بۇگىندە ەلىمىزدە ءتورت الەمدىك دەڭگەيدەگى ۋنيۆەرسيتەتتىڭ فيليالى اشىلدى. 2029 جىلعا قاراي تاعى 9 ۋنيۆەرسيتەتتىڭ فيليالىن اشۋ جوسپارلانۋدا. بۇل تۋرالى پرەمەر-مينيستر ءاليحان سمايىلوۆ ءمالىم ەتتى. 

«ءبىز ءۇشىن عىلىمي زەرتتەۋ جۇمىستارىنا ينۆەستيتسيا قۇيۋ باستى مىندەتتەردىڭ ءبىرى. 2027 جىلعا قاراي جالپى ىشكى ءونىمنىڭ ء(جىو) عىلىمي زەرتتەۋگە بولىنەتىن بيۋدجەت قاراجاتىن 1%-عا ۇلعايتۋعا تىرىسامىز. عىلىمي زەرتتەۋگە بولىنەتىن بيۋدجەت الەمدىك ستاندارتتار بويىنشا از بولىپ كورىنۋى مۇمكىن، دەگەنمەن ءبىزدىڭ ەلىمىز ءۇشىن ۇلكەن سەرپىلىس. قازاقستان كوپتەگەن زەرتتەۋ سالالارى بويىنشا الدىڭعى قاتاردا ەمەس، وعان سەبەپ ادام الەۋەتى مەن رەسۋرستاردىڭ شەكتەۋلىگى. سوندىقتان ءبىز دە الداعى ۋاقىتتا بەلگىلى ءبىر سالالاردا جەتىستىككە جەتىپ، ءبىلىمنىڭ جاھاندىق دامۋىنا ۇلەس قوسا الامىز دەپ سەنەمىز. بۇگىندە نازارباەۆ ۋنيۆەرسيتەتى زەرتتەۋلەر ناتيجەسىندە ەل ىشىندە ءبىلىم الۋدى ينستيتۋتتاندىرىپ، ناتيجەسىن كەڭىنەن تاراتۋدا»، - دەدى ءاليحان سمايىلوۆ ەلوردادا ءوتىپ جاتقان ازيا ۋنيۆەرسيتەتتەرى رەكتورلارىنىڭ فورۋمىندا.

ۇكىمەت باسشىسىنىڭ ايتۋىنشا، تسيفرلىق قوعامعا كوشۋ جاعدايىندا تەحنولوگيانىڭ ەڭبەك نارىعىنا اسەرى جوعارى.

«تسيفرلاندىرۋ قارقىنى بارلىق سالاعا اسەر ەتەدى، ونىڭ ىشىندە ەڭبەك نارىعىمەن تۇتاستاي ەكونوميكا دا بار. دەمەك، ءبىز زامان سۇرانىسىن قامتاماسىز ەتۋ ءۇشىن جوعارى وقۋ ورىندارىندا تسيفرلاندىرۋ سالاسىنا باسىمدىق بەرەمىز. سونىمەن قاتار قازاقستان ينتەرناتسيونالداندىرۋ ارقىلى ساپالى جوعارى ءبىلىم بەرۋگە ينۆەستيتسيا قۇيۋعا نيەتتى. ەلىمىزدە فيليالدىق كامپۋستار قۇرۋ ارقىلى جەتەكشى حالىقارالىق ۋنيۆەرسيتەتتەرمەن ىنتىماقتاستىقتى دامىتا تۇسەمىز. قازىرگى ۋاقىتتا 4 حالىقارالىق ۋنيۆەرسيتەت ەلىمىزدە ءوز فيليالىن اشتى. وسى باعىتتاعى جۇمىستى جالعاستىرا وتىرىپ، 2029 جىلعا قاراي كەم دەگەندە تاعى 9 الەمدىك ۋنيۆەرسيتەتتى شاقىرۋدى جوسپارلاپ وتىرمىز»، - دەيدى ول.

بۇعان دەيىن حابارلاعانىمىزداي، استانادا ازيا ۋنيۆەرسيتەتتەرى اليانسىنىڭ فورۋمى ءوتىپ جاتىر.

Abai.kz