ءماجىلىس سپيكەرى، «AMANAT» پارتياسىنىڭ توراعاسى ەرلان قوشانوۆ «جاستار رۋحى» جاستار قاناتى ۇيىمداستىرعان ەلورداداعى ارباتتا بوس جۇمىس ورىندارى جارمەڭكەسىنە قاتىستى. ءىس-شارا ەڭبەك جانە حالىقتى الەۋمەتتىك قورعاۋ مينيسترلىگىنىڭ قولداۋىمەن ءوتتى.

مەملەكەت باسشىسى قاسىم-جومارت توقاەۆتىڭ جانە «AMANAT» پارتياسىنىڭ سايلاۋالدى باعدارلاماسىندا جاستاردى قولداۋ ماسەلەسىنە باسا ءمان بەرىلگەن. وندا 2029 جىلعا دەيىن 2,3 ميلليون جاستى جۇمىسقا ورنالاستىرۋ مىندەتى قويىلدى.

وسى ورايدا، پارتيانىڭ «جاستار رۋحى» جاستار قاناتى «جاستارعا جۇمىس» جوباسىن جۇزەگە اسىرىپ وتىر. جوبانىڭ نەگىزگى باعىتتارىنىڭ ءبىرى – بوس جۇمىس ورىندارى جارمەڭكەسىن وتكىزۋ. جارمەڭكە 10-20 شىلدە ارالىعىندا ەلىمىزدىڭ بارلىق وڭىرىندە ۇيىمداستىرىلادى.

ەرلان قوشانوۆ ەلورداداعى بوس جۇمىس ورىندارى جارمەڭكەسىنە قاتىسىپ، جاستارمەن جانە الەۋەتتى جۇمىس بەرۋشىلەرمەن اڭگىمەلەستى.

«بۇگىندە جاستار قاۋىمىن تولعاندىراتىن نەگىزگى ماسەلەنىڭ ءبىرى – جۇمىسقا ورنالاسۋ. جاستاردىڭ قالاۋى مەن الەۋەتىنە ساي كەلەتىن لايىقتى جۇمىس تابۋ وتە ماڭىزدى. بۇل ولاردىڭ ءوز قابىلەت-قارىمىن شىڭداۋدىڭ، وتباسى مەن ەلدىڭ يگىلىگى ءۇشىن ادال ەڭبەك ەتۋىنىڭ العىشارتى. «جاستارعا جۇمىس» جوباسى، مىنە وسىعان باعىتتالعان. بۇل باستاما جاستاردىڭ جۇمىس تابۋىن قولجەتىمدى، اشىق ءارى ىڭعايلى ەتەدى»، – دەدى پارتيا توراعاسى.

ەرلان قوشانوۆ پارتيا جانىنداعى جاستار قاناتىنىڭ باستى ماقساتى – مەملەكەت ۇسىناتىن مۇمكىندىكتەردى قالاي پايدالانۋعا بولاتىنىن جاستارعا تۇسىنىكتى تىلدە ساۋاتتى ءارى جان-جاقتى ءتۇسىندىرۋ ەكەنىن اتاپ ءوتتى.

«جاستارعا جۇمىس» بوس جۇمىس ورىندارى جارمەڭكەسى ءبىر تەرەزە قاعيداتى بويىنشا جۇمىس ىستەيدى. وندا ىزدەنۋشى بوس جۇمىس ورىندارىنىڭ بار-جوعىن ءبىلىپ قانا قويماي، سول جەردە قاجەتتى مالىمەت الىپ، جۇمىس جاعدايىن ناقتىلاي الادى. جارمەڭكەدە جۇمىسقا ورنالاستىرۋدان بولەك، جاستاردى الەۋمەتتىك قولداۋعا قاتىستى مەملەكەتتىك بارلىق باعدارلاما بويىنشا كەڭەس بەرىلەدى. ياعني، باسپانا الۋدان باستاپ، ەمدەلۋگە، جەكە كاسىپ باستاۋعا جانە ءبىلىم الۋعا قاتىستى باعىت-باعدار ۇسىنىلادى.

جوبا اياسىندا جىلدىق مولشەرلەمەسى 2,5%-دى قۇرايتىن نەسيەلەندىرۋ، تاۋ-كەن ونەركاسىبىندە 2 مىڭ بوس جۇمىس ورنىن قۇرۋ، جاس مامانداردى IT-داعدىسىنا ۇيرەتۋ ءۇشىن 3 مىڭ ۆاۋچەر ءبولۋ جانە تاعى باسقا باستامالار قاراستىرىلعان.

ەلورداداعى بوس جۇمىس ورىندارى جارمەڭكەسى ارباتتا – اشىق اسپان استىندا ۇيىمداستىرىلدى. بۇل – جاستار قاۋىمى كوپ جينالاتىن كورنەكتى ورىن. مەملەكەتتىك ورگاندار، كۆازيمەملەكەتتىك سەكتور جانە جەكە كومپانيالار اراسىنان 70-تەن استام جۇمىس بەرۋشى 1300-گە جۋىق جۇمىس ورنىن ۇسىندى. ولاردىڭ اراسىندا قازاگروقارجى، قازپوشتا، Samruk-Kazyna Construction, قازاقستان تەمىر جولى، سامۇرىق-ەنەرگو جانە وزگە دە كومپانيالار بار. ءىس-شاراعا 2000-نان استام ادام قاتىستى.

«جاستارعا جۇمىس» جوباسى 2023 جىلدىڭ قاڭتارىندا باستاۋ الدى. جارتى جىلدا ەل اۋماعىندا 120-دان استام بوس جۇمىس ورىندار جارمەڭكەسى ۇيىمداستىرىلىپ، وعان 90 مىڭنان استام ادام قاتىستى. ونىڭ ىشىندە، 18,6 مىڭ جاس جۇمىسقا ورنالاسۋعا جولداما الىپ ۇلگەردى. ەلىمىزدەگى 3000-نان استام ءىرى جانە شاعىن كاسىپورىندارمەن جاستاردى جۇمىسقا ورنالاستىرۋ جونىندە ۋاعدالاستىققا قول جەتكىزىلدى.

ەسكە سالا كەتەيىك، بۇعان دەيىن «AMANAT» پارتياسى ەڭبەك جانە حالىقتى الەۋمەتتىك قورعاۋ مينيسترلىگىمەن بىرگە جاستاردى ناتيجەلى جۇمىسپەن قامتۋعا باعىتتالعان «جاستارعا جۇمىس» جوباسىن جۇزەگە اسىرۋ بويىنشا بىرلەسكەن ءىس-قيمىل جوسپارىن ازىرلەگەن ەدى.

سۋرەتتى تۇسىرگەن ءالي عالىم

Abai.kz