىنىڭ قازاقستاننىڭ مەملەكەتتىك رامىزدەرىن، اسىرەسە قر مەملەكەتتىك تۋىن كەڭىنەن پايدالانۋ تۋرالى ۇسىنىسىن قولدايمىن.

قولدانىستاعى زاڭنامادا ءبىزدىڭ تۋىمىزدىڭ كورسەتىلۋىن شەكتەيتىن دالسىزدىكتەر بار، مىسالى، پاتەرلەردىڭ بالكوندارىندا نەمەسە جەكە ۇيلەردىڭ قابىرعالارىنا ءىلۋ.  زاڭنامالىق جانە نورماتيۆتىك اكتىلەردى، ەڭ الدىمەن مەملەكەتتىك رامىزدەردى پايدالانۋ ەرەجەلەرىن قايتا قاراۋ قاجەت»، - دەپ جازدى.

مەملەكەت باسشىسىنىڭ تاپسىرماسىنان كەيىن، ۇلتتىق رامىزدەرگە بايلانىستى قاتىپ قالعان ەرەجەلەر وزگەرتىلدى. بۇعان دەيىن قازاقستانداقىتارعا بالكونعا تۋ ىلگەنى ءۇشىن ايىپپۇل سالىناتىن ەدى.

بۇگىندە مەملەكەتتىك تۋدى جەكە جانە زاڭدى تۇلعالار پاتريوتتىق سەزىمىن ءبىلدىرۋ، قازاقستاندىق بىرەگەيلىكتى قولداۋ، ەل ازاماتتارىنىڭ جەتىستىكتەرىن قولداۋ ماقساتىندا عيماراتتاردا، تۇرعىن  ۇي-جايلاردا، ونىڭ ىشىندە بالكونداردا جانە سالتاناتتى ءىس-شارالار وتكىزىلەتىن ورىنداردا ىلە الادى. بۇل جاعدايدا عيماراتتىڭ ارحيتەكتۋرالىق ەرەكشەلىكتەرى دە ماڭىزدى. باسپانانىڭ جەر ءۇي نەمەسە بالكونى بار كوپقاباتتى ءۇي بولۋى ماڭىزدى ءرول اتقارمايدى. سوعان قوسا بۇرىن تىيىم سالىنعان، تۋدى قاراڭعى ۋاقىتتا جارىق بەرمەي قولدانۋعا دا رۇحسات بەرىلدى.

تۋدى باسقا ماتەريالدىق وبەكتىلەرگە، مىسالى، مەملەكەتتىك نومىرلەرگە ورنالاستىرۋعا بولادى. بىراق ءبىر رەتتىك پايدالانىلاتىن زات بولماۋى قاجەت.

سونداي-اق تۋدىڭ كولەمى، ءتۇر-ءتۇسى بەكىتىلگەن ستاندارتقا ساي بولۋى ءتيىس. «مەملەكەتتىك رامىزدەر تۋرالى» زاڭعا سايكەس قازاقستاننىڭ مەملەكەتتىك تۋى ورتاسىندا كۇن ساۋلەسى بار، استىندا قالىقتاعان بۇركىت بەينەلەنگەن كوك ءتۇستى تىكبۇرىشتى ماتا بولۋعا ءتيىس. تۋدىڭ قاپتالىندا تىك جولاق تۇرىندەگى ۇلتتىق ويۋ-ورنەك بولۋى كەرەك. كۇننىڭ، ونىڭ ساۋلەلەرىنىڭ، بۇركىتتىڭ جانە ويۋ-ورنەكتىڭ بەينەسى التىن تۇستەس بولۋى كەرەك. تۋدىڭ ەنى مەن ۇزىندىعىنىڭ اراقاتىناسى 1:2 تەڭ.

ۇلتتىق نىشارداردى قورعاۋ بىزدە زاڭمەن بەكىتىلگەن. اتاپ ايتساق، ادامعا نەمەسە زاتقا دەگەن قۇرمەت كورسەتۋ ماقساتىندا تۋ تومەن تۇسىرىلمەۋى كەرەك; تۋ قانداي دا ءبىر زاتقا، جەرگە نەمەسە سۋعا تيمەۋى كەرەك; تۋدىڭ سابى كولدەنەڭىنەن كوتەرىلمەيدى; كىرلەگەن نەمەسە جىرتىلعان تۋ قويماۋ كەرەك; تۋعا جازۋعا نە سۋرەت سالۋعا بولمايدى; تۋدى جامىلعى رەتىندە، كيىم، توسەك-ورىن رەتىندە قولدانۋعا رۇحسات جوق; زاتتى تۋعا وراۋعا بولمايدى; كەيبىر جاعدايلاردا تۋدىڭ بەينەسى كوستيۋمدەردە نەمەسە سپورتتىق كيىمدە، پاتريوتتىق ۇيىمدار، اسكەري، پوليتسيا جانە ءورت سوندىرۋشىلەر مۇشەلەرىنىڭ فورماسىنا تىگىلۋى مۇمكىن.

تۋدى تىيىم سالىنعان جاعدايلاردا قولدانسا، وندا ازاماتقا اكىمشىلىك قۇقىق بۇزۋشىلىق تۋرالى كودەكستىڭ 418-بابىنا سايكەس جەكە تۇلعالارعا - 25 اەك، لاۋازىمدى تۇلعالار، جك جانە كوممەرتسيالىق ەمەس ۇيىمدارعا - 50 اەك، ورتا كاسىپكەرلىك سۋبەكتىلەرگە – 75 اەك، ءىرى كاسىپكەرلىك سۋبەكتىلەرگە – 200 اەك ايىپپۇل سالىنادى.

ۇلتتىق رامىزدەر ەل ازاماتتارىنىڭ پاتريوتتىق رۋحىن كوتەرىپ، حالقىنا دەگەن سۇيىسپەنشىلىكتى وياتاتىن، تاريحىنا قۇرمەتپەن، ەرتەڭىنە ۇمىتپەن قاراۋدى ونە بويىنا دارىتا تۇسەتىن قادىرلى نىشاندار ەكەنى داۋسىز. تۇپتەپ كەلگەندە، مەملەكەتتىك رامىزدەر ەلدىكتىڭ، ەگەمەندىكتىڭ جارقىن نىشانى بولۋى كەرەك.

سايتحۋدجا توميريس ماراتقىزى

Abai.kz