كەزەكتى پارلامەنت سايلاۋىندا باق سىناعان پارتيالاردىڭ ءبىز بايقاعان ءبىر تاكتيكاسى ءبىر-ءبىر "ورالماندى" الدىعا سالۋ بولدى.

"امانات" پارتياسى تانىمال "كوك تۋدىڭ جەلبىرەگەنى" ءانىنىڭ ءسوزىن جازعان اقىن الماس احمەتبەكتى، "اۋىل" پارتياسى جازۋشىلار وداعى استانا فيلالىنىڭ ديرەكتورى اقىن داۋلەتكەرەك كاپۇلىن، "رەسپۋبليكا" پارتياسى تانىمال كاسىپكەر سىرىمبەك تاۋدى، اتىن "قازاقستان حالىقتىق پارتياسى" دەپ اۋىستىرعان بۇرىنعى كوممۋنيستىك پارتيا كوممۋنيستىك رەجيمدەگى قىتايدان كەلىپ، تاۋەلسىز قازاقستاندا "وتانداس ەل" ۇيىمىنا باسشىلىق ەتكەن مۇقان مامىتقانۇلىن كانديداتتار تىزىمىنە قوستى.

وتكەلدەن ءوتىپ العان سوڭ، جەمە-جەمگە كەلگەندە ءبارىن "لاقتىرىپ كەتتى". "حالىق" پارتياسىنان ەرتىسباەۆتىڭ ورىنباسارى قىرعىزستاندا تۋىلسا دا، ماڭدايىنا قازاقستاندا دەپۋتات بولۋ جازىلعان يرينا سميرنوۆا حانىم پارلامەنتكە جايعاستى. توپىرلاعان اقىن، سپورتشى، بلوگەر، جۋرناليستەر پارلامەنتتىڭ الەۋمەتتىك-مادەني دامۋ بولىمىنە جينالىپ، قۋ سوزدەن قۋىرداق قۋىرىپ جۇرگەندە 2016 جىلدان باستاپ وسىمەن 3-ءشى رەت دەپۋتات بولىپ سايلانىپ وتىرعان سميرنوۆا حانىم ماماندىعى مۇعالىم بولسا دا، قارجى جانە بيۋدجەت كوميتەتىنە جايعاستى. جالعىز يرينا حانىم ەمەس، قازاقستان تاۋەلسىز ەل اتانعالى بەرى كوممۋنيستىك پارتيا پارلامەنتتەگى ورىننان قاعىلىپ كورگەن ەمەس. وسى جولى دا 5 ورىن الدى. ءبىزدىڭ ايتپاعىمىز ول ەمەس.

ارتىنان ءمالىم بولعانداي، ءدال سايلاۋ وتكەن 19 ناۋرىز كۇنى پەتروپاۆل قالاسىندا ءبىر توپ ارام پيعىلدى سەپاراتسيستەر: "قازاقستان تاۋەلسىز مەملەكەت ەمەس،  "كورپاراتسيا" دەپ اتاپ، ونىڭ نەگىزگى زاڭىن مويىندامايتىنىن مالىمدەپ، "حالىق كەڭەسىن" قۇرعاندارىن مالىمدەگەن.

قازاقستاننىڭ قازان توڭكەرىسىنەن كەيىن قازاق اۆتونوميالى سوتسياليستىك سوۆەت رەسپۋبليكاسى اتانىپ، ركفسر-دىڭ قۇرامىندا حالىق كوميسارلار كەڭەسىنىڭ باسقارۋىندا بولعانى بەلگىلى. جوعارىداعى "حالىق كەڭەسىن" قۇردىق دەگەن ارانداتۋشىلاردىڭ نەنى كوزدەگەنى وسىدان-اق، سورپا بەتىنە شىعادى.

تەرىستىك كورشىمىزدىڭ ساياساتكەرلەرى سوڭعى كەزدە جەرىمىزگە كوز سۇعىن قاداۋدى ۇدەتكەنى جۇرتقا ايان. ولار دا ارام پيعىلدارىن جاسىرۋ ءۇشىن زاڭدىق نەگىز رەتىندە قازاقستاننىڭ كەڭەس وداعى قۇرامىندا بولعان شىندىقتى بۇرمالاپ تۇسىندىرۋگە جانىن سالىپ كەلە جاتقانى دا اقيقات. الەم جۇرتى رەسەي پرەزيدەنتى ءپۋتيننىڭ ۋكرايناعا شاپقىنشىلىعىن "كەڭەس وداعىن قالپىنا كەلتىرۋ ارمانىنىڭ كورىنىسى" دەپ باعالادى. ال رەسەي كوممۋنيتەرىنىڭ اتامانى زيۋگانوۆتىڭ بىلتىر قازاقستانداعى ورىستاردى اتالمىش "قازاق ۇلتشىلدارىنىڭ تەپەرىشىنەن قورعاۋ كەرەك", - دەپ جوسىقسىز دابىل قاققانى بەلگىلى.

بۇل فاكتىلەردەن پەتپوپاۆلداعى ارام نيەتتىلەردىڭ ارەكەتىنە كورشى ەلدىڭ شوۆنيستىك يدەولوگياسىنىڭ دەم بەرگەنى اڭعارىلادى. "حالىق كەڭەسىن" قايتا كوتەرۋى سونى اڭعارتادى. ولاردىڭ ءبىزدىڭ كوممۋنيستەرمەن قانداي بايلانىسى بار دەرسىز؟! اتىن اۋىستىرعان بۇرىنعى كوممۋنيستىك پارتيانى قىزىل يدەولوگيانىڭ ەكشەۋىنەن وتكەن كەڭەستەن قالعان قازاقستاننىڭ بۇرىنعى كوممۋنيست بەلسەندىلەرى قۇرعانى بەلگىلى. تاۋەلسىز قازاقستاندا ءارتۇرلى جوعارى لاۋازىمدى جۇمىستار اتقارعان ەرتىسباەۆتىڭ "حالىق" پارتياسىنا باسشى بولىپ تاعايىندالۋى ونىڭ كوممۋنيستىك ۇستانىمىنىڭ وزگەرمەگەنىن كورسەتەدى. ونىڭ ورىنباسارى سميرنوۆا حانىمنىڭ كەزىندە پارلامەنتتە "لاتىن الىپبيىنە كوشۋ" جايى تالقىلانعاندا "ويتسەك "رۋسسكي ميردەن اجىراپ قالامىز" دەپ بايبالامعا باسقانى جۇرتقا ءمالىم.

وسى جولعى سايلاۋدا قوعام بەلسەندىسى ارمان شوراەۆ "حالىقتىق "پارتيانى "ساتقىندار پارتياسى" دەپ ارتى داۋعا ۇلاسقانى بەلگىلى. وسى جولعى پارلامەنت سايلاۋىندا دا بۇل پارتياعا ميللياردتاپ اقشا بالىنگەن. كەڭەستىڭ قالدىعىنداي بولعان بۇل پارتيانى ەل بيۋدجەتىنەن قيساپسىز اقشا ءبولىپ، نەگە سونشا ماپەلەپ ءۇستاپ وتىرعاندارى بىزگە تۇسىنىكسىز. كوممۋنيستىك پارتيا، ەسكىنىڭ كوزى قۇرىماي قازاقستاننىڭ تۇتاستىعىنا، تاۋەلسىزدىگىنە كوز الارتاتىنداردىڭ قاتارى ازايماسى انىق. پاۆلودارداعى ارانداتۋشىلاردىڭ ارەكەتى سونى انىق كورسەتتى.

ەسبول ۇسەنۇلى

 Abai.kz