قازىر ءبارىمىز قۇلاق تۇرەتىن وقيعا ورىس-ۋكراين سوعىسى. بىراق بۇل سوعىس قىرىمداعى رەسەي قارا تەڭىز فلوتىنان باستالعانىن ەسكەرە بەرمەيمىز.

ورتا ازيادا رەسەي اسكەرى قىرعىز، تاجىك جانە قازاق جەرىندە ورنالاسقان. قازاقستاندا رەسەيلىكتەردىڭ بايقوڭىردى ەسەپكە الماعاندا، ودان بولەك ءۇش بىردەي اسكەري بازاسى بار. ولاردىڭ الىپ جاتقان اۋماعى ۋكراينانىڭ كيەۆ، جوتومير جانە ۆولىن وبلىستارىن قوسا العان كولەمدە.

ەلىمىزدەگى وسى ءۇش ايماقتا ورنالاسقان رەسەي اسكەريلەرىنىڭ نە ىستەپ، نە قويىپ جاتقانى ەشكىم بىلمەيدى. بىراق سوڭعى كەزدە قازاق جەرىندەگى رەسەيلىك اسكەريلەر قارا ارحەلوگقا اينالا باستاعانى اباي وبلىسى بويىنشا قىلاڭ بەرە باستادى.

«حابار 24» ارناسىنىڭ ءتىلشىسى  ازامات قاسىمنىڭ فب جازباسىندا: «مىنا فوتوداعى جادىگەرلەردى التىن ىزدەۋشىلەر دەگەلەڭ تاۋى (كۋرچاتوۆ) جاقتان قازىپ الىپ، «مۋزەيگە تاپسىرمايمىز، ساتامىز» دەپ بەرمەي وتىرعان كورىنەدى.

ولار دەلدالدار ارقىلى ارحەولوگ ايدىن جۋنيسحانوۆ اعامىزعا حابارلاسقان كورىنەدى. بۇل جاعدايدا نە ىستەۋگە بولادى، نە ايتاسىزدار»، - دەگەن جازبا پايدا بولىپ، شىعىس ايماقتاعى جۇرت اراسىندا قىزۋ تالقىعا ءتۇستى.

سوندا قارپايىم قازاق تۇگىل، قۇزىرلى مەكەمە قىزمەتكەرلەرى دە كىرە المايتىن رەسەي اسكەر بازالارى اۋماعىندا نە بولىپ، نە قويىپ جاتقانىن ەشكىم بىلمەيدى. سوندا تاريحي جادىگەرلەرىمىزدى توناپ جاتقان اسكەرلەرگە كىم توسقاۋىل قويادى دەگەن وي شىعىستاعى اعايىنداردى تولعاندىرا باستادى.

Abai.kz