نارازى جۇمىسشىلاردىڭ حابارلاۋىنشا، كەنشىلەردىڭ جارتىسى شاحتانىڭ ىشىندە قالعان، قالعاندارى جوعارىدا ەرەۋىلدەپ تۇر. ەرەۋىل بولىپ جاتقانىن دالەلدەيتىن ۆيدەو دا بار. كەنشىلەر 15 تالاپ قويعان.
بەلسەندىلەردىڭ ايتۋىنشا، اۋەلى ساتباەۆ قالاسىنداعى № 65 شاحتا جۇمىسى توقتاعان. مۇندا 13 تامىزدا تۇنگى اۋىسىمعا تۇسكەن جۇمىسشىلار ەرەۋىلدەپ تۇر. كەنشىلەردىڭ مالىمدەۋىنشە، قازىر نارازىلىق اكتسياسىنا كورپوراتسيانىڭ باسقا دا كاسىپورىندارىنداعى جۇمىسشىلار قوسىلىپ جاتىر. ەرەۋىلدەۋشىلەر سانى بىرنەشە جۇزگە جەتۋى مۇمكىن.
- ارىپتەستەر شاحتاداعىلاردى قولداۋ ماقساتىندا ازىق-تۇلىك جەتكىزدى. كەنشىلەردىڭ ءبارى جينالىپ جاتىر، شاحتالاردا جۇمىس توقتاپ تۇر، - دەيدى ازاتتىققا ەرەۋىلدەگى كەنشىلەردىڭ ءبىرى. ول زىنە قىسىم جاسالماس ءۇشىن اتى-ءجونىن اتاماۋدى ءوتىندى.
كەنشىلەر ەڭبەك جاعدايىن جاقسارتۋدى، ءبىر جىلدىق جۇمىستى ءبىر جارىم جىل دەپ ەسەپتەۋدى، ەسكى قۇرىلعىلاردى جاڭارتۋدى، شاحتاعا جۇمىسشى قابىلداۋ ورىندارىن اشۋدى، جۇمىس كۇشى نەگە جەتىسپەيتىنىن ءتۇسىندىرۋدى، جاقىندا قايتىس بولعان جۇمىسشى ە. ەربوسىنوۆتىڭ ۇلىن جۇمىسقا قابىلداۋدى، سىياقىلاردى ايلىققا قوسىپ ەسەپتەۋدى، دەمالىستى سوزۋدى تالاپ ەتتى.
بۇعان قوسا، جۇمىسشىلار ەرىكتى مەديتسينالىق ساقتاندىرۋ شارتتارىن قايتا قاراۋدى، كەنشى كۇنىندە "100 مىڭ تەڭگە" سىياقى تاعايىنداپ، كەنشى كۇنىن اتاپ ءوتۋدى الىپ تاستاۋدى سۇراعان.
تۇسكى ساعات 13-تە كەنشىلەر ەرەۋىلى جالعاسىپ جاتتى. ول جەرگە بيلىك پەن ورگاندار وكىلدەرى بارا جاتقانى ءمالىم بولدى.
31 شىلدەدە كومپانيا ءوزىنىڭ رەسمي پاراعىندا ءوندىرىس ناتيجەلەرى مەن بولاشاعى تۋرالى حابار تاراتتى. "قازاقمىس" كورپوراتسياسىنىڭ باس ديرەكتورى ولەك كوپىتوۆتىڭ ايتۋىنشا، 2023 جىلدىڭ العاشقى جارتىسىنداعى وندىرىستىك جوسپارلار ء"ساتتى ورىندالىپ جاتىر". كورپوراتسيانى الداعى 20 جىلدا دامىتۋ جونىندەگى ستراتەگيالىق جوسپار دايىندالىپ جاتقانى حابارلاندى.
Abai.kz
