سونىمەن، وتكەن اپتانىڭ سوڭىندا قوستانايدا كۇنى ەلىمىزدە بۇرىن-سوڭدى بولماعان ۇلان-اسىر توي ءوتتى. ول رەسمي تۇردە ءۇش كۇنگە، ال جەكسەنبىنى قوسقاندا اتتاي ءتورت كۇنگە سوزىلادى.

مۇنى ەندى، كورگەن دە ارماندا، كورمەگەن دە ارماندا. وسى ءۇش كۇندە نە بولمادى دەيسىڭ؟.. بۇل دۇركىرەگەن تويدا ەلىمىزدىڭ جانە كورشىلەس رەسەيدىڭ (بۇل بىزدە قاشاننان قالىپتاسقان ادەت قوي. ولارسىز تويدىڭ قىزىعى بولمايدى) ارتىستەرى كەلىپ، كوڭىلىمىزدى ءبىر كوتەرىپ تاستادى. سوسىن ول كۆن-شيكتەردىڭ جاپىسىنا ۇلاستى. بۇدان سوڭ نەشە ءتۇرلى كورمەلەردى كورىپ، ەركىن كۇرەستىڭ جارىسىن تاماشالادىق. ودان قالدى سۋرەتشىلەر مەن كىتاپقۇمارلاردىڭ «Open air art-2023» دەگەن ەرەكشە جارمەڭكەسى ءوتتى. كۇندىزدى كۇندەرى مۇندا جەرگىلىكتى ورىستاردىڭ ايرىقشا جاقسى كورىپ، باسىنا كوتەرەتىن دجاز مۋزىكالىق وركەسترىمەن قاتار «كارناۆال» مەن «ارتيست» انسامبلدەرى تىنىم تاپپاسا، كەشكىلىك «The Jigits»، «Tanir&Tyomsa»، «Jan Khalib» دەگەندەردىڭ قۇلاق ەسىتىپ، كوز كورمەگەن تاماشا كونتسەرتى بولدى. بۇل سالتاناتتىڭ اياعى بۇكىل قالانى اياعىنان تىك تۇرعىزعان، ادام ايتقىسىز وتشاشۋمەن اياقتالدى.

جارايدى، بۇل نە قىلعان ەلدەن ەرەكشە وقيعا دەيسىز عوي؟ ەشبىر ەرەكشەسى جوق، تەك انشەيىن «قوستاناي قالاسىنىڭ كۇنى» دەگەن كەزەكتى داتا عانا. ءتىپتى، مەرەيتويلىق تا مەرەكە ەمەس. تەك قانا ونىڭ دۇنيەگە كەلگەنىنە تۇپ-تۋرا 144 جىل تولىپتى. بۇعان ەندى نە دەرسىڭ؟!

وسىنشا شاشىلۋدىڭ قانداي قاجەتتىگى بار ەدى؟ كۇنى كەشە عانا ۇلى اباي كۇنىن دۇرىستاپ اتاپ وتۋگە جاراماعان، ءتىپتى، مۇنداي تۇلعانىڭ بار ەكەندىگىن ەسكەرمەگەن قالا باسشىلىعىنىڭ بۇل ەشبىر نەگىزسىز دارقاندىلىعىنا تاڭ قىلدىق؟

ايتپاقشى، وسى ءۇش كۇندىك ىردۋ-دىردۋعا بيۋدجەتتىڭ، ياعني، حالىقتىڭ قانشا اقشاسى جۇمسالدى ەكەن؟ ارينە، ولار بۇل تۋرالى ءتىپتى، جۇمعان اۋزىن اشپايدى.

جارايدى، حالىقتىڭ اقشاسىن قايدا جۇمسارىن بىلمەسە، ويىنا كەلگەندەرىن ىستەسىن! الايدا، قالاداعى جاڭادان سالىنعان ميكرواۋداندارداعى ساپاسى سىن كوتەرمەيتىن، جاۋىن جاۋسا توبەسىنەن سۋ كەتىپ، جۇرتتى ابىرگەرگە تۇسىرەتىن جاعدايلارعا كىم جاۋاپتى؟ ال قالا ورتالىعىنداعى باياعىدا سالىنىپ، قازىر قۇلاۋعا اينالعان ۇيلەردىڭ تۇرعىندارىنىڭ زارىن كىم ەستيدى؟ مەن بۇل جەردە ابدەن ايتىلا-ايتىلا جىر بولعان قالا مەكتەپتەرىنىڭ جەتىسپەۋشىلىگى مەن تارلىعى جايلى ءتىپتى، ءسوز قىلىپ تا وتىرعان جوقپىن.

ال كەڭەس داۋرىنەن مۇرا بولىپ قالعان، قازىر ابدەن ازىپ-توزىپ، ادام ەمدەلۋدەن قاشاتىن قالالىق اۋرۋحانى جايى ايتىلا-ايتىلا ابدەن جاۋىر بولعان تاقىرىپ. مۇنداعى ءبىر پالاتاعا ەڭ كەمى التى ادامنان جاتادى، دالىزدەرى وتە تار، قول جۋعىشتارىنا دەيىن بىردە ىستەسە، بىردە ىستەمەيدى. قالعان دۇنيەلەرىن ايتۋعا اۋىز بارمايدى.

تاعى ءبىر قىزىعى، وسى تويدىڭ وتەتىندىگىن قۋانا حابارلاعان قوستاناي وبلىستىق اقپاراتتىق چات اتتى تەلەگرامم ارناسىنىڭ وسى حابارىنىڭ استىندا وبلىسىمىزداعى مەڭدىقارا، ۇزىنكول جانە جىتىقارا اۋداندارىنىڭ حالقىنىڭ مىنە، ەكى ايدان بەرى گاز تاپشىلىعىن كورىپ وتىرعاندىعى جايلى جانايقايى جازىلىپ قالىپتى. وسىنشاما اقشالارىن قايدا قويارىن بىلمەي، ەشبىر قاجەتسىز توي-دۋمانعا شاشقانشا، مۇمكىن سونداي جاعدايى قيىن جاندارعا قول ۇشىن سوزىپ، ساۋاپقا قالار؟

ال بۇل ەندى وبلىستىڭ قوجايىنى قۇمار اقساقالوۆقا باعىتتالار ساۋال.

جايبەرگەن بولاتوۆ

Abai.kz