اۋىل شارۋاشىلىعى ءمينيسترى ەربول قاراشوكەەۆ ەلىمىزدە جەم-ءشوپ دايىنداۋ جوسپارى تۋرالى ايتتى. 

«بيىل مال ازىعى بويىنشا تاپشىلىق بولمايدى دەگەن پىكىردەمىز. جەم-ءشوپ ءوندىرۋدى دامىتۋ باعىتىندا ارنايى جول كارتاسىن قابىلدادىق. وسى كارتا اياسىندا جەم-ءشوپ داقىلدارى ەگىلگەن ەگىستىكتەر كولەمى ەكى جىل قاتارىنان ۇلعايىپ كەلەدى»، - دەدى ەربول قاراشوكەەۆ سەناتتا تىلشىلەردىڭ سۇراعىنا جاۋاپ بەرە وتىرىپ.

اۋىل شارۋاشىلىعى ءمينيسترى بيىل مال ازىعىن جيناۋ ءۇشىن قولايلى جاعداي بار ەكەنىن، فەرمەرلەر جەم-ءشوپ دايارلاۋعا الدىن الا قامداۋى ءتيىس ەكەنىن ايتتى.

«بيىل وڭىرلەردەگى ىلعالدىڭ دەڭگەيىن قاراپ شىقتىق، ياعني ورتاشا جىلدىق كورسەتكىشتەر ساقتالىپ وتىر. سوندىقتان باتىس جانە وڭتۇستىك وڭىرلەردەگى 2021 جىلعى پروبلەمالار قايتالانبايدى. مال شارۋاشىلىعى سالاسى وسەدى دەپ جوسپارلاپ وتىرمىز»، - دەدى ۆەدومستۆو باسشىسى.

بۇدان بۇرىن حابارلانعانداي، بيىل 1,5 ملن گەكتار سۋارمالى جەر يگەرىلدى.

Abai.kz