11 تامىزدا قازاقستاندىق جۋرناليست ساندۋعاش دۇيسەنوۆا ۇستالدى. ول «جەكە ومiرگە قولسۇقپاۋ جانە دەربەس دەرەك پەن ولاردى قورعاۋ تۋرالى زاڭنامانى بۇزۋ» (147-باپ) بابى بويىنشا ايىپتالعان. قازىر ەشقايدا كەتپەۋ تۋرالى قولحاتپەن بوساپ شىققان.

«پروتسەسسۋالدىق شارالاردان ول ەشقايدا كەتپەۋ تۋرالى قولحاتپەن بوساتىلدى. قازىر تەرگەۋ وبلىستىق دەپارتامەنت باقىلاۋىندا. ءىس بويىنشا وزگە اقپارات تەرگەۋ مۇددەسىنە وراي جاريالاۋعا جاتپايدى»، – دەپ جازىلعان پوليتسيا حابارلاماسىندا.

ساندۋعاش دۇيسەنوۆا ءوزىنىڭ ۇستالۋىن «تاپسىرىس» دەپ اتادى.

«مەنى 11 تامىز كۇنى تەرگەۋشى كەشكە 17:00-گە شاقىرعان. ويىمدا ەشتەڭە جوق، بارا سالدىم. ۇستىمنەن ارىز تۇسكەنىن ايتىپ، تەرگەۋشى سۇراقتارى بارىن جەتكىزدى. ارىز تۇسىرگەن وسىدان 1,5 جىل بۇرىن ادام ءولتىرىپ، قاشىپ جۇرگەن ادام ەكەن. سول كەزدە قىلمىسكەر تۋرالى ءوزىمنىڭ Instagram پاراقشامدا جازعان ەدىم. ەگەر بۇل ادام تۋرالى اقپارات بولىپ جاتسا، پوليتسياعا حابارلاسىڭىزدار دەگەن سارىنداعى پوست سالعانمىن. كەيىن قىزىلاعاشقا بارىپ، ۆيدەو تۇسىرگەنىم بار. قىلمىسكەر قولىندا 2 جاسار بالاسى بار ادامدى اتقان. بالا دا جارالانعان. مەنىڭ بار ايىبىم سول ادامنىڭ جەكە سايكەستەندىرۋ ءنومىرى جازىلعان قاعازدى سالۋىم عوي. ەندى تۇرمەدە وتىرعان ادام جەتىسۋ وبلىسىنىڭ پروكۋرورىنىڭ اتىنا «جەكە ومىرىمە قول سۇقتى» دەپ ارىز جازعان… بار جازىعىم ادام ولتىرگەن كىسى جازادان قۇتىلىپ كەتپەسىن، دەپ ايعاي-شۋ كوتەرگەنمىن!..بۇل - تاپسىرىس!»، – دەپ جازدى دۇيسەنوۆا.

ءجۋرناليستىڭ ەكس-ارىپتەسى سامال قابىشەۆا دا وسى نۇسقانى جاريالاعان. ونىڭ ايتۋىنشا، بولىپ جاتقان جاعداي ساندۋعاش دۇيسەنوۆانىڭ ساعىن سىندىرامىز دەگەن بەلگىسىز ازاماتتاردىڭ تىرلىگى.

«بۇل جەردە تەك ساندۋعاشقا كەك ۇستاعان ادام وسىنى پايدالانىپ، ارىز جاز دەپ باعىت بەرگەن دەپ تۇسىنەمىن. سوندىقتان ساندۋعاشتىڭ ءىسىن مەملەكەت باسشىسى تىكەلەي ءوز باقىلاۋىنا السا دەپ سۇرايمىن. قوعامداعى ادىلەتسىزدىكپەن كۇرەسىپ جۇرگەن ادام بىرەۋدىڭ كەگى ءۇشىن بۇلاي كۇيىپ كەتپەۋى كەرەك»، – دەيدى سامال قابىشەۆا.

قازاقستان جۋرناليستەر وداعىنىڭ استانا قالاسى ءبولىمىنىڭ جەتەكشىسى ءامىر حاسەنوۆ: «جاڭا قازاقستاندا جۋرناليستەردى بولماشى سەبەپپەن ۇستايدى، ال حالقىن توناعان وليگارحتار مەن شەنەۋنىكتەردى وڭاي بوستاندىققا جىبەرەدى»، – دەپ جازدى.

ساندۋعاش دۇيسەنوۆا قولحاتپەن بوساپ شىققان سوڭ، تەرگەۋ يزولياتورىندا قۇقىق قورعاۋ ورگاندارى قىزمەتكەرلەرىنىڭ قالاي قورلاعانىن ايتىپ، مالىمدەمە جاسادى.

«تەرگەۋشىنىڭ كابينەتىندە ۇلكەن كامەرا تۇرعان. سول جەردە شەشىندىردى. بۇل پوليتسيا دەپارتامەنتى باسشىسىنىڭ قويىلعان كامەراسى بولسا كەرەك. وبلىستاعى پوليتسيا باسشىسى – ەر ادام. مەنىڭ بالا-شاعام، نەمەرەلەرىم، كۇيەۋ بالالارىم بار. 55 جاستاعى ايەلمىن. بىراق سوعان قاراماستان، وسىلاي شەشىندىرىپ، قورلىق كورسەتتى. بۇل ۆيدەو باسقا جاققا تاراپ كەتپەسىنە كىم كەپىل؟ ەرتەڭ ۆيدەو تاراسا، مىنا ساندۋعاشتىڭ شەشىنىپ تاستاعانى نەسى دەپ بىرەۋ ايتۋى مۇمكىن عوي. كەيىن ناركولوگياعا، سوسىن اراق ىشكەن-ىشپەگەنىن تەكسەرەتىن بولىمگە اپاردى. ءىش كيىمدەرىمدى تارتىپ الدى. توستارتقىشسىز ەر ادامداردىڭ الدىندا جۇرۋىمە تۋرا كەلدى. ماسقارا جاعداي. مەن بىراق ايتقاندارىنىڭ ءبارىن ىستەدىم. قارسىلىق تانىتپادىم. نامىسقا تىرىستىم. ەندى ۇيگە كەلىپ، وسىنشا قورلىق كورگەنىم نامىسىما ءتيىپ جاتىر. ءسويتىپ، ۋاقىتشا ۇستاۋ يزولياتورىنا قاماۋعا الدى. جىگىتتەر ۇيالدى ما، ايتەۋىر، دۇرىس ماتراس، كورپە-توسەگىن بەردى. ال تۇنگى 00:40-تا ۇيىمە جىبەردى»، – دەيدى جۋرناليست.

جەتىسۋ وبلىسىنىڭ پوليتسياسى ساندۋعاش دۇيسەنوۆانى 8 ساعات يزولياتوردا ۇستاعان.

Abai.kz