وليگارح قايرات ساتىبالدى وزىنە سوت ۇكىمى شىعا سالىسىمەن الماتى وبلىسى ۇشقوڭىر جايلاۋىنداعى ءساندى سارايىن اعاسى – قازاقستاننىڭ ەكس-پرەزيدەنتى نۇرسۇلتان نازارباەۆقا سىيعا تارتتى. بۇل تۋرالى «ازاتتىق راديوسى» جازادى.

باسىلىمنىڭ حابارلاۋىنشا، نازارباەۆ اۋلەتىنىڭ تۋىپ-وسكەن جەرى – الماتى ماڭىنداعى تابيعاتى تامىلجىعان ۇشقوڭىر جايلاۋىندا ورنالاسقان سالتاناتتى سارايدىڭ يەسى اۋىستى. ەكس-پرەزيدەنتتىڭ نەمەرە ءىنىسى قايرات ساتىبالدى ءوزىنىڭ اعاسى نۇرسۇلتان نازارباەۆقا جىلجىمايتىن مۇلىك سىيلادى. ءبىر قىزىعى، بۇل ساتىبالدىنىڭ مۇلكى تاركىلەنىپ، تۇرمەگە قامالعاننان كەيىن بولعان.

ۇشقوڭىرداعى رەزيدەنتسيا 2023 جىلدىڭ ءساۋىر ايىنىڭ ورتاسىندا «سىيعا بەرۋ» كەلىسىم شارتى بويىنشا «ەلباسى قورىنا» ءوتتى. قوردىڭ جالعىز قۇرىلتايشىسى – نۇرسۇلتان نازارباەۆ ەكەنى بەلگىلى. بۇل ارەكەتتىڭ قالاي جۇزەگە اسقانى بەلگىسىز، دەپ جازادى باسىلىم.

قايرات ساتىبالدىنى 6 جىلعا باس بوستاندىعىنان ايىرۋ ۇكىمى شىققان سوڭ، ونىڭ مۇلكىن تاركىلەۋ تۋرالى ۇكىم دە شىققان بولاتىن.

«قىلمىستىق كودەكس بويىنشا، ەگەر سوتتالعان ادامنىڭ مۇلكى - وتباسىنىڭ جالعىز تۇرىپ جاتقان ءۇيى بولسا، تاركىلەنۋگە جاتپايدى. الايدا، ۇشقوڭىر جايلاۋىنداعى ساتىبالدىنىڭ مۇلكى «وتباسىنىڭ جالعىز باسپاسى، سوندىقتان تاركىلەنبەگەن» دەپ ايتۋعا نەگىز جوق. استانادا قايرات ساتىبالدىنىڭ ۇلى ىسمايلدىڭ اتىنا جازىلعان ءزاۋلىم ءۇي بار. ال الماتىدا ءساندى ساراي مەن 12 جارىم گەكتار جەردى الىپ جاتقان بىرنەشە كوتتەدج ساتىبالدىنىڭ ءۇش بالانىڭ اناسى اسەل باقتيارقىزىنىڭ اتىنا تىركەلگەن»، - دەپ اتاپ ءوتتى باسىلىم.

الماتى وبلىسى پروكۋراتۋراسىنىڭ مالىمەتىنشە، مەملەكەتكە ەكس-پرەزيدەنتتىڭ تۋىستارىنا تيەسىلى 4569 گەكتار اۋماقتى الاتىن 12 جەر ۋچاسكەسى قايتارىلعان. ول جەردە كىمدەردەن الىنعانى اتالماعان.

«سوعان قاراماستان، ۇشقوڭىر جايلاۋىنداعى ءزاۋلىم ساراي نۇرسۇلتان نازارباەۆقا تيەسىلى، ال ونىڭ اينالاسىنداعى مىڭداعان گەكتار جەر ونىڭ تۋىستارىنىڭ مەنشىگىندە. بيىل ءساۋىر ايىندا ءساندى سارايدىڭ يەسى اۋىسقان كەزدە، ۇشقوڭىرداعى جەر ۋچاسكەلەرىنە يەلىك ەتەتىن كومپانيالاردىڭ قۇرىلتايشىسى دا وزگەردى. 9412 گەكتار جەردىڭ يەسى جانە 1300 گەكتارعا جۋىق جەردى جالعا الۋشى ءتورت كومپانيا – Steppe AgroMeat (بۇرىن «دۇنيە ارگو» دەپ اتالعان), Qaz Agro Centre («ايسام كو. لتد»), Breeding company («لۋنا ترەيد») جانە Prime Capital reKarasay.

ولاردىڭ تۇپكى يەسى بولات نازارباەۆ بولعان. قازىر ولاردى Prime Capital Holding سەرىكتەستىگى ارقىلى بولات نازارباەۆتىڭ ۇلى نۇربول يەلەنگەن. ۇشقوڭىر ۇستىرتىندەگى 9,5 مىڭ گەكتارعا جۋىق جەر بولات نازارباەۆتىڭ ۇلى نۇربول نازارباەۆتىڭ كومپانيالارىنا تيەسىلى. سوڭعى بەنەفيتسياردىڭ اۋىسۋىنا قاراماستان، سارايدان تىس 10 مىڭ گەكتار جەرگە سىبايلاس جەمقورلىققا قارسى قىزمەت پەن سوت شەكتەۋ قويعان. ونىڭ مەملەكەتكە قايتارىلاتىنى نە قايتارىلمايتىنى بەلگىسىز»، - دەپ جازدى باسىلىم.

ەستەرىڭىزگە سالا كەتەيىك، 2022 جىلدىڭ 26 قىركۇيەگىندە قايرات ساتىبالدى لاۋازىمدىق وكىلەتتىگىن اسىرا پايدالانعانى جانە ۇرلاۋ فاكتىلەرى بويىنشا التى جىلعا باس بوستاندىعىنان ايىرىلدى. قازىر ساتىبالدىنىڭ باسقا دا قىلمىستارىنىڭ بار، جوعى تەكسەرىلىپ جاتىر.

Abai.kz