بەيسەنبى, 25 شىلدە 2024
دەي سالدىم-اۋ 2747 8 پىكىر 9 ماۋسىم, 2023 ساعات 14:07

ۇقشۇ جيىنى ءھام لۋكاشەنكو: قازاقستانعا قاۋىپ ءتونىپ تۇر!

كەشە بەلارۋس پرەزيدەنتى الەكساندر لۋكاشەنكو ۇقشۇ-عا مۇشە مەملەكەتتەردىڭ قاۋىپسىزدىك كەڭەسى حاتشىلارىمەن كەزدەستى. بۇل تۋرالى بەلارۋس رەسپۋبليكاسى باسشىسىنىڭ رەسمي سايتى حابارلادى.

جاعىنان جاڭىلا بەرەتىن بەلارۋس پرەزيدەنتى بۇل جولى دا قاشانعى ادەتىنشە، اقش پەن باتىستى ايىپتاپ، رەسەي مەن بەلارۋسيانى سۇتتەن اق، سۋدان تازا قىلىپ كورسەتكىسى كەلدى.

سونىمەن قاتار، لۋكاشەنكو قىرعىزستانداعى كەيىنگى جاعدايلار تۋرالى ءسوز قوزعاپ، قازاقستاندى دا تىلگە تيەك ەتتى.

ونىڭ ايتۋىنشا، قازىرگى تاڭدا ۇقشۇ ەلدەرىنىڭ قاۋىپسىزدىكتى نىعايتۋ سالاسىنداعى ديالوگ ماسەلەسى بۇرىنعىمەن سالىستىرعاندا ءتىپتى وزەكتى ەكەن. ويتكەنى بۇكىل الەمنىڭ تىنىشى كەتىپتى: كاۆكاز بەن ورتالىق ازيا، ۋكراينا، پولشا مەن بالتىق ەلدەرى دە بەيبەرەكەت تىرلىك كەشىپ جاتىر. بۇدان سوڭ ول قىرعىزستانعا ەرەكشە توقتالىپ ءوتتى.

«جارايسىڭدار جىگىتتەر! قاۋىپتى ەلەمەنتتەردى جورگەگىندە تۇنشىقتىردىڭدار. بۇل قۇرمەتتەۋگە تۇرارلىق ءىس!»، – دەدى ول.

بەلباسى قازاقستانعا دا قاۋىپ ءتونىپ تۇرعانىن ايتقانىمەن، ناقتى قاي تاراپتان بولاتىنىن اتامادى.

«كوردىڭدەر عوي، بۇققان سايىن سۇعىپ جاتىر! تارت قولىڭدى قىرعىزتاننان! ولار اياقتان تۇرىپ كەلە جاتقان ەل. دامي بەرسىن. قىرعىزستان دامىسا، كىم نەدەن ۇتىلادى؟ ەشكىم! سوعان قاراماستان ولار ونى قىسىپ جاتىر. قىرعىزستانداعى جاعدايلاردى تەكتەن-تەك جاساپ وتىر دەپ ويلايسىزدار ما؟ جوق. ولار قىرعىزستان ارقىلى قازاقستاندى، رەسەي ارقىلى قىتايدى كوزدەپ وتىر. اسىرەسە، قازاقستانعا تىنىشتىق بەرمەيدى»، – دەدى لۋكاشەنكو.

ەستەرىڭىزدە بولسا، قىرعىزستاننىڭ ۇلتتىق قاۋىپسىزدىك جونىندەگى مەملەكەتتىك كوميتەتى الدىمەن جاپپاي تارتىپسىزدىك جاساپ، كەيىن بيلىكتى باسىپ الماق بولعان كۇدىكتىلەردى ۇستاعانىن حابارلاعان ەدى.

ۆەدومستۆو قىلمىستىق توپتىڭ جىل بويى ەل اۋماعىنداعى نارازى ازاماتتارىنا ءوز قاتارىنا قوسىپ وتىرعانىن ايتقان. قىلمىستىق توپتىڭ ۇيىمداستىرۋشىسى جانە يديولوگى – ازاماتتىق بەلسەندى، «ەل كەڭەسى» ساياسي پارتياسىنىڭ توراعاسى. قىرعىزستان قمك دەرەگىنشە، ۇيىمداسقان توپقا قوعامنىڭ ءتۇرلى سالالارى مەن قىرعىزستاننىڭ ايماقتارىنان 100-دەن استام ادام تارتىلعان جانە ارقايسىسىنا جەكە-جەكە مىندەت جۇكتەگەن.

قۇقىق قورعاۋ ورگانى ولاردىڭ شەتەلدەن قارجى الۋ مۇمكىندىگى جونىندە مالىمدەدى.

ەسكە سالايىق، 2023 جىلدىڭ قاڭتارىنان باستاپ ۇقشۇ-نىڭ باس حاتشىسى قىزمەتىن قازاقستان رەسپۋبليكاسىنىڭ بۇرىنعى قورعانىس ءمينيسترى جانە پرەمەر-ءمينيسترى يمانعالي تاسماعامبەتوۆ اتقارادى.

Abai.kz

8 پىكىر

ۇزدىك ماتەريالدار

اباي مۇراسى

اباي ىلىمىندەگى ءومىر ماقساتى نە؟

دوسىم وماروۆ 1429
وي تۇرتكى

المەرەك ابىزدىڭ ورالۋى - ەلگە ءدىننىڭ ورالۋى

باقتىباي اينابەكوۆ 2263
كورشىنىڭ كولەڭكەسى

رەسەي تىلدىك ءھام ساياسي ەكسپانسيانى قالاي جۇرگىزدى؟

بەيسەنعازى ۇلىقبەك 2298