"قازاقمىس" كورپوراتسياسى بولىپ جاتقان جاعدايدى ءتۇسىندىرىپ، كەنىشتە جۇمىس توقتاپ قالعانىن ايتتى. كومپانيا مالىمەتىنە قاراعاندا، شاحتيورلارعا مەردىگەر مەكەمەلەردىڭ قىزمەتكەرلەرى دە قوسىلعان. الايدا كومپانيا ەرەۋىلگە شىققانداردىڭ دا، توقتاپ قالعان كاسىپورىنداردىڭ دا ناقتى سانىن ايتپادى.
جۇمىسشىلاردىڭ سوزىنشە، ەرەۋىلگە جۇزدەگەن ادام شىققان. ولاردىڭ ايتۋىنشا، ەڭبەك جاعدايىنىڭ ناشارلىعىنا نارازىلىق كوپتەن بار.
شاحتالاردىڭ بىرىندە باستالعان جۇمىسشىلار نارازىلىعى الەۋمەتتىك جەلىدە ءدۇمپۋ تۋدىرىپ، ساتباەۆ وندىرىستىك الاڭىنداعى كەنىش كاسىپورىندارىنا جايىلعان. الەۋمەتتىك جەلى قولدانۋشىلار شاحتيورلار مەن مەتاللۋرگتەردىڭ زەينەت جاسىن، جۇمىسشىلاردىڭ مۇددەسىن ەسكەرە وتىرىپ، ۇجىمدىق كەلىسىمشارتتى قايتا قاراۋ ماسەلەسىن دە كوتەرگەن.
ەرەۋىلشىلەردىڭ حابارىنا قاراعاندا، ولاردىڭ ءبىر توبى شاحتادان شىقپاي، 15 تالاپ قويىپ وتىر.
ولاردىڭ نەگىزگى تالاپتارىنىڭ ىشىندە: ەڭبەك جاعدايىن جاقسارتۋ، قىزمەتكەرلەردىڭ ءبىر جىلدىق ەڭبەك ءوتىلىن ءبىر جارىم جىلعا ەسەپتەۋ، ەسكى تاۋ-كەن جابدىقتارىن كونديتسيونەرى بار جاڭاسىمەن اۋىستىرۋ، شاحتا جۇمىسشىلارىن قابىلداپ، جۇمىسشى تاپشىلىعىنىڭ سەبەبىن ءتۇسىندىرۋ، تەحنولوگيالىق اۋىسىم رازريادىن تەڭەستىرۋ، كەيبىر مامانداردى كەن قازاتىن توپتارعا قوسۋ، ەڭبەككە جارامسىز بولعاندارعا تولەنەتىن وتەماقىنى جالاقىنىڭ 29 پايىزىنان 50 پايىزعا جەتكىزۋ، تاياۋدا قازا بولعان جۇمىسشى ە.ەربوسىنوۆتىڭ ۇلىن جۇمىسقا قابىلداۋ، اقشالاي ۇستەمەاقىنىڭ ءبارىن جالاقىعا قوسۋ، تىكەلەي قازبا جۇمىستارىمەن اينالىساتىنداردىڭ ەڭبەك دەمالىسىن 48 كۇننەن 54 كۇنگە جەتكىزۋ ماسەلەلەرى بار.
ەرەۋىلشىلەر مۇنان وزگە ەرىكتى مەديتسينالىق ساقتاندىرۋ شارتىن قايتا قاراۋدى، شاحتيورلار كۇنى 100 مىڭ تەڭگە سىياقى بەرۋدى، شاحتيور كۇنىندەگى دەمالىستى الىپ تاستاۋدى تالاپ ەتىپ تۇر.
"قازاقمىس" قازاقستانداعى عانا ەمەس، الەمدەگى ەڭ ءىرى مىس ءوندىرۋشى كومپانيا سانالادى. كومپانيا قۇرامىنا گەولوگيالىق بارلاۋ مەكەمەسى، 13 كەنىش، 4 بايىتۋ كومبيناتى، ەكى مىس قورىتۋ زاۋىتى، ەكى كومىر رازرەزى جانە جىلۋ-ەنەرگەتيكا كەشەنى كىرەدى. نەگىزگى ءوندىرىس ۇلىتاۋ جانە قاراعاندى وبلىستارىنا شوعىرلانعان. كومپانيا مالىمەتىنە قاراعاندا، "قازاقمىس" كاسىپورىندارىندا 38 مىڭنان استام ادام جۇمىس ىستەيدى.
