ساياسي تۇتقىن 52 جاستاعى ەرمەك نارىمباي بوستاندىققا شىعادى. قوناەۆ قالالىق سوتى ونىڭ جازاسىن جەڭىلدەتۋ تۋرالى وتىنىشىنە وڭ جاۋاپ بەرگەن.

بۇل تۋرالى بەلسەندىنىڭ ادۆوكاتى جانار بالعاباەۆا حابارلادى.

«مەرزىمىنەن بۇرىن بوساپ، 11 ايعا جۋىق پروباتسيالىق باقىلاۋدا بولاتىن بولدى. ءبىز ايىپپۇل تولەپ شىعارۋدى سۇرادىق. بىراق پروكۋرور پروباتسيالىق باقىلاۋ قاجەت ەكەنىن ايتتى. سۋديا پروكۋرورمەن كەلىسىپ، قاتاڭ شەكتەۋمەن شىعارۋعا كەلىستى. ءباسپاسوز ماسليحاتى، ميتينگ پەن شەرۋ سياقتى قوعامدىق ىستەرگە قاتىسۋعا تىيىم سالدى»، - دەدى قۇقىق قورعاۋشى.

ادۆوكاتتىڭ سوزىنشە، پروكۋراتۋرا قارسىلىق بىلدىرمەسە، 15 تاۋلىكتەن كەيىن ەرمەك نارىمباي تۇرمەدەن شىعۋعا ءتيىس.

ەرمەك نارىمباي بۇعان دەيىن ساياسي بەلسەندىلىگى ءۇشىن بىرنەشە رەت رەت اكىمشىلىك جانە قىلمىستىق جازاعا تارتىلدى.

2010 جىلعى قاڭتار ايىندا ەرمەك نارىمباي قىلمىستىق جاۋاپكەرشىلىككە تارتىلىپ، ءتورت جىلعا باس بوستاندىعىنان ايىرىلعان. اۋەلى 15 كۇنگە قاماۋعا الىنعان ول، «سوتقا قۇرمەت كورسەتپەدى»، «پوليتسياعا قارسىلىق كورسەتتى» دەپ ايىپتالىپ، سوتتالدى. جازا مەرزىمىنىڭ جارتىسىن وتەگەن سوڭ بوستاندىققا شىقتى. بىراق بىرنەشە رەت اكىمشىلىك جاۋاپكەرشىلىككە تارتىلدى.

2015 جىلدىڭ قازان ايىندا ەرمەك نارىمباي مەن سەرىكجان مامبەتالين جۋرناليست مۇرات تەلىبەكوۆتىڭ كىتابى دەلىنەتىن «ۆەتەر س ۋليتسى» كىتابىنان ءۇزىندى جاريالايدى. سول ءۇشىن بەلسەندىلەر «الاۋىزدىقتى قوزدىردى» دەگەن ايىپقا ىلىگىپ، 2 جانە 3 جىلعا سوتتالدى. قازاقستاندىق قۇقىق قورعاۋشىلار ەكى تۇتقىندى دا «ساياسي تۇتقىندار» تىزىمىنە كىرگىزدى.

كەيىنىرەك ولار ىستەگەن ىسىنە وكىنەتىنىن ايتىپ، حات جاريالادى. اپەللياتسيالىق سوت نارىمباەۆتىڭ ۇكىمىن جەڭىلدەتىپ، ءۇش جىل شارتتى جازاعا اۋىستىردى.

2016 جىلى نارىمباەۆ بيلىك تاراپىنان وزىنە قاۋىپ تونگەنىن ايتىپ، تىيىم سالىنعانىنا قاراماستان، ەلدەن كەتەدى. 2022 جىلى ۋكراينادان ورالعان كەزدە پوليتسيا ونى الماتى اۋەجايىندا ۇستاپ اكەتتى. نارىمباەۆ بۇگىندە جازاسىنىڭ ۇشتەن ءبىرىن وتەگەن.

ول بىرنەشە رەت اشتىق اكتسياسىن جاريالاعان. جاقىندا 54 كۇن اشتىق ۇستاپ، كەزەكتەن تىس پرەزيدەنت سايلاۋ قارساڭىندا سايلاۋ ۋچاسكەلەرىندەگى حاتتامالاردى ونلاين جاريالاۋدى تالاپ ەتكەن.

Abai.kz