ۋكراينا مەن رەسەي سوعىسىن توقتاتۋعا ارنالعان كەزەكتى ءبىر ساليحالى جيىن تامىزدىڭ 5-6 كۇندەرى ساۋد ارابياسىنىڭ جيددا قالاسىندا ءوتتى.

بۇل جولعى كەزدەسۋدىڭ باستى ەرەكشەلىگى باسقوسۋعا رەسەي تارابى شاقىرىلمادى. كرەمل ءباسپاسوزى: «اقش پەن ناتو وڭتۇستىك ەلدەردى وزدەرىنە تارتىپ، وداقتاس بولۋعا ازعىرىپ، ءبىزدى سىرتقا تەپتى»، - دەپ تاعى دا سول باتىستى ايىپتادى. كرەملدىڭ نارازى بولۋىنا رەسەي تارابىنىڭ شاقىرىلماۋى عانا ەمەس، الەمنىڭ 40-تان استام مەملەكەتىنىڭ وكىلدەرى قاتىسقان جيىندا كيەۆتىڭ سوعىستى شارتسىز توقتاتۋعا ۇسىنعان 10 تالابىنىڭ تالقىعا ءتۇسۋى ەدى.

سوعىستىڭ ءبىر جىل تولۋى قارساڭىندا قىتاي تارابى باس بولىپ ەرەگەسكەن ەكى ەلدى راقايلاستىرۋ ماقساتىندا «بەيبىتشىلىك كەلىسىمىن» ۇسىنعان. بەيجىڭنىڭ جوباسى رەسەي تارابىنا مايداي جاققانىمەن، امەريكا باستاعان ۋكراينانىڭ جاقتاستارى ونى «ءبىر جاقتى، كرەملدىڭ مۇدەسىن كوزدەگەن» دەپ سىنعا العان ەدى. سودان كەيىن زەلەنسكي دە قاراپ جاتپاي مارت ايىنىڭ ورتاسىندا ءوزىنىڭ سوعىستى بەيبىت توقتاتۋدىڭ 10 شارتىن تاراپتاردىڭ تالقىسىنا سالعان. وندا رەسەي باسىپ العان ءتورت وبلىس پەن قىرىمدى ۋكرايناعا قايتارىپ، شارتسىز تۇردە اسكەرىن اكەتۋ، سوعىس شىعىنىن وتەۋ سياقتى مازمۇندار قامتىلعان. ساۋد ارابيانىڭ پورت قالاسىندا وتكەن رەسەي شاقىرىلماعان جيىندا كيەۆ تارابىنىڭ جوعارىداعى ۇسىنىستارى كەڭىنەن تالقىعا ءتۇستى. جيىنعا قاتىسۋشى ەلدەر ادەتتەگىدەي بۇۇ-نىڭ وتىرىسى سياقتى رەسەيدىڭ ۋكرايناعا شاپقىنشىلىعىن ايىپتاپ، ۋكراينانىڭ تەرريتوريا تۇتاستىعىن مويىندايتىندارىن مالىمدەپ، رەسەي تارابىن سوعىستى دەرەۋ توقتاتۋعا ۇندەدى.

كەزەكتى بەيبىت ماقساتتاعى ءدۇبىرلى جيىنعا شاقىرۋسىز قالىپ، الەمنەن وقشاۋلانعان رەسەي تارابى وزدەرى بارماسا دا «التىندى ەلدەر بىرلەستىگىنە» مۇشە قىتاي، ءۇندىستان، برازيليا، وڭتۇستىك امەريكا قاتارلى وداقتاستارىنىڭ شاراعا قاتىسقانىن ۇلكەن مەدەۋ كورىپ وتىر.

كرەمل ءباسپاسوزى رەسەي جاعى جيىنعا قاتىسقان «التىندى ەلدەرمەن» كەزەكتى جيىننىڭ ناتيجەسى جايىندا كەڭ كولەمدە اڭگىمە جۇرگىزەتىنىن جاريا ەتتى. وتكەن ايدا اتالمىش وداقتىڭ كەزەكتى باسقوسۋى وتكەنى بەلگىلى. حالىقارالىق ىزدەۋدە جۇرگەن رەسەي پرەزيدەنتى پۋتين مىرزا ءارتۇرلى سىلتاۋ ايتىپ، وڭتۇستىك افريكاعا بارۋدان باس تارتقان ەدى. كەزەكتى الەمدىك تالقى جيىندى ۇيىمداستىرعان اقش بولسىن، ساۋد ارابياسى بولسىن، سول فاكتورلاردى ەسكەرىپ، رەسەي تارابىن ادەيى شەتتەتكەن، وداقتاستارىن ءوز جاعىنا شىعۋعا شىرعالاعان سياقتى. ايتىپ-ايتپاي پريگوجيننىڭ «24 ساعاتتىق اسكەري بۇلىگىنەن» كەيىن رەسەي باسشىسىنىڭ ەل ىشىندە دە، ەل سىرتىندا دا بەدەلىنىڭ كۇرت ءتۇسىپ كەتكەنى انىق. ناتو مەن اقش قانا ەمەس، وزگە دە الەم ەلدەرىنىڭ سوعىستى ءپۋتينسىز شەشۋ جولىن تاڭداۋعا مۇدەلى بولىپ وتىرعانىنا وسى جولعى كەزەكتى جيىن دا ايقىن دالەل بولدى.

ەسبول ۇسەنۇلى

Abai.kz