الماتى قالاسىندا «Sincere System Group» (S-Group) قارجى پيراميداسىنىڭ قىزمەتى اشكەرەلەندى، دەپ حابارلايدى قارجىلىق مونيتورينگ اگەنتتىگى.

«قما الماتى قالاسى بويىنشا دەپارتامەنتى قارجى پيراميداسىن قۇرىپ، ونى باسقاردى دەگەن كۇدىكپەن «Sincere System Group» (S-Group) كومپانياسىنىڭ وكىلدەرىنە قاتىستى سوتقا دەيىنگى تەرگەۋدى باستادى.

دەپارتامەنت قىزمەتكەرلەرى بەلسەندى ازاماتتاردىڭ قاتىسۋىمەن كومپانيا قىزمەتىن ەرتە كەزەڭدە توقتاتىپ، بۇل الدانعان ينۆەستورلاردىڭ سانىن ازايتۋعا مۇمكىندىك بەردى.

S-Group كومپانياسىنىڭ وكىلدەرى سالىمشىلارعا ايىنا 6-دان 8 پايىزعا دەيىن نەمەسە جىلىنا 70 پايىزدان استام جوعارى كىرىستىلىككە ۋادە بەرگەن.

دەپوزيتتىڭ ەڭ تومەنگى سوماسى 100 دوللاردى قۇرادى. سونداي-اق وزگە سالىمشىلاردى تارتقان جاعدايدا سومانىڭ 5 پايىزى كولەمىندە كەپىلدەندىرىلگەن كىرىس قاراستىرىلعان.

بۇل رەتتە كليەنتتەرگە اقشانى قابىلداۋ فاكتىسىن راستايتىن قۇجاتتار مەن كەلىسىمدەر ۇسىنىلماعان، سالىم سوماسى جەكە كابينەتتە تسيفرلىق تۇردە كورسەتىلىپ، سالىنعان قاراجاتتى الۋ مۇمكىندىگى بولماعان. قازىرگى ۋاقىتتا سوتقا دەيىنگى تەرگەۋ امالدارى جۇرگىزىلۋدە. كۇدىكتىگە قاتىستى «قاماۋعا الۋ» تۇرىندەگى بۇلتارتپاۋ شاراسى سانكتسيالاندى»، - دەلىنگەن حابارلامادا.

قارجىلىق مونيتورينگ اگەنتتىگى «S-Group» كومپانياسىنىڭ قىزمەتىنەن زارداپ شەككەندەردى الماتى قالاسى بويىنشا ەكونوميكالىق تەرگەۋ دەپارتامەنتىنە نەمەسە قما call-ورتالىعىنا حابارلاسۋدى سۇرايدى.

Abai.kz