كەشە ءماجىلىستىڭ جالپى وتىرىسىنا جىلۋمەن قامتۋ ماسەلەلەرى تۋرالى جوعارى اۋديتورلىق پالاتانىڭ ەسەبىن تىڭدالدى.

مەملەكەت باسشىسىنىڭ 2022 جىلعى قاراشاداعى جارلىعىنا سايكەس، جوعارى اۋديتورلىق پالاتا توراعاسى جىلىنا ەكى رەت ءماجىلىس دەپۋتاتتارىنا ەسەپ بەرۋگە ءتيىس. بۇل – اتالعان پالاتانىڭ العاشقى ەسەبى.
جالپى وسى سالاداعى تۇيتكىلدى ماسەلەلەردى تالقىلاۋ شامامەن ءۇش ساعاتقا سوزىلدى.

– وتكەن قىستا ەكىباستۇزدا، پەتروپاۆلسكىدە، ريددەردە، رۋدنىيدا تۇرعىندار جىلۋسىز قالدى. بۇل – جىلدار بويى قوردالانعان پروبلەمالاردىڭ سالدارى. مەملەكەت باسشىسى وسى ماسەلەلەردى ۇنەمى باقىلاۋىندا ۇستاپ وتىر. ۇكىمەتكە ءبىراز ناقتى تاپسىرما بەردى. الايدا جىلۋ-ەنەرگەتيكا جۇيەسىن تولىققاندى جاڭعىرتۋ باستالدى دەپ ايتۋعا ءالى ەرتە. جوعارى اۋديتورلىق پالاتانىڭ ەسەبى دە وسى سالاداعى ولقىلىقتاردى انىق كورسەتتى، – دەدى ءماجىلىس توراعاسى.

ءماجىلىس دەپۋتاتتارى تاراپىنان ءبىراز سىني پىكىرلەر ايتىلدى. جاۋاپتى مينيسترلىكتەر وكىلدەرىنە حالىقتى تولعاندىرىپ وتىرعان ەڭ وزەكتى ساۋالدار قويىلدى. الايدا دەپۋتاتتاردىڭ دەنى مينيسترلەردىڭ بەرگەن جاۋابىنا قاناعاتتانعان جوق.

– ۇكىمەت مۇشەلەرىنىڭ بەرگەن جاۋاپتارىنان ءالى دە ماسەلەلەردىڭ تولىق شەشىلمەي جاتقانىن بايقاپ وتىرمىز. سوندىقتان جىلۋمەن قامتاماسىز ەتۋ ماسەلەسى الداعى ۋاقىتتا دا دەپۋتاتتاردىڭ ەرەكشە باقىلاۋىندا بولادى. كەلەسى سەسسيادا ءبىز مىندەتتى تۇردە بۇل تاقىرىپقا قايتا ورالىپ، ۇكىمەت مۇشەلەرىنىڭ ەسەبىن تاعى دا تىڭداۋىمىز قاجەت، – دەدى ەرلان قوشانوۆ.

ءماجىلىس توراعاسى دەپۋتاتتاردىڭ ەنەرگەتيكالىق قاداعالاۋدى كۇشەيتۋ تۋرالى ۇسىنىسىن قولدادى. سونىمەن قاتار جىلۋ سالاسىنا تىكەلەي جاۋاپتى مەملەكەتتىك ورگانداردىڭ جاۋاپكەرشىلىگىن ايقىنداۋ ءۇشىن وكىلەتتىكتەردى قايتا قاراۋ كەرەكتىگىنە نازار اۋداردى.

جيىن سوڭىندا ەرلان قوشانوۆ جاۋاپتى مينيسترلىكتەرگە جىلىتۋ ماۋسىمىنا دايىندىقتى جەدەلدەتۋ كەرەكتىگىن ەسكەرتتى.

Abai.kz