ساۋدا جانە ينتەگراتسيا ءمينيسترى سەرىك جۇماعارين قازاقستاننان رەسەيگە سانكتسيا سالىنعان ونەركاسىپتىك ماقساتتا، سونداي-اق، قارۋ جاساۋدا قولدانىلاتىن تاۋارلاردىڭ تاسىمالدانعانىن راستادى. 

«سانكتسيالاردىڭ باسىندا ولار (سانكتسيانى دايىنداعان باتىس ەلدەرىنىڭ وكىلدەرى) بىزگە سانكتسيا سالىنعان 7 مىڭ تاۋار تۇرلەرىنىڭ ءتىزىمىن بەردى. بۇل ءبىزدىڭ بۇكىل تاۋار اينالىمىمىز. ءبىز باتىس ەلدەرىنىڭ وكىلدەرىمەن سويلەسىپ، «مۇنىڭ بارلىعىنا توسقاۋىل قويۋ نەمەسە باقىلاۋدا ۇستاۋ مۇمكىن ەمەس دەدىك»، - دەدى سەرىك جۇمانعارين ازاتتىققا بەرگەن جاۋابىندا.

ءمينيستردىڭ ايتۋىنشا، كوكتەمدە ەو-نىڭ ارنايى وكىلىمەن كەلىسسوزدەر كەزىندە بۇل ءتىزىمدى قىسقارتۋ ۇسىنىلعان.

ايتا كەتسەك، جاقىندا رەسەيگە 11-ءشى سانكتسيالار پاكەتىن دايىنداعان ەۋروپا وداعى سانكتسيالاردى اينالىپ وتۋگە كومەكتەسىپ وتىرعان ورتالىق ازيا ەلدەرىنە دە سانكتسيا سالۋدىڭ مەحانيزمىن قاراستىردى.

دەگەنمەن، ەۋروپانىڭ كەيبىر ەلدەرى ورتالىق ازيا مەملەكەتتەرىنە سانكتسيا سالۋعا قارسى، سەبەبى، «بۇل ديپلوماتيالىق قاتىناستاردى قيىنداتادى ءارى ەلدەردىڭ ەكونوميكاسىن رەسەي مەن قىتايعا ودان ءارى بايلاپ تاستاۋى مۇمكىن»، - دەيدى ەۋروپالىق شەنەۋنىكتەر.

جوسپارعا ساي بلوك اۋەلى وا ەلدەرىمەن «رەسەيگە كومەكتەسۋدىڭ» سالدارى قانداي بولاتىنىن ءتۇسىندىرىپ، ديپلوماتيالىق كەلىسسوزدەر جۇرگىزۋى كەرەك. بۇعان دەيىن، رەسەيدىڭ ەڭ جاقىن سەرىكتەسى قازاقستان سانكتسيانى اينالىپ وتۋگە كورشىسىنە كومەكتەسپەيتىنىن ايتىپ، ۋادە بەرگەن.

ۋكرايناعا سوعىس باستاعاننان كەيىن رەسەي باتىس سانكتسيالارىن اينالىپ وتۋگە ورتالىق ازيا ەلدەرىن پايدالاندى. نەگىزىنەن باتىس ەلدەرى مەن اقش-تىڭ وندىرگەن تەحنيكا مەن ەلەكتروندى جابدىقتارىن ءۇشىنشى ەلدەر ارقىلى الدىرا باستادى. قازىر رەسەيگە تاۋارلار قازاقستان، قىرعىزستان، وزبەكستان جانە تۇرىكمەنستان ارقىلى اكەلىنەدى.

قازاقستان: 2022 جىلعى قاڭتار-تامىزدا قازاقستان مەن رەسەي فەدەراتسياسىنىڭ تاۋار اينالىمى 15.9 ملرد دوللارعا جەتتى، 2021 جىلدىڭ سايكەس كەزەڭىمەن سالىستىرعاندا 4.2%-عا ارتىق.

وزبەكستان: 2022 جىلعى قاڭتار-تامىزدا رەسەي فەدەراتسياسىمەن تاۋار اينالىمىنىڭ كولەمى 5.6 ملرد دوللاردى قۇرادى، ياعني 27,1%-عا ءوستى.

وزبەكستان رەسەي فەدەراتسياسىنا نەگىزىنەن ونەركاسىپتىك تاۋارلاردى، توقىما بۇيىمدارىن، كوكونىستەر مەن جەمىستەر، التىن ەكسپورتتايدى. بىراق بىلتىرعى قاڭتار- تامىزدا ەلەكتروۆاگوندار مەن جابدىقتاردىڭ ەكسپورتىن 21,3 ەسەگە، ال مامانداندىرىلماعان اۆتوموبيلدەردىڭ، وندىرىستىك جابدىقتار مەن اۆتوبولشەكتەردىڭ ەكسپورتىن 4,3 ەسەگە  ارتتىردى.

قىرعىزستان: 2022 جىلدىڭ 8 ايىندا قىرعىزستان رەسەي فەدەراتسياسىنا 445 ميلليون دوللاردىڭ تاۋارىن جىبەردى، بۇل 2021 جىلدىڭ سايكەس ايلارىنا قاراعاندا 207 ميلليون دوللارعا كوپ. سونىمەن قاتار، تەحنيكا مەن ەلەكتر جابدىقتارى-قۇلاققاپتار، جىلىتقىشتار، ەلەكتر پەشتەرى، بەينەكامەرالار جانە ت. ب. ەكسپورتىن ارتتىرعان.

تۇرىكمەنستان: 2022 جىلعى قاڭتار-مامىر ايلارىندا رەسەي فەدەراتسياسىمەن تاۋار اينالىمى 278 ميلليون دوللاردى قۇرادى، 2021 جىلدىڭ سايكەس كەزەڭىمەن سالىستىرعاندا 18%-عا ءوستى.

Abai.kz