وتكەن ايدىڭ 18-ءى كۇنى Abai.kz اقپاراتتىق پورتالىندا «بەيجىڭدە كوممۋنيست، ماسكەۋدە كگب بولعان ابەن اقساقال» اتتى كولەمدى سۇحبات جاريالاندى. ماقالانىڭ ىشىندە ابەن اقساقال: «1962 جىلعى كوشكە قابدەش ءجۇمادىلوۆتىڭ ەش قاتىسى جوق، ول ەكى ەلدىڭ كەلىسىمىمەن بولعان، قىتاي وكىمەتى ەشكىمنىڭ الدىن توسپادى»، - دەپ پىكىر بىلدىرگەن بولاتىن.

بۇگىن رەداكتسيامىزعا مارقۇم، قازاقستاننىڭ حالىق جازۋشىسى قابدەش ءجۇمادىلوۆتىڭ ۇلى، تاريحشى ارمان جۇمادىلوۆتەن ءۇشبۋ حات كەلىپ ءتۇستى.

«وتكەندە، مىنا ادام ءوزىنىڭ سۇحباتىندا 1962 جىلعى كوشكە قابدەش ءجۇمادىلوۆتىڭ ەش قاتىسى جوق، ول ەكى ەلدىڭ كەلىسىمىمەن بولعان، قىتاي وكىمەتى ەشكىمنىڭ الدىن توسپادى دەپ تاريحقا، ادىلدىككە ءبىراز قيانات جاساماقشى بولدى. سوعان ەلدەگى ازاماتتار قاتتى نارازى بوپ جاتقان كورىنەدى. ءبىر اعايىندارىمىز ابەن وماروۆقا ولەڭمەن دە سىناپ جاۋاپ بەرىپتى. سول جاۋابىن پورتالدا سول كىسىگە جاۋاپ رەتىندە باسسا بولا ما؟ مەن ءوزىمنىڭ ماقالامدى سوڭىرا بەرەرمىن»، - دەپ جازعان.

Abai.kzاقپاراتتىق پورتالى ەركىن اقپارات الاڭى. مۇنداي وي جارىستىرىپ، پىكىر تالاستىرۋعا قازاقستاننىڭ ءاربىر ازاماتى قۇقىلى. ەندەشە، مارحابات مارتەبەلى وقىرمان!

ابەنگە نەمەسە ابانعا حات

اسسالاۋماعالايكۋم، امانسىز با،
ءسىز وسى ابەنسىز بە، ابانسىز با؟
وسى ارادا ءبىر سۇراق تۋىندايدى،
قازاقسىز با، سارتسىز با، ساۋانسىز با؟

اق ساقالدى، اق ءشاشتى بولعانىڭشا،
قۇپياڭدى اشپايتىن ادامسىز با؟
كىرپىگىڭىز اعارىپ كەتكەن ەكەن،
ارتى قۋىس ۇرىداي الاڭسىز با؟

كىسى كيىك سەكىلدى مىنەزىڭ بار،
جاقسىسىز با، ءسىز الدە جامانسىز با؟
اردى ويلاماي كوبىنە پايدا ويلايسىز،
ونداي كەزدە دەمەيسىز قالام سىنعا.

سالپاڭقۇلاق ءومىرى تىڭشى بولىپ،
جالا جاپتىڭ ابەكە، جانى اسىلعا.
سونىڭ ءبىرى قاباڭداي دارابوز عوي،
سول ۇشىندە مەن ءسىزدى الام سىنعا!

ۇقسامايسىز كادىمگى ءبىر ادامعا،
ماڭگى ولمەيتىن ۇقسايسىز ءتىرى ادامعا.
«ابەن، ابەن بولعالى قاي ۋاقىت،
جاسامادى جاقسىلىق ءبىر ادامعا».

دەگەن ەدى كونە كوز ءبىر قاريا،
ەشقاشاندا تاقپايتىن كىنا ادامعا.
«ول ولىمەن قورىقپاي الىسادى،
قاسىندا ونىڭ نە سورىم ءتىرى ادامعا.
سونىڭ بالام، بايقاساڭ ءبىر ايعاعى،
قابدەشتەيىن سوقتىعۋ ءىرى ادامعا.
ءىشى قايدان اق بولسىن، سىرتى قارا،
تۇلا بويى نە شارا، كىر ادامعا.
بەتى ولاردىڭ ەشقاشان بۇلىك ەتپەيدى،
ونداي  مىنە، وتە مە سىن ادامعا.
اقيقاتىن اللا ءوزى تارازىلار،
ودان ارتىق ايتۋدا كۇنا ادامعا».

دەگەنى بار قاريانىڭ ۇقساڭ بۇگىن،
ول ايتقان تۇسىنبەيدى تۇسپالدى كىم.
ءبىر تارىنىڭ سيعىزعان قاۋىزىنا،
ۇمىتىپسىز قىتايدىڭ قىسقاندىعىن.
شەبىن بۇزىپ شەكارا حالىق وتكەن،
ونىڭ بىلمەۋ جاعدايىن مىستاندىعىڭ،
سىزگە ىقپال ءالى دە ەتەدى مە،
ىشتەن بۇگىن، الدەكىم تىستان بۇگىن.
ايتپەسە قابەكەڭدە نەڭ بار كوكە،
ويانىپ اياق استى دۇشپاندىعىڭ.
پالەن جىل ءۇش ارىپكە قىزمەت ەتكەن،
كەتكەن بە، قانعا ءسىڭىپ ىسپارلىعىڭ.
سيراعىڭ شىعىپ جاتىر سۇحباتىڭنان،
وسى ما كارى ءبورى، پىسقاندىعىڭ،
دەسەك قوي قابەكەڭدى ءولى ارىستان،
بۇل ءسىزدىڭ ءتىرى جۇرگەن تىشقاندىعىڭ.

قىلىعىڭ ۇقساعان سوڭ قاپتەسەرگە،
بولەندىم ولەڭ جازىپ قاتتى اسەرگە.
قاپتەسەر جاساعان سوڭ زياندى ءىسىن،
تىپ-تىنىش قارا ورمان جاتپاس ەلدە.
سولاردىڭ دۇرلىگۋىن باسايىن دەپ،
قولىما الدىم قالام، قاپ دەسەم دە.
اشۋدى اقىلىما جەڭدىردىم دە،
ارنادىم وزىڭە ولەڭ، باس كەسەم بە!
كوكىرەگىڭ كوكتى تىرەپ تۇرسا-داعى،
ايتقانىڭ جالپاق جاتقان جاقپاس ەلگە.
قاباڭا قارا كۇيە جاققانىڭمەن،
سەركەسىن، كوش باستاعان ساتپاس ەل دە.
ەكى ەلدىڭ اراسىندا كەلىسىمدى،
قايدان ايتىپ وتىر دەر قاقپاس ەلگە.
ابەكە، وسى جايدى ۇعاسىز با،
سىزدەر باردا جارىق تاڭ اتپاس ەلگە!

دەمە ماعان كوزىڭدى الايتامىن،
حالىق ميلليون ابەكە، ءسىز بايقاعىن.
سيپا-داعى قارنىڭدى وتىرا بەر،
ى دەسەڭىز دالەلدى وي تاعى ايتامىن!..

ءتىلىپ تۇسەر

Abai.kz