ۇلتتىق قاۋىپسىزدىك كوميتەتىنىڭ بۇرىنعى باسشىسى كارىم ءماسىموۆ تەرروريزم مەن ەكسترەميزمدى قارجىلاندىرۋشى ادامداردىڭ قاتارىنا كىردى.

قارجى مونيتورينگى اگەنتتىگى جاسايتىن «تەرروريزم مەن ەكسترەميزمدى قارجىلاندىراتىن ۇيىمدار مەن تۇلعالاردىڭ تىزبەسىنە» ول 1 شىلدەدە ەنگىزىلگەن.

تىزىمدە ماسىموۆتەن باسقا، ونىڭ بۇرىنعى ورىنباسارلارى ءانۋار سادىقۇلوۆ پەن داۋلەت ەرعوجين دە بار.

اتالعان ۇشەۋ بيىلعى ساۋىردە 2022 جىلعى قاڭتار وقيعالارىنا بايلانىستى ۇزاق مەرزىمگە سوتتالعان. ءماسىموۆ «مەملەكەتكە وپاسىزدىق جاساۋ»، «بيلىكتى كۇشپەن باسىپ الۋ»، «بيلىك پەن لاۋازىمدىق وكىلەتتىكتەردى اسىرا پايدالانۋ» باپتارى بويىنشا 18 جىلعا باس بوستاندىعىنان ايىرىلدى. ال ونىڭ ورىنباسارلارىنا 3, 15 جانە 16 جىلعا باس بوستاندىعىنان ايىرۋ جازاسى تاعايىندالدى. ا. سادىقۇلوۆ 16 جىلعا، ەرعوجين د. 15 جىلعا، تاعى ءبىر ورىنباسارى وسيپوۆ م. 3 جىلعا سوتتالدى.

16 ماۋسىمدا قىلمىستىق ىستەر جونىندەگى اپەللياتسيالىق ساتىداعى سوت قىلمىستىق ءىستى «وتە قۇپيا» دەگەن بەلگىمەن قايتا قارادى جانە ءماسىموۆتى، سادىرقۇلوۆتى جانە ەرعوجيندى قاۋىپسىزدىگى جوعارى مەكەمەدەن قاۋىپسىزدىگى ورتاشا مەكەمەدە جازاسىن وتەۋگە اۋىستىردى.

2023 جىلعى قاڭتاردا قازاقستاننىڭ باس پروكۋرورى بەرىك اسىلوۆ «ءماسىموۆ - قاڭتار وقيعاسىنىڭ باس ۇيىمداستىرۋشىسى» دەپ مالىمدەدى.

ەكس-پرەزيدەنت نۇرسۇلتان نازارباەۆتىڭ كوپ جىلدار بويعى سەرىگى، 56 جاستاعى كارىم ءماسىموۆ 2016 جىلدىڭ قىركۇيەگىندە ۇقك توراعاسى قىزمەتىنە تاعايىندالدى. ول بۇعان دەيىن ۇكىمەت باسشىسى قىزمەتىن اتقارعان. ول ەكى رەت پرەمەر-مينيستر قىزمەتىن اتقارعان: ءبىرىنشىسى – 2007-2012 جىلدار ارالىعىندا، ەكىنشى رەت 2014 جىلدان ۇقك باسشىسى بولىپ تاعايىندالعانعا دەيىنگى ۋاقىتتا.

2022 جىلعى قازاقستانداعى جاپپاي نارازىلىقتاردان كەيىن قىزمەتىنەن بوساتىلىپ، ارتىنشا ۇستالدى.

Abai.kz