كەشە ەلوردادا قر پرەمەر-ءمينيستردىڭ ورىنباسارى – ساۋدا جانە ينتەگراتسيا ءمينيسترى سەرىك جۇمانعارين اۋعانستاننىڭ 210 ادامنان تۇراتىن بيزنەس-دەلەگاتسياسىن قارسى الدى. دەلەگاتسيانى اۋعانستاننىڭ ونەركاسىپ جانە ساۋدا ءمينيسترى نۋريددين ازيزي باستاپ كەلدى.

قوناقتار قاتارىندا اۋعانستاننىڭ ورتالىق بانكىنىڭ باسشىلارى، ءىرى جەكە مەنشىك بانكتەردىڭ، «دا اۋعانستان برەشنا شەركات» (DABS) ەنەرگەتيكالىق كومپانياسىنىڭ، «اۋعان تەلەكوم» (AfTel) تەلەكومۋنيكاتسيالىق كومپانياسىنىڭ، اۋىل شارۋاشىلىعى ونىمدەرى مەن مال شارۋاشىلىعى پالاتاسىنىڭ، ساۋدا-ينۆەستيتسيالىق پالاتاسىنىڭ، سونداي-اق اۋىل شارۋاشىلىعى، فارماتسەۆتيكا، ونەركاسىپ، كولىك-لوگيستيكا، ينجەنەرلىك، توقىما جانە باسقا كومپانيالاردىڭ وكىلدەرى بار.

2 تامىزدا قازاقستان جانە اۋعانستان كومپانيالارىنىڭ پرەزەنتاتسيالارى، B2B كەلىسسوزدەرى وتەدى. 3 تامىزدا بيزنەس-فورۋم جۇمىسىن باستايدى، ال 4 تامىزدا ەلوردا تۇرعىندارى مەن قوناقتارىنا اۋعان تاۋارلارىنىڭ كورمەسى (EXPO, كونگرەسس-ورتالىق) اشىلادى. كورمەدە اۋعانستاننان ءتۇرلى ازىق-تۇلىك، مىس ىدىستار، ءمارمار، كىلەمدەر، زەرگەرلىك بۇيىمدار جانە باسقا دا كوپتەگەن تاۋارلار ۇسىنىلادى.

ايتا كەتسەك، بۇعان دەيىن اۋعانستاننىڭ اكىمشىلىگى وزدەرىنىڭ ديپلوماتتارىن قر-دا اككرەديتتەۋدى سۇراعان. بۇل تۋرالى قر ءسىم رەسمي وكىلى ايبەك سمادياروۆ ايتقان بولاتىن.

«ءبىز ولاردى تىركەۋ جونىندە شەشىم قابىلدادىق. ايتا كەتەيىن، 2021 جىلدىڭ تامىزىندا بۇرىنعى رەجيم قۇلاعان سوڭ ەلدە «بيلىك ۆاكۋمى» پايدا بولدى. اۋعانستان يسلام رەسپۋبليكاسىنىڭ شەتەلدەگى ەلشىلىكتەرى بۇل مەملەكەتتىڭ اتىنان وكىلدىك ەتۋىن توقتاتتى.

ەڭ الدىمەن، پرەزيدەنتتىڭ اۋعانستاندى قازىرگى قيىندىقتارمەن جالعىز قالدىرمايتىنىمىز تۋرالى مالىمدەمەسىن ەسكە سالعىم كەلەدى. ول ءبىزدىڭ ىنتىماقتاستىعىمىزدىڭ گۋمانيتارلىق مانىنە نازار اۋداردى. ونداعى ۇننىڭ 90 پايىزى – قازاقستاندىق»، - دەدى سمادياروۆ.

ال تاياۋدا ءسىم ورىنباسارى قانات تۇمىش تاليباننىڭ ءتىپتى، تەرروريستىك ۇيىم ەمەس ەكەنىن العا تارتقان.

«ەگەر بۇل ماسەلەنى حالىقارالىق قۇقىق تۇرعىسىنان قاراستىراتىن بولساق، تاليبان تەرروريستىك ۇيىم ەمەس. ەگەر سانكتسيا رەجيمىنىڭ ەرەجەسىن نەگىزگە الساق، بۇۇ قاۋىپسىزدىك ورتالىعىنىڭ سانكتسيالار تىزىمىندە وسى قوزعالىسپەن اففيليرلەنگەن 135 مۇشە مەن تۇلعا بارىن ايتا الامىن، بۇل رەتتە ۇيىمنىڭ ءوزى بۇل تىزىمگە ەنبەگەن»، - دەدى ول.

ونىڭ ايتۋىنشا، تالىپتەر تەرروريست ەمەس، سايكەسىنشە حالىقارالىق قۇقىققا سۇيەنسەك، ولار «سانكتسيالانعان ادامدار».

تالىپتەر 2021 جىلى اۋعانستان بيلىگىن باسىپ الدى. تاليبان قوزعالىسى الەمنىڭ كوپتەگەن ەلىندە، سونىڭ ىشىندە قازاقستاندا تىيىم سالىنعان راديكالدى ۇيىم.

Abai.kz