مەملەكەت باسشىسى ىشكى ىستەر مينيسترلىگىنىڭ القا ءماجىلىسىن وتكىزدى. اتالعان القا-قوتان جيىندا پرەزيدەنت توقاەۆ قازاقستان پوليتسياسىنا قاتىستى بىرقاتار مالىمدەمە جاسادى.

سونىمەن، پرەزيدەنت توقاەۆ پوليتسيانى جيىپ نە دەدى؟

پوليتسيا قوعامدا حالىقتىڭ قۇرمەتىنە يە ماماندىقتىڭ ءبىرى بولۋى كەرەك!

«بارشاڭىزعا ءمالىم، ىشكى ىستەر مينيسترلىگى – مەملەكەتتىك باسقارۋ جۇيەسىندە ايرىقشا ءرول اتقاراتىن قۇرىلىم. قوعامدىق ءتارتىپتى ساقتاۋ، قىلمىسپەن كۇرەسۋ – اسا ماڭىزدى مىندەت. ازاماتتاردىڭ جانە بۇكىل مەملەكەتتىڭ قاۋىپسىزدىگى وسى مىندەتتەرگە تىكەلەي بايلانىستى.

ءتارتىپ ساقشىلارىنىڭ قىزمەتى وڭاي ەمەس. كۇنى-ءتۇنى جۇمىس ىستەيتىن كەزدەر ءجيى بولادى. قاۋىپ-قاتەر دە بار. تاۋلىك بويى، ياعني 24 ساعات بويى ساقاداي ساي بولۋ ءۇشىن ەرەكشە قاجىر-قايرات پەن توزىمدىلىك قاجەت. سەبەبى قيىن جاعدايعا تاپ بولعان جاندار، ەڭ الدىمەن، پوليتسيادان كومەك كۇتەدى. ازاماتتارىمىز سىزدەرگە مەملەكەتتىڭ، ياعني بيلىكتىڭ وكىلى رەتىندە قارايدى. قاۋىپ-قاتەردەن قورعايدى دەپ سەنەدى. سوندىقتان سىزدەرگە ءاردايىم وراسان زور جاۋاپكەرشىلىك جۇكتەلەدى.

جالپى پوليتسيانىڭ ساپالى جۇمىسى ەل ءۇشىن، حالىق ءۇشىن وتە قاجەت. ءبىز ءبارىمىز، ءبىرتۇتاس قوعام بولىپ پوليتسيا قىزمەتكەرلەرىنە جان-جاقتى قولداۋ كورسەتۋىمىز قاجەت. ءدال وسىنداي قولداۋدى ءبىز مىندەتتى تۇردە كورسەتەمىز. پوليتسيا قوعامدا حالىقتىڭ قۇرمەتىنە يە ماماندىقتىڭ ءبىرى بولۋى كەرەك. ال پوليتسيا قىزمەتكەرلەرى، ەڭ الدىمەن، ءوز ەلىنە، حالقىنا ادال قىزمەت ەتۋگە ءتيىس. سوندىقتان ءبىز قازىر ىشكى ىستەر ورگاندارىنىڭ جۇمىسىن جەتىلدىرۋگە باسا ءمان بەرىپ وتىرمىز»، - دەدى پرەزيدەنت.

«بۇگىندە پوليتسيا قىزمەتىنىڭ سەرۆيستىك مودەلى ەنگىزىلىپ جاتىر. پيلوتتىق جوبالار قولعا الىندى. سونىڭ ارقاسىندا تۇرعىندارمەن تىعىز جۇمىس جاسايتىن بولىمشەلەردىڭ قىزمەتى رەتتەلدى.

«جۇرتقا جاقىن پوليتسيا» قاعيداتىن ورنىقتىرۋ ءۇشىن ناقتى شارالار قابىلدانۋدا. وسى قارقىندى توقتاتپاۋ كەرەك. پيلوتتىق جوبا اياسىندا قول جەتكەن جەتىستىكپەن شەكتەلىپ قالۋعا بولمايدى. اشىعىن ايتقاندا، قىزمەت كورسەتۋدىڭ سەرۆيستىك مودەلى تۋرالى تەك ماماندار عانا ايتىپ ءجۇر. قاراپايىم ازاماتتار مەن قوعام وكىلدەرى پىكىر ءبىلدىرىپ جاتقان جوق. بۇل – حالىق ونىڭ ناقتى ناتيجەسىن، وڭ وزگەرىستەردى كورىپ جاتقان جوق دەگەن ءسوز.

سونداي-اق سوتقا دەيىنگى تەرگەۋ سالاسىنا دا نازار اۋدارعان ءجون. بۇل – قۇقىق قورعاۋ جۇيەسىندەگى مەملەكەتتىك قىزمەتتىڭ ەرەكشە ءبىر ءتۇرى. ارينە، ونىڭ وزىندىك ىشكى ءتارتىبى مەن ەرەجەلەرى بار»، - دەدى.

ساۋديادا قامالعان قاجىلار تۋرالى ايتتى

«مەن بۇگىن قوعامدا وزەكتى بولىپ تۇرعان تاعى ءبىر ماسەلەگە توقتالعىم كەلەدى. قازىر كوپتەگەن ازاماتتارىمىز الاياقتاردىڭ ايلاسىنا ءتۇسىپ، الدانىپ قالىپ جاتىر. سوندىقتان قۇقىق قورعاۋ ورگاندارى الاياقتارعا قارسى تاباندى كۇرەس جۇرگىزۋگە ءتيىس. ولارعا ەشقانداي جەڭىلدىك جاسالماۋى كەرەك. سەبەبى الاياقتاردىڭ جاساعان ارەكەتىنەن حالىق زارداپ شەگۋدە.

مىسالى، جاقىندا ءبىر تۋريستىك كومپانيا زاڭعا باعىناتىن ءبىر توپ ازاماتتى الداپ، ولاردى قاجىلىققا جىبەرگەن. ەندى، كىناسىز ادامدار ساۋد ارابياسىنىڭ پوليتسيا ۋچاسكەسىندە قاماۋدا وتىرۋعا ءماجبۇر. وسىنداي الاياق كومپانيانىڭ زاڭعا قايشى ارەكەتى ازاماتتارىمىزدىڭ دەنساۋلىعىنا، ولاردىڭ مورالدىق جاعدايىنا جانە جالپى ەلىمىزدىڭ بەدەلىنە ۇلكەن نۇقسان كەلتىرىپ وتىر. بۇل جەردە، ارينە، ادامداردىڭ قۇقىقتىق ساۋاتسىزدىعى دا بار.

ەندى، مەملەكەتىمىز، ياعني سىرتقى ىستەر مينيسترلىگى ولارعا بارىنشا كومەكتەسۋى قاجەت. ال ىشكى ىستەر مينيسترلىگى الاياق كومپانيانىڭ باسشىلىعىن، قىزمەتكەرلەرىن زاڭعا سايكەس جاۋاپقا تارتۋعا ءتيىس. ادىلەتتى قوعام قۇرامىز دەسەك، ءدال وسىنداي وزەكتى ماسەلەلەردى شەشۋىمىز كەرەك»، - دەدى پرەزيدەنت ساۋدياعا قاجىلىققا بارىپ، تۋريستىك كومپانياعا الدانعان قاجىلار تۋرالى.

«كەلەسى ءبىر ماڭىزدى ماسەلەگە ارنايى توقتالعىم كەلەدى.

پوليتسيانىڭ جوعارى دەڭگەيدەگى وكىلدەرى ۋنيۆەرسيتەتتەرگە، مەكتەپتەرگە بارىپ، زاڭداردى جاستارعا ءتۇسىندىرۋى كەرەك. اسىرەسە، زاڭ بۇزۋدىڭ سالدارىن انىق كورسەتۋى قاجەت.

وكىنىشكە قاراي، ءبىزدىڭ جاستارىمىزدىڭ اراسىندا زاڭ ساۋاتسىزدىعى كەڭىنەن تارالعان، باسقا سوزبەن ايتقاندا، جاستارىمىز زاڭدى بىلمەيدى، زاڭدى ساقتاۋدىڭ ءمان-ماڭىزىن تۇسىنبەيدى. ال مۇنداي قۇقىقتىق ساۋاتسىزدىقتىڭ سالدارى وتە اۋىر.

مەن ءاربىر جيىندا قوعامىمىزدا زاڭ ۇستەمدىگى بولۋ كەرەك، سونىڭ نەگىزىندە ءتارتىپ بولۋ كەرەك دەپ ايتىپ ءجۇرمىن. پوليتسيا قىزمەتكەرلەرى وسى قاراپايىم تۇجىرىمدامانى حالىققا، ازاماتتارعا، اسىرەسە، جاستارعا جەتكىزۋى كەرەك»، - دەدى مەملەكەت باسشىسى.

«بۇگىندە ازاماتتارىمىز وزدەرىنىڭ زاڭدى قۇقىقتارىن، كونستيتۋتسيالىق بوستاندىقتارىن جانە جەكە مەنشىگىن قورعاۋ ءۇشىن مەملەكەتكە جۇگىنەدى. ولار قيىن جاعدايعا تاپ بولعاندا بيلىك وكىلدەرى ادىلدىكتى تەز ارادا قايتا ورناتادى، كىنالىلەردى جاۋاپقا تارتادى جانە شىعىندى وتەۋگە كومەكتەسەدى دەپ ۇمىتتەنەدى. سوندىقتان ارىز-شاعىمداردى بارىنشا جىلدام ءارى كاسىبي تۇردە قاراستىرىپ، ارەكەت ەتۋ قاجەت.

الايدا شاعىمداردىڭ كوپتىگى قۇقىق قورعاۋ جۇيەسىنىڭ بۇل مىندەتتى ءتيىستى دەڭگەيدە اتقارا الماي جاتقانىن كورسەتەدى. ازاماتتار جىلدار بويى تالاي مەكەمەنىڭ تابالدىرىعىن توزدىرىپ، ناقتى جاۋاپ تاپپاي، شىندىققا قول جەتكىزە الماي ءجۇر. سوندىقتان مەنىڭ تاپسىرمام بويىنشا قۇقىق قورعاۋ جۇيەسىن رەفورمالاۋ جونىندەگى كوميسسيا قىلمىستىق جانە قىلمىستىق پروتسەستىك زاڭنامانى جەتىلدىرۋ تۋرالى زاڭ جوباسىن ازىرلەدى.

بۇل قۇجات تەرگەۋشىلەردىڭ جانە انىقتاۋشىلاردىڭ جۇمىسىن جەڭىلدەتۋ ءۇشىن كەرەك. باستى ماقسات – ولاردى ارتىق راسىمدەردەن، قۇجاتتاردان ارىلتۋ. تۇپتەپ كەلگەندە، مۇنىڭ ءبارى سىزدەرگە كومەك سۇراپ كەلگەن ازاماتتار ءۇشىن جاسالىپ جاتىر»، - دەدى پرەزيدەنت.

پوليتسيا بيۋروكراتيادان اۋلاق بولۋى كەرەك!

«بيۋروكراتيا جويىلسا، پوليتسيانىڭ ۋاقىتى ۇنەمدەلەدى، كۇش-قۋاتى بوسقا جۇمسالمايدى. ازاماتتاردىڭ وزەكتى ماسەلەسىن شەشۋگە كوبىرەك مۇمكىندىك تۋادى.

ءبىزدىڭ ازاماتتارىمىزعا قۇرعاق ەسەپتەر ەمەس، سىزدەردىڭ قىزمەتتەرىڭىزدەگى ەلەۋلى وزگەرىستەر مەن ناقتى ناتيجەلەر قاجەت. سەرۆيستىك مودەلدىڭ ءمانى – وسى. ونىڭ نەگىزگى تاسىلدەرى پوليتسيا قىزمەتىنىڭ بارلىق اسپەكتىلەرى مەن سالالارىنا ەنگىزىلۋى كەرەك»، - دەدى پرەزيدەنت توقاەۆ.

«وتباسىنداعى تۇرمىستىق زورلىق-زومبىلىقتىڭ الدىن الۋ جۇمىسىنىڭ تيىمدىلىگىن ارتتىرۋعا ەرەكشە نازار اۋدارۋ كەرەك. ستاتيستيكا كوڭىل كونشىتپەيدى. سوڭعى ەكى جارىم جىلدا ۇيدەگى زورلىق-زومبىلىقتىڭ سالدارىنان 300 ادام كوز جۇمدى. دەنساۋلىققا اۋىر زيان كەلتىرۋدىڭ 878 فاكتىسى جانە ورتاشا زيان كەلتىرۋدىڭ 808 فاكتىسى تىركەلگەن. وسىنداي قۇقىق بۇزۋشىلىقتار بويىنشا 37 مىڭنان استام ادام اكىمشىلىك جاۋاپكەرشىلىككە تارتىلدى.

جاعدايدى تۇزەۋ ءۇشىن الدىن الۋ شارالارىن كەشەندى تۇردە جۇرگىزۋ قاجەت. بۇل جەردە ۋچاسكەلىك ينسپەكتورلار شەشۋشى ءرول اتقارادى. ۋاقتىلى شارالار قابىلدانسا، وتباسىلىق جانە تۇرمىستىق ۇرىس-كەرىس كەزىندە جاسالعان قىلمىستاردىڭ كوپشىلىگىنىڭ الدىن الۋعا بولار ەدى. ياعني بىرەۋدىڭ ءومىرى مەن دەنساۋلىعىن ساقتاپ قالار ەدىك. مۇنى تاجىريبە كورسەتتى. قوعام سىزدەردەن وتباسىنداعى تۇرمىستىق زورلىق-زومبىلىققا قارسى ءتيىمدى ءارى جۇيەلى ءىس-ارەكەت كۇتەدى.

بۇل ماسەلە ادىلەتتى مەملەكەت قۇرۋ ءۇشىن وتە ماڭىزدى. كوپتەگەن الەۋمەتتىك كەسەلدىڭ ءتۇپ تامىرى، سونىڭ ىشىندە قىلمىس كوبىنە تۇرمىسى ناشار وتباسىلاردان باستاۋ الادى. مۇنداي وتباسىلارداعى زورلىق-زومبىلىقتار بالالاردىڭ سانا-سەزىمىنە جانە پسيحيكاسىنا كەرى اسەرىن تيگىزەدى. سوندىقتان قۇقىق قورعاۋ ورگاندارى ادامداردىڭ قۇندىلىقتار جۇيەسى مەن مىنەز-قۇلىق مودەلىن وزگەرتۋدە شەشۋشى ءرول اتقارا الادى جانە اتقارۋى قاجەت»، - دەدى پرەزيدەنت.

«قۇقىق قورعاۋ ورگاندارى ارقاشان باستى نازاردا ۇستاۋعا ءتيىس تاعى ءبىر ماڭىزدى ماسەلە – جول قاۋىپسىزدىگى دەڭگەيىن ارتتىرۋ. سوڭعى ءۇش جىلدا جول-كولىك وقيعالارىنىڭ سانى 9 پايىزعا ءوستى. ونىڭ سالدارىنان 6,5 مىڭنان استام ازامات قازا تاۋىپ، 55 مىڭنان استامى جاراقات الدى.

شىن مانىندە، ءبىز جىل سايىن ءىرى ەلدى مەكەندەردىڭ حالقىنان ايىرىلىپ وتىرمىز. بۇل – ەلىمىز ءۇشىن ناعىز قاسىرەت. ءبىز ادامداردىڭ ءومىرى مەن دەنساۋلىعى ەڭ باستى قۇندىلىق ەكەنىن ۇنەمى ايتامىز. سوندىقتان جاعدايدى تۇزەۋ ءۇشىن جۇيەلى شارالار قابىلداۋ كەرەك. ەڭ الدىمەن، بارلىق ازاماتتىڭ نازارىن جول ءجۇرۋ ەرەجەلەرىن مۇلتىكسىز ساقتاۋعا اۋدارۋ كەرەك.

ماسەلەن، جاياۋ جۇرگىنشىلەردىڭ كىناسىنەن تەك بيىلدىڭ وزىندە 164 جول-كولىك وقيعاسى بولىپ، سالدارىنان 24 ادام قازا تاپتى، 142 ادام جاراقات الدى. اپاتتاردىڭ كوپتىگى جول قاۋىپسىزدىگى دەڭگەيىنىڭ اۆتوموبيلدەر سانىنىڭ وسىمىنە ساي كەلمەيتىنىن كورسەتەدى. بۇل جول ينفراقۇرىلىمىنا دا، ونىڭ قاۋىپسىزدىگىنە جاۋاپ بەرەتىن قىزمەتتەردىڭ جۇمىسىن ۇيىمداستىرۋعا دا قاتىستى.

جۋىردا عانا ەلەكتر ساموكاتتارىن جانە باسقا دا جەكە كولىك قۇرالدارىن پايدالانۋ ءتارتىبىن رەتتەيتىن زاڭ قابىلداندى. ەندى كولىكتىڭ جاڭا تۇرلەرىن ءىس جۇزىندە قاۋىپسىز پايدالانۋدى قامتاماسىز ەتۋ ماڭىزدى»، - دەدى مەملەكەت باسشىسى.

تىركەۋسىز ەلگە كىرگىزىلگەن كولىكتەر تۋرالى...

«ەل اۋماعىنا رەتسىز اكەلىنگەن شەتەلدىك كولىكتەر دە جولداعى جاعدايدى ۋشىقتىرىپ جىبەردى. ولار تىركەۋسىز ءجۇردى. مۇنداي كولىكتەردى تىزگىندەگەن جۇرگىزۋشىلەر جول ءجۇرۋ ەرەجەسىن ورەسكەل بۇزدى جانە كوبىنە جازاسىز قالدى. قازىر مەنىڭ تاپسىرمام بويىنشا بۇل كولىكتەردىڭ ماسەلەسىن قۇقىقتىق تۇرعىدا رەتتەۋ ءۇشىن زاڭداستىرۋ جۇمىستارى جۇرگىزىلىپ جاتىر.

ۋاكىلەتتى مەملەكەتتىك ورگانداردىڭ ءۇستىرت شەشىمى وسىنداي كولىكتەردىڭ ەلگە جاپپاي اكەلىنۋىنە سەبەپشى بولدى. ەندى جىبەرىلگەن ولقىلىقتاردى تۇزەۋگە ءماجبۇر بولىپ وتىرمىز. ونىڭ ىشىندە ىشكى ىستەر مينيسترلىگىنىڭ دە قاتەلىكتەرى بار. بۇدان بولەك، شەتەلدىك كولىكتەردى اكەلۋمەن جانە ونى ەسەپكە قويۋمەن اينالىساتىن قىلمىستىق سحەمالار پايدا بولدى. وعان پوليتسيا قىزمەتكەرلەرىنىڭ دە قاتىسى بار. ادىلەتتى ءارى قۇقىقتىق مەملەكەتتە بۇكىل قۇقىق قورعاۋ جۇيەسىنىڭ اتىنا كىر كەلتىرەتىن مۇنداي زاڭسىزدىقتارعا جول بەرىلمەۋى كەرەك.

سوندىقتان قۇقىق قورعاۋ ورگاندارى وسى سالاداعى ماماندارمەن جانە ازاماتتىق بەلسەندىلەرمەن بىرلەسىپ، اتالعان ماسەلەمەن جان-جاقتى اينالىسۋى كەرەك»، - دەدى پرەزيدەنت توقاەۆ.

«قىلمىستىڭ ۇيىمداسقان تۇرلەرى مەملەكەت پەن قوعام ءۇشىن زور قاۋىپ توندىرەدى. ەل ىشىندە بولعان جايتتار، سونداي-اق توڭىرەگىمىزدەگى گەوساياسي كەڭىستىكتە بولىپ جاتقان وقيعالار ۇيىمداسقان قىلمىستىق توپتارمەن ىمىراسىز كۇرەس جۇرگىزۋدىڭ اسا ماڭىزدى ەكەنىن كورسەتتى.

ۇيىمداسقان قىلمىستىق توپ وكىلدەرىمەن «بارماق باستى، كوز قىستى» ارەكەتتەرگە بارۋعا، استىرتىن مامىلە جاساۋعا، سىبايلاستىققا جول بەرىلمەيدى ءارى قاتاڭ تىيىم سالىنادى. ولاردان قاھارمان جاساۋدىڭ كەرەگى جوق. كەزىندە اباي «كۇشىك اسىراپ، يت ەتتىم، ول بالتىرىمدى قاناتتى. بىرەۋگە مىلتىق ۇيرەتتىم، ول مەرگەن بولدى، مەنى اتتى» دەپ ايتقان.

تاياۋداعى وقيعالار قىلمىس الەمىنىڭ وكىلدەرى، تۇپتەپ كەلگەندە، مەملەكەت پەن زاڭعا باعىناتىن ازاماتتارعا قارسى باس كوتەرىپ، ساياسي تالاپ قويۋعا جانە ءوز دەگەنىن جاساتۋعا تىرىساتىنىن كورسەتتى»، - دەدى پرەزيدەنت رەسەيدەگى پريگوجيننىڭ بۇلىگىن مىسال ەتە وتىرىپ.

«جالپى زاڭعا باعىنۋ مەن قۇقىق بۇزۋشىلىقتىڭ ارا-جىگىن ناقتى اجىراتا ءبىلۋ قاجەت. تاعى دا قايتالاپ ايتامىن. قوعامدا زاڭ مەن ءتارتىپ قاتاڭ ساقتالۋى كەرەك. سوندا عانا ەلىمىز ءوسىپ-وركەندەيدى. بۇل – مىزعىماس قاعيدا.

قىلمىسكەرلەرمەن كۇرەس ىمىراسىز جۇرگىزىلۋگە ءتيىس. بىردە ءبىر قۇقىق بۇزۋشىلىقتى ەلەۋسىز قالدىرۋعا بولمايدى. مۇندا ۇساق-تۇيەك دەگەن جوق»، - دەدى توقاەۆ.

پوليتسيا ۇردا-جىق قاسيەتتەردەن ارىلۋى ءتيىس!

«پوليتسيا قىزمەتكەرى زاڭعا باعىناتىن ادامعا قۇرمەتپەن قاراۋى كەرەك. ال ءتارتىپ بۇزۋشىلارمەن زاڭ اياسىندا سويلەسۋ قاجەت. ادامدى ازاپتاۋعا، قيناۋعا، تىيىم سالىنعان تەرگەۋ تاسىلدەرىن قولدانۋعا مۇلدەم جول بەرىلمەيدى. ءاربىر ءتارتىپ ساقشىسى مۇنى جەتە تۇسىنۋگە ءتيىس.

كۇندەلىكتى جۇمىستا وسى تالاپتار ساقتالسا، ازاماتتاردىڭ پوليتسياعا دەگەن سەنىمى ارتادى. ارينە، قوعام تاراپىنان دا قۇرمەت بولۋى كەرەك. حالىقتىڭ تۇسىنىگىندە پوليتسيا ازاماتتاردى قورعاۋشى، قولداۋشى، قىلمىستىڭ الدىن الۋشى، زاڭنىڭ ورىندالۋىن قاداعالاۋشى بولۋعا ءتيىس.

وكىنىشكە قاراي، قازىر ەل اراسىندا پوليتسيانىڭ كەلبەتى، بەدەلى ءدال سونداي دەپ ايتا المايمىز. ءتارتىپ ساقشىسىنىڭ زاڭدى تالابىنا باعىنباۋ، وعان قوقان-لوقى كورسەتۋ، ءتىپتى، كۇش قولدانۋ دۇرىس ەمەس. وسىنداي ارەكەتتەردى دوعارۋ كەرەك. مۇنداي جاعدايدا بۇزاقىلار جاۋاپسىز قالماۋى قاجەت»، - دەدى قاسىم-جومارت توقاەۆ.

ءتارتىپ ساقشىسى ساۋاتتى سويلەپ، ءوزىن لايىقتى ۇستاۋى قاجەت!

«الەۋمەتتىك جەلىدە پوليتسياعا قاتىستى ءتۇرلى بەينەجازبالار بار. كەيبىر ادامدار قاساقانا ارانداتۋشىلىق جاسايدى. سونداي كەزدە ۇستامدىلىق تانىتىپ، دورەكى ارەكەتتەرگە جول بەرمەۋ وتە ماڭىزدى. ءتارتىپ ساقشىسى ساۋاتتى سويلەپ، ءوزىن لايىقتى ۇستاۋى قاجەت. پوليتسيا قىزمەتكەرى زاڭداردى انىق بىلۋگە ءتيىس، ياعني ەلىمىزدىڭ زاڭدارىن جۇرتقا قاراپايىم تىلمەن تۇسىندىرۋگە دايىن بولۋى قاجەت. سوندا عانا پوليتسيا مەن حالىق اراسىندا مىزعىماس كەلىسىم بولادى.

ارينە، وفيتسەرلەردىڭ اراسىندا كاسىبي بىلىكتى، انتىنا ادال ازاماتتار كوپ. سونداي قىزمەتكەرلەر وزگەلەرگە، اسىرەسە، جاستارعا ۇلگى-ونەگە كورسەتۋدە. وسىنداي ۇزدىك قىزمەتكەرلەردى قولداۋ قاجەت.

ەرلىك كورسەتكەن وفيتسەر، سەرجانتتار تۋرالى جۇرت بىلۋگە ءتيىس. بۇل – ءبىزدىڭ ءتيىستى مينيسترلىكتىڭ جانە جالپى بۇقارالىق اقپارات قۇرالدارىنىڭ مىندەتى. وزدەرىڭىزگە ءمالىم، مەملەكەت ىشكى ىستەر ورگاندارىنىڭ جۇمىسىن ءاردايىم جوعارى باعالايدى»، - دەدى پرەزيدەنت.

«سوڭعى ءۇش جىلدىڭ ىشىندە ناقتى شارالار اتقارىلدى. جالاقىنى بىرنەشە رەت كوتەردىك. تۇرعىن ءۇي تولەمدەرىن الاتىن قىزمەتكەرلەر كوبەيدى. قازىر ولاردىڭ سانى 38 مىڭنان استى. ۇلتتىق ۇلانعا قولداۋ كورسەتىلۋدە. ماتەريالدىق-تەحنيكالىق بازانى نىعايتۋ ءۇشىن جىل سايىن قوماقتى قارجى ءبولىنىپ وتىر. يننوۆاتسيالىق تەحنولوگيالار ەنگىزىلۋدە.

جالپى ىشكى ىستەر ورگاندارىنا قولداۋ كورسەتىلە بەرەدى. وسىنىڭ ءبارى ازاماتتاردى قورعاۋ جانە قوعامدىق ءتارتىپتى نىعايتۋ ءۇشىن كەرەك. تەمىردەي ءتارتىپ – تۇراقتىلىق پەن تىنىشتىقتىڭ كەپىلى.

مەن مينيسترلىك باسشىلىعى ايماقتارعا بارىپ، جۇرتپەن كەزدەسىپ جۇرگەنىن بىلەمىن. تۇرعىنداردى تولعاندىراتىن ماسەلەلەر از ەمەس. سونىڭ ءبارىن كوزبەن كورىپ، اقىلداسىپ، بىرلەسىپ شەشكەن دۇرىس. سوندىقتان ءبىز بۇگىن ىشكى ىستەر ورگاندارىنىڭ جۇمىسىنا قاتىستى وزەكتى ماسەلەلەردى تالقىلايمىز»، - دەپ تۇيىندەدى مەملەكەت باسشىسى.

Abai.kz