قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆقا
ءامىرجان قوسانوۆتان

اشىق حات

قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆقا
ءامىرجان قوسانوۆتان

اشىق حات

قۇرمەتتى پرەزيدەنت!

دەموكراتيالىق كۇشتەر قاتارىندا جۇرگەن ۇزاق جىلدار بويىنا مەن ءسىزدىڭ اتىڭىزعا جولدانعان قوعامدىق-ساياسي ماڭىزى بار تالاي ۇجىمدىق حاتتارعا قول قويىپپىن. بۇل جولى سىزگە ساياسي استارى جوق حات جازۋعا بەل بۋىپ وتىرمىن.

28 مامىر كۇنى قر جوعارعى سوتىنىڭ قىلمىستىق ىستەر جونىندەگى سوت القاسى جاڭاوزەندەگى جاپپاي تارتىپسىزدىكتەر ءۇشىن سوتتالعانداردىڭ ءىسىن قاراماق.

2012 جىلدىڭ 4 ماۋسىمىندا جاڭاوزەن ءىسى بويىنشا ايىپتالعان 16 ادام شارتتى تۇردە 3 جىلعا باس بوستاندىعىنان ايىرىلۋعا كەسىلدى، 5-ءۋى امنيستيالاندى، 3-ءۋى اقتالدى. سونىمەن بىرگە، روزا تولەۋتاەۆا 7 جىلعا، ماقسات دوسماعامبەتوۆ، نارىن جارىلعاسىنوۆ، قانات جۇسىپباەۆ - 6 جىلعا، شابدال ۇتكىلوۆ - 5 جىلعا، تاڭاتار قاليەۆ جانە تالعات ساقتاعانوۆ - 4 جىلعا، نۇرلان اسقارۇلى، قايرات ءادىلوۆ، مارات ءامينوۆ، باۋىرجان نەپەس، جاراس بەسماعامبەتوۆ، مۇرات قوسبارماقوۆ - 3 جىلعا باس بوستاندىعىنان ايىرىلدى.

جان-جاقتان اقپارات العان سىزگە جاڭاوزەن تراگەدياسىنىڭ سەبەپتەرى مەن جاعداياتى ءمالىم دەپ ويلايمىن.
جاڭاوزەندىكتەر وسى كۇنگە دەيىن ءسىزدىڭ سول وڭىرگە بارعان كەزدەگى مۇنايشىلاردىڭ تالاپتارى ادىلەتتى بولعاندىعى تۋرالى ءسوزىڭىزدى قايتالاپ ءجۇر. ءسىزدىڭ وسى ءسوزىڭىز ولارعا قۋات بەرىپ كەلەدى، ادىلەتتىك ىزدەگەن ولاردىڭ ءۇمىتى مەن ءالى دە سەنىمىن نىقتاي تۇسۋدە. مۇنايشىلاردىڭ تاعدىرىن شەشۋ كەزىندە ساياسات ماڭىنداعى كونيۋنكتۋرالىق جايتتار ولاردىڭ الەۋمەتتىك تالاپتارىنان بولەك قاراستىرىلۋى كەرەك دەپ سانايمىن.

باسقالار سەكىلدى مەن دە و باستان جاڭاوزەن وقيعاسىن اسىرە ساياسيلاندىرۋعا قارسى بولدىم. اشىق الاڭعا شىققان ساياساتكەرلەردىڭ جولى بەلگىلى، ال وزدەرىنىڭ ەڭبەك قاقتارى ءۇشىن داۋىس كوتەرگەن مۇنايشىلاردىڭ جولى - باسقاشا. سوندىقتان بيلىكتىڭ ءوز قارسىلاستارىنا دەگەن قيىن دا قيلى كوزقاراسى تاعدىر ايداۋىمەن تەمىر توردىڭ ار جاعىنا تۇسكەن قاراپايىم ەڭبەكشىلەردىڭ بولاشاعىنا اسەر ەتپەۋى ءتيىس! مەن ءۇشىن ءاربىر مۇنايشىنىڭ جەكە تاعدىرى، ونىڭ باس بوستاندىعى مەن دەنساۋلىعى، وتباسىلارىنىڭ اماندىعى مەن باقىتى ماڭىزدىراق. تازا الەۋمەتتىك سيپاتتاعى پروبلەمالار ءدال وسىنداي بۇرىن-سوڭدى بوپ كورمەگەن دەڭگەيگە كوتەرىلگەنىنە مەن دە قاپالىمىن.

قاندى وقيعاعا دەيىن ارىپتەستەرىممەن بىرگە مەن دە جاڭاوزەندە بولعان ەدىم. ەرەۋىلشىلدەر الاڭدا تەمىردەي ءتارتىپ ساقتالۋىن، قۇق بۇزۋشىلىققا جول بەرىلمەۋىن ءبىر ادامداي قولدادى. ونى مەن ءوز كوزىممەن كوردىم. ولار جۇمىس بەرۋشى مەن اكىممەن كەلىسسوز جۇرگىزۋ يدەياسىن قولدادى، ءوز قاتارلارىنان سول كەلىسسوزگە قاتىسۋعا ءتيىس وكىلدەرىن سايلاپ تا قويدى.
ءسويتىپ، قالا اكىمىنىڭ كابينەتىندە ءۇش جاقتى كەلىسسوز باستالدى! وكىنىشكە وراي، مۇناي ماڭىنداعى باستىقتاردىڭ كەسىرىنەن، ديالوگ ءوز جالعاسىن تاپپادى. ەگەر دە سول كەلىسسوز توقتاماعاندا، 2011 جىلدىڭ جەلتوقسانىنداعى قاندى قىرعىن ورىن الماس ەدى!

وسىناۋ سەبەپتەردى نەگىزگە الا وتىرىپ، مەن، پرەزيدەنت مىرزا، سىزدەن ءوز قۇقىڭىزدى پايدالانىپ، گۋمانيزم مەن ادامسۇيگىشتىكتىڭ اسقاق ۇلگىسىن كورسەتۋىڭىزدى سۇرايمىن! ياعني، ءىستىڭ جوعارعى سوتتا قارالۋىنىڭ الدىندا مۇنايشىلارعا نە امنيستيا بەرىپ، نە راقىمشىلىق جاساساڭىز! اتا زاڭىمىزدىڭ كەپىلى رەتىندە ءسىزدىڭ مۇنداي قادام جاساۋىڭىزعا تولىق مۇمكىندىگىڭىز بار!
ءسىزدىڭ بۇل شەشىمىڭىز سوتتالعان مۇنايشىلار مەن ولاردىڭ وتباسىلارىنىڭ ءۇمىتىن جالعاپ، قوعامدا گۋمانيستىك مۇراتتارعا دەگەن سەنىمدى نىعايتار ەدى.

مەنىڭ بۇل ءسوزىم مۇنايشىلاردى قولداعان مىڭداعان پىكىردىڭ ءبىر مىسقالى عانا ەكەنىن ءارى دە ەڭ ماڭىزدى شەشىم قابىلداۋ ءۇشىن مۇلدەم جەتكىلىكسىز ەكەنىن مەن تۇسىنەمىن. بىراق سوتتىڭ باستى شەشىمى قابىلدانار الدىندا مەن ءۇنسىز قالۋدى ءجونسىز دەپ سانادىم.

جانە دە مەن ءسىزدىڭ ءارتۇرلى ماقسات كوزدەگەن لوببيستىك توپتاردان بيىك قالپىڭىزدا قالىپ، ءوز وتانداستارىمىزدىڭ - مۇنايشىلاردىڭ ريزاشىلىعىن تۋدىرار لايىقتى شەشىم قابىلدايتىنىڭىزعا سەنىمدىمىن!

ءامىرجان قوسانوۆ،
الماتى، 2013 جىلدىڭ 20 مامىرى

Abai.kz