«ۇلتتىق كينونى قولداۋ ورتالىعىنان» تاعى دا داۋ شىقتى. وسىدان ءبىراز بۇرىن رەجيسسەرلەر مەن پروديۋسسەرلەردىڭ جانايقايى ماجىلىستە كوتەرىلىپ، قوعامدى قىزۋ تالقى بولعان ەدى.

ەندى، مىنە، العاشقى ىرىكتەۋدەن وتكەن جوبالارعا قاتىستى مامىردىڭ 22-25 ارالىعىندا پيتچينگ بولماقشى. وسىعان بايلانىستى ءوز نارازىلىعىن بىلدىرگەن ءبىر توپ رەجيسسەرلەر مەن پروديۋسسەرلەر «ۇلتتىق كينونى قولداۋ ورتالىعىنىڭ» الدىندا ميتينگ وتكىزدى.

وعان قاتىسۋشىلار پرەزيدەنتكە ۇندەۋ جولدادى. بۇل دا قوعامدا ىزۋ-قىزۋ تالقى تۋدىردى. نارازىلىققا شىققان كينوگەرلەردىڭ پىكىرىنشە، «ۇلتتىق كينونى قولداۋ ورتالىعى» زاڭ بۇزىپ وتىر.

«2023 جىلى ناۋرىزدا ۇلتتىق كينونى قولداۋ ورتالىعى وتكىزگەن جوبالاردى وتكىزگەن ىرىكتەۋ كونكۋرسى ورەسكەل زاڭ بۇزۋشىلىقتارمەن ءوتتى دەپ ەسەپتەيمىز. ءبىز بىرنەشە رەت پرەزيدەنتكە، پرەزيدەنت اكىمشىلىگىنە جانە مادەنيەت مينسترلىگىنە ۇلتتىق كينونى قولداۋ ورتالىعىنىڭ زاڭ بۇزۋشىلىقتارىن ايتىپ، بىرنەشە رەت اتاپ حات جولداعان بولاتىنبىز. بۇل ماسەلەنى قازىبەك يسا باستاعان بىرقاتار دەپۋتاتتار پارلامەنتتە دە كوتەردى. بىراق اتالعان ماسەلەنى شەشۋگە ورتالىق مۇلدە قۇلىقسىزدىق تانىتىپ وتىر»، - دەلىنگەن نارازىلىق ۇندەۋدە.

ال كۇنى كەشە عانا ەسىم-سويى ەلگە بەلگىلى ونەرتانۋشى ەرلان تولەۋتاي باق وكىلدەرى مەن بلوگەرلەردى ءباسپاسوز جيىنىنا شاقىرىپ، الەۋمەتتىك جەلىدە جازبا جاريالادى.

ەرلان تولەۋتاي:

«قارنىمنىڭ اشقانىنا ەمەس، قادىرىمنىڭ قاشقانىنا جىلايمىن» دەگەن ەجەلدەن جەتكەن قاپالى ءسوز بار. بۇل زاماندا كىمنەن، نەدەن قادىر قاشپاي جاتىر؟ قادىر – حاننان دا، قارادان دا، ەلدەن دە، جەردەن دە – بارىنەن قاشتى. قادىرى قاشپاعان كىم قالدى، نە قالدى مىنا سورماڭداي، مومىن ەلدە؟ قادىرى قاشقان ەلدە بەرەكە بولمايدى، بەرەكەسىز ەلگە ارەكە كىرەدى. سولاي بولۋدا، سولاي بولا بەرەدى ءالى، ەگەر ەل بيلىگى حالىق مۇددەسىنە ساي، قاراشانىڭ مۇڭ-مۇقتاجىن ەسكەرەتىن پارمەندى شارا-شەشىمدەر، قاۋلى-قارارلار قابىلداماسا.

قازاقتىڭ بۇرىننان كەلە جاتقان ءبىر قادىرلىسى ونەر ەدى. كەيىن وعان ادەبيەت قوسىلىپ ونەر مەن ادەبيەت دەيتىن بولدى. وسى اتتاس ينستيتۋت تا بار قازىر. ادەبيەتتىڭ قادىرى قاشقانىن كەشە جازۋشىلاردى تىرپ ەتكىزبەۋگە قۇرىلعان قۇرىلتايدا كوردىك.

ادەبيەتتى بىلاي قويعاندا، حالىقتىڭ ۇلتتىق ساناسى مەن ەستەتيكالىق تالعامىن قالىپتاستىراتىن ساحنا مەن ءان-كۇي ونەرىنىڭ قادىرى قاشقالى قاشان؟ ءان ونەرى ەستى ونەرپازدار كيەلى سانايتىن ساحناعا العاشقى فانەرششيك شىققان كۇنى ەسىنەن تانىپ، سۇلق تۇسكەن بولاتىن. سودان بەرى رەنيماتسيادا، شالاجانسار كۇيدە جاتىر.

ۇلى عابەڭ «قاس سۇلۋدىڭ كوز جاسىنداي» دەپ باعا بەرگەن تەاتر ونەرىنىڭ دە ىڭىرشاعى اينالىپ-اق تۇر. ۇلتتىق تەاترلاردىڭ بۇل كۇيىنە دەپۋتات ابزال قۇسپان وپەرا جانە بالەت تەاترىنا جىلىنا بەس ميلليارد تەڭگە بولىنەتىنىن، ال ۇلتتىق تەاترلارعا يتكە سۇيەك تاستاعانداي ساناۋلى ميلليون تەڭگە «لاقتىرىلاتىنىن» پارلامەنت تورىنەن پاش ەتكەندە كوزىمىز جەتتى. بيلىك – ۇلتتىق ونەرگە يتاياقتان سارىسۋ ىشكىزىپ وتىر دەگەن وسى دا! تەاترلاردىڭ ءحالىنىڭ مۇشكىل ەكەنىن بۇرىننان دا ءبىلۋشى ەدىك، بىراق تاپ مۇنداي قورلىق كۇيدە، سوراقى حالدە دەپ ەش ويلاماپىز.

قازاققا ادەبيەت پەن تەاتردان كەيىن كەلىپ، كەيىن كەلسە دە حالقىمىزدىڭ كوڭىل تورىنەن ورىن العان كينو ونەرى ەدى. سول كينومىزدىڭ دا ساۋ باسىنان داۋ كەتپەۋگە اينالدى. وسى كۇنى كينو دا قادىرسىز ونەردىڭ كۇيىن كەشۋدە. قازىر ۇلتتىق كينونىڭ تاعدىرى قىل ۇستىندە تۇر. سەبەبى كينو ونەرىن – ادىلەتسىزدىك، جاۋاپكەرشىلىكسىزدىك، كاسىبيسىزدىك جايلاعان. باستىسى – كينونى بۇل سالادان ەش حابارى جوق – فۋنكتسيونەرلەر بيلەيدى، الاياقتار باسقارادى. ال بۇل كەلەڭسىزدىكتىڭ تامىرىنا بالتا شابۋعا – مادەنيەت جانە سپورت مينيسترلىگى ەش دارمەنسىزدىك ءھام قاۋقارسىزدىق تانىتىپ وتىر. سوڭعى جىلدارى ۇدەي ءتۇسىپ، بوي بەرمەي بارا جاتقان وسىناۋ كەلەڭسىزدىكتەرگە ءوز نارازىلىعىمىزدى ءبىلدىرىپ ءارى جوعارىعا شەشۋ جولدارىن ۇسىنۋ ماقساتىمەن ءبىر توپ كينوگەر مامىردىڭ 12 كۇنى ۇلتتىق كينونى قولداۋ مەملەكەتتىك ورتالىعى ورنالاسقان «الماتى» قوناق ءۇيىنىڭ الدىندا (شاكەن ايمانوۆ ەسكەرتكىشىنىڭ جانىنا) ميتينگىگە شىعىپ ەدىك، اياعى وسىنداي بولىپ، جاۋاپقا تارتىلۋدامىز. ميتينگكە شىقساق نە بوپتى، بۇل ءبىزدىڭ كونستيتۋتتسيالىق قۇقىعىمىز ەمەس پە جانە ءبىزدىڭ جيىنىمىزدا ەش ساياسي ۇراندار كوتەرىلگەن جوق، ءبىز تەك وسى جىلدىڭ مامىر ايىندا وتكىزىلگەن پيچينگتىڭ اق-قاراسىن تەكسەرەتىن تاۋەلسىز كومميسيا قۇرىلسىن دەگەن جالعىز-اق ۇسىنىس، تالابىمىزدى مينيسترلىككە جەتكىزگىمىز كەلدى. بار بولعانى وسى عانا! ودان ارتىق ەش نارسە تالاپ ەتكەن جوقپىز. الايدا، وسى سالاعا جاۋاپتى مەكەمەلەر مەن قۇزىرەتتىلەر بۇل ماسەلەلەردى كەڭەسە كەلە، كەلىسىپ شەشۋدىڭ ورنىنا ميتينگكە شىققان كينوگەرلەردى جاۋاپقا تارتىپ الەك!

پرەزيدەنت توقاەۆتىڭ «ادىلەتتى قازاقستانى» ءۇمىتتى ءارى جىلى ەستىلەدى. باسىندا «جاڭا قازاقستاننىڭ» دا ءىشتى جىلىتقانى راس. الايدا قوس ءۇمىتتىڭ دە اياعى كۇننەن كۇنگە سۇيىلىپ بارا جاتىر. سوعان قاراعاندا، پرەزيدەنت ماڭايىندا «ەسكى قازاقستاننان» قالعاندار وعان قارسى سابوتاج جاساۋدا دەگەن پارلامەنت دەپۋتتاتتارىنىڭ ءسوزىنىڭ جانى بار سياقتى ما، قالاي؟. جانى بار بولماسا، مىناۋ نە سۇمدىق؟!

وسىنىڭ ءبارىن سارالاي كەلە، بولىپ جاتقان وسىناۋ كەلەڭسىزدىكتەرگە ۇكىمەتتىڭ نازارىن اۋدارۋ، ۇكقمو-نان ادىلەت پەن اشىقتىقتى تالاپ ەتۋ ءارى ۇلتتىق كينو ماسەلەلەرىن قوعام تالقىسىنا سالۋ ماقساتىمەن ءبىز، ءبىر توپ كينوگەر قاۋىم، بۇگىن ساعات 11:00 دە (ۇلتتىق ءباسپاسوز كلۋبى، كازتاگ. ميكر گورنىي گيگانت، بارانسكي كوشەسى، 21 ءۇي) ءباسپاسوز كونفەرەنتسياسىن وتكىزۋگە شەشىم قابىلدادىق. قولداڭىزدار، جۋرناليستەر مەن بلوگەرلەر! بارشاڭىزدى ءباسپاسوز كونفەرەنتسياسىنا شاقىرامىز!

Abai.kz