اbai.kz سايتىنىڭ ەلەكتروندى پوشتاسىنا سپورتشىلار وداعىنىڭ اتىنان حات كەلىپ ءتۇستى. حاتتا دەپۋتات داۋلەت تۇرلىحانوۆقا بايلانىستى تاراپ جاتقان قاۋەسەتتەر تۋرالى ءسوز قوزعالىپ، وعان اراشا سۇراعان ەكەن. Abai.kz ەركىن اقپارات الاڭى. Abai.kz-تە وي جارىستىرىپ، پىكىر تالاستىرۋعا قازاقستاننىڭ ءاربىر ازاماتى قۇقىلى. ەندەشە، «تۇرلىحانوۆقا اراشا» سۇراعان ءۇشبۋ حاتپەن تانىس بولىڭىزدار.

قۇرمەتتى وقىرمان! اۆتوردىڭ پىكىرى مەن رەداكتسيا كوزقاراسى سايكەسە بەرمەۋى مۇمكىن ەكەنىن ەستەرىڭىزگە سالامىز.

قۇرمەتتى دوستار، قۇرمەتتى ارىپتەستەر!

كەيىنگى ايلاردا داۋلەت بولاتۇلى تۇرلىحانوۆقا قارسى اقپاراتتىق سوعىس پەن ينتەرنەت-قۋدالاۋ جۇرگىزىلىپ جاتىر. قازاقستان سپورتشىلار وداعى بۇل جايتتى باقىلاپ، الاڭداپ وتىر.

بىرنەشە ايدان بەرى ايتىلىپ كەلە جاتقان داۋلەت تۇرلىحانوۆتىڭ  ۇلى نۇراسىل بولاتتىڭ توڭىرەگىندەگى جانجالدى كوپشىلىك ەستىگەن شىعار. ءبىز قوعامدىق ۇيىم رەتىندە مۇنداي ماسەلەلەر تەك زاڭ اياسىندا، ىشكى ىستەر مينيسترلىگى مەن پروكۋراتۋرانىڭ قاداعالاۋىندا قارالۋى كەرەك دەپ سانايمىز. بۇل رەتتە قارسى تاراپتىڭ داۋلەت تۇرلىحانوۆتىڭ اتى مەن ونىڭ قازىرگى جۇمىس ورنىن پايدالانىپ، عالامتوردا قىزۋ ءجۇرىپ جاتقان جورامالىن قاتە دەپ ەسەپتەيمىز. ازاماتتار نەگىزسىز ايىپتاۋدى توقتاتىپ، زاڭ اياسىندا ارەكەت ەتۋ كەرەك. ادامدار تولىق جەتكىزىلمەگەن مالىمدەمەلەردىڭ كەسىرەنەن قوعام تاراپىنان ءجيى سىنعا ۇشىرايتىنىن ءبارىمىز بىلەمىز. اتالعان جاعداي دا وسىندايدان شىعىپ وتىر.

كەيىنگى اتىشۋلى قىلمىستىق ىستەرگە «حاھىنا قول سۇعۋعا بولمايتىن ادامداردىڭ» ارالاسقانىن جانە ولاردىڭ جازالانعانىن سوتتىڭ ادىلدىگىنە كۇمانداناتىن جانداردىڭ ەسىنە سالعىمىز كەلەدى.

سپورتشىلار وداعىنىڭ باستى مىندەتتەرىنىڭ ءبىرى – قازىرگى سپورتشىلاردى دا، مانسابىن اياقتاعان سپورتشىلاردى دا قورعاۋ. ءبىز شەت قالا المايمىز. داۋلەت بولاتۇلىنىڭ ار-نامىسى مەن قادىر-قاسيەتىنە نۇقسان كەلتىرەتىن پوستتاردى، مالىمدەمەلەردى جانە باسقا دا دالەلدەنبەگەن اقپاراتتى تاراتۋدى توقتاتۋدى سۇرايمىز. ءبىز قاداعالاۋ جانە باقىلاۋ ورگاندارىنان الەۋمەتتىك جەلى قولدانۋشىلارى داۋلەت بولاتۇلىن تەرگەۋگە قىسىم جاسادى دەپ ايىپتاپ جاريالانعان جالعان اقپاراتقا باعا بەرۋىن سۇرايمىز.

داۋلەت تۇرلىحانوۆ – قازاقستان سپورتىنىڭ اڭىزى! ەلگە، سپورتتىڭ دامۋىنا، وسكەلەڭ ۇرپاققا ەڭبەگى سىڭگەن ادامدى سپورت قاۋىمى قورعاۋعا مىندەتتى. ەسكە سالا كەتەيىك، ول – گرەك-ريم كۇرەسىنەن ەڭبەك سىڭىرگەن سپورت شەبەرى، سەۋلدەگى وليمپيادا ويىندارىنىڭ كۇمىس جۇلدەگەرى، بارسەلوناداعى وليمپيادا ويىندارىنىڭ قولا جۇلدەگەرى، الەم چەمپيونى، ازيا ويىندارىنىڭ چەمپيونى، ەۋروپا چەمپيونى، 2 دۇركىن ازيا چەمپيونى، قازاقستان رەسپۋبليكاسىنىڭ ەڭبەك سىڭىرگەن جاتتىقتىرۋشىسى.

Abai.kz