عابيدوللا ابدىراحىموۆقا قارسى پەتيتسيا جاريالاندى
قازاقستاندىقتار شىمكەنت قالاسىنىڭ بۇرىنعى اكىمى عابيدوللا ابدىراحىموۆقا قاتىستى مۇقيات تەرگەۋ جۇرگىزۋ قاجەت دەپ پەتيتسيا جاريالادى.
ونلاين پەتيتسيا Avaaz.org. سايتىندا جاريالانعان. مالىمدەمە اۆتورلارى عابيدوللا ءابدىراحىموۆ قىزمەتتىك لاۋازىمىن اسىرا پايدالانىپ، مەملەكەت پەن قوعامعا زيان كەلتىرە وتىرىپ، پايدا تاپقان دەپ سانايدى.
«بۇعان جول بەرمەۋىمىز كەرەك! جالعىز ءبىز عانا ەمەس، بۇل جاعدايعا بەي-جاي قارامايتىن كوپتەگەن ازاماتتار شەنەۋنىككە قاتىستى قاتاڭ شارا قابىلداۋدى تالاپ ەتۋدە! وسىعان ءوز نارازىلىعىمىزدى ءبىلدىرىپ، وسى ماسەلەگە ەلدىڭ نازارىن اۋدارۋ ءۇشىن ءبىز عابيدوللا ابدىراحىموۆقا قارسى پەتيتسيا باستادىق. ەڭ الدىمەن، وسى ىسىمىزبەن قۇقىق قورعاۋ ورگاندارىنا جۇگىنگەن جانە وسى شەنەۋنىكتىڭ سىبايلاس جەمقورلىعى جايىندا ايعاق بەرگەن ازاماتتار مەن كاسىپكەرلەرگە قولداۋ كورسەتپەكپىز. سونىمەن قاتار، وسى پەتيتسيا ارقىلى مەملەكەتتىك ورگانداردى ءتيىستى شارالار قابىلداۋعا جانە كىنالىنى جازالاۋعا شاقىرىپ وتىرمىز»، – دەلىنگەن حابارلامادا.
مالىمدەمە اۆتورلارىنىڭ ايتۋىنشا، قوعامنىڭ باستى ماسەلەلەرىنىڭ ءبىرى – سىبايلاس جەمقورلىق ەكەنى بەلگىلى. ونىڭ سالدارى حالىقتى ادىلەتسىزدىككە، تەڭسىزدىككە جانە بيلىككە دەگەن سەنىمدى جوعالتۋعا اكەپ جاتىر.
«عابيدوللا ابدىراحىموۆقا قارسى پەتيتسيا سىبايلاس جەمقورلىقتىڭ ناقتى ءبىر جاعدايىنا نازار اۋدارۋعا عانا ەمەس، جالپى سىبايلاس جەمقورلىق ەلدى كوكتەتپەيتىنىن، ونىڭ جولىن كەسۋ قاجەت دەگەندى قوعامدىق ساناعا ەنگىزۋ ءۇشىن جاريالانىپ وتىر»، – دەيدى ولار.
ولاردىڭ ايتۋىنشا، مۇنداي قادام وسىنداي ماسەلەگە تاپ بولعان باسقا دا كاسىپكەرلەرگە ۇلگى بولماق.
«شەنەۋنىكتەردىڭ زاڭسىز ارەكەتتەرىن جاريا ەتۋ ارقىلى ءوز قۇقىقتارىن قورعاۋى قاجەت. پەتيتسيا ازاماتتاردىڭ ءوز قۇقىقتارى مەن مۇددەلەرى ءۇشىن ارەكەت ەتۋگە بولاتىنىن جانە كۇرەسە الاتىنىن كورسەتەدى. ناتيجەسىندە، پەتيتسيا زاڭنامانى وزگەرتۋگە جانە ەلىمىزدەگى سىبايلاس جەمقورلىققا قارسى كۇرەستى كۇشەيتۋگە تۇرتكى بولۋى مۇمكىن»، – دەلىنگەن پەتيتسيادا.
