مادەنيەت جانە سپورت ءمينيسترى اسحات ورالوۆ ۇكىمەت وتىرىسىنان كەيىن كاسىپقوي بوكسشى بەيبىت شۇمەنوۆتىڭ اينالاسىنداعى شۋعا قاتىستى تۇسىنىك بەردى.

«شۇمەنوۆ تۋرالى مىنانى ايتامىن، قازىر قۇقىق قورعاۋ ورگاندارى اينالىسىپ جاتىر. ىشكى ىستەر مينيسترلىگى پىكىر ءبىلدىرىپ تە قويدى. رەسمي قورىتىندىدان كەيىن قوسىمشا تۇسىنىك بىلدىرە الامىز. ول ءىس قازىر قۇقىقتىق الاڭدا قارالىپ جاتىر. وسىعان بايلانىستى بىرنەشە ءباسپاسوز حابارلاماسى دا شىقتى»، - دەدى اسحات ورالوۆ.

ۆەدومستۆو باسشىسى زاڭ الدىندا بۇكىل قازاقستاندىقتىڭ قۇقىعى مەن مىندەتى بىردەي ەكەنىن ەسكە سالدى.

«بۇل – قۇقىقتىق الاڭ، ءار ادام كاسىبىنە، قىزمەتىنە قاراماستان، ءوز ءسوزى مەن ارەكەتى ءۇشىن جاۋاپ بەرەدى، ونىڭ ۇستىنە جەكە ءومىرى بولسا. سوندىقتان ول ءوز ارەكەتى ءۇشىن قۇقىقتىق الاڭدا جاۋاپ بەرەدى»، - دەدى مينيستر.

«بەيبىت شۇمەنوۆكە وسى جاعدايدان كەيىن قازاقستان اۋماعىندا سپورتپەن اينالىسۋعا تىيىم سالىنا ما؟»، - دەپ سۇرادى جۋرناليست.

اسحات ورالوۆ قازىر بۇل ىسپەن قۇقىق قورعاۋ ورگاندارى اينالىسىپ جاتقاندىقتان ازىرگە كيلىگە المايتىندارىن ايتتى.

«قۇقىق قورعاۋ وراندارىنىڭ جۇمىسىنان كەيىن، قورىتىندىسى شىققاننان كەيىن پىكىر بىلدىرەيىك. سوتتىڭ ءتيىستى شەشىمى شىعادى، سودان كەيىن عانا تۇسىنىك بەرە الامىن. قازىر ءبىز كيلىگە المايمىز»، - دەدى مينيستر.

ەسكە سالايىق، سپورتشى بەيبىت شۇمەنوۆ مەملەكەتارالىق ىزدەۋگە جاريالاندى. ول بيىلعى 18 ماۋسىمدا استاناداعى «Mega Silkway» ساۋدا، ويىن-ساۋىق ورتالىعىندا قولىنا بالا ۇستاعان ەر ادامدى ۇرىپ-سوقتى دەپ ايىپتالىپ وتىر. ەلوردانىڭ پوليتسيا دەپارتامەنتى قىلمىستىق كودەكستىڭ 293-بابى (بۇزاقىلىق) بويىنشا سوتقا دەيىنگى تەرگەۋ امالدارىن جۇرگىزىپ جاتىر.

كىناسى دالەلدەنسە ول 5 جىلعا دەيىن باس بوستاندىعىنان ايىرىلۋى مۇمكىن.

بوكسشى الەۋمەتتىك جەلىدەگى پاراقشاسى ارقىلى ءوز ارەكەتىن تۇسىندىرمەك تە بولدى.

Abai.kz