بۇل ءبىر جىلدارى تىرشىلىگى قىز-قىز قايناپ جاتاتىن باحمۋت قالاسىنىڭ قازىرگى قۇس ۇشار بيىكتەن قاراعانداعى كەيپى. بۇكىل قالا جەرمەن-جەكسەن بولعان. قالادا بىردە-ءبىر ءبۇتىن عيمارات قالماعان.

«مىناۋ تۇرعىن ۇيلەردە ءومىر سۇرگەن ادامدار قازىر بارلىعىنان ايىرىلعان. ولاردىڭ تۋعان قالالارى جەر بەتىنەن جويىلىپ كەتتى. تۇك قالمادى. تەك «ورىس الەمى» قالدى...»، - دەپ جازىپتى تومەندەگى سۋرەتتەردىڭ اۆتورلارى كونستانتين مەن ۆلادا ليبەروۆالار...

باحمۋت – ۋكراينانىڭ دونەتسك وبلىسىنداعى شاعىن عانا قالاشىق. بۇگىنگى قالا ورنالاسقان اۋماقتا XVI عاسىردىڭ ورتا شەگىندە العاش رەت باحمۋت بەكىنىسى بوي تۇزەگەن. اتاۋىن باحمۋت وزەنىنەن العان. ال 1783 جىلى قالا ستاتۋسىن العان. ارىدەگى تاريحىنا تەرەڭ ۇڭىلمەسەك تە، ورىس باسقىنشىلىعى كەزىندەگى باستان وتكەرگەندەرىنە از-كەم توقتالا كەتكەندى ءجون كوردىك.

باحمۋت دونەتسك وبلىسىنداعى يندۋستريالدىق قالا. 2014 جىلدىڭ ساۋىرىندە وزدەرىن «دحر» دەپ جاريالاعان سەپاراتيستەر باحمۋتتى باسىپ العان. ال 2014 جىلدىڭ شىلدەسىندە ۋكراينا اسكەرى باحمۋتتى باسقىنشىلاردان ازات ەتكەن.

2015-2016 جىلى قالا سەپاراتيستىك كۇشتەر تارابىنان بىرنەشە مارتە شابۋىلعا ۇشىراعان. 2022 جىلدىڭ مامىر ايىنان بەرى قالا تولىق ماسششتابتا سوعىستى باستان كەشىرۋدە. بىلتىر تامىزدان باستاپ رەسەي باحمۋتتى الۋ ءۇشىن بار كۇشىن سالۋدا. 2023 جىلدىڭ مامىر ايىنا دەيىن قالانىڭ 85 پايىزى باسقىنشىلاردىڭ قولىنا وتكەن ەدى. بيىل مامىردان بەرى ۋكراينا اسكەرى باحمۋتتا جاۋدى كەرى شەگىندىرىپ جاتىر. باحمۋتتا نەگىزىنەن «ۆاگنەر» جەك جەندەتتەرى شوعىرلانعان.

سوعىسقا دەيىن بۇل قالادا 70 مىڭعا جۋىق ادام تىرشىلىك كەشكەن. قازىر ولار باحمۋتتان كوشىرىلگەن.  بۇگىندە باحمۋت جەرمەن-جەكسەن بولعان، ەلەس قالاعا اينالدى. دەسە دە باحمۋتتىڭ بايىرعى تۇرعىندارىنان قالادا 1,5-3 مىڭ ارالىعىندا قاراپايىم تۇرعىندار بار ەكەنى ايتىلادى.

Abai.kz