تاجىكستاننىڭ ماسكەۋدەگى ەلشىلىگى كولونيادان كەلگەن حاتتى تەكسەرۋ باستالعانىن حابارلادى.

كولونياداعى تاجىك ازاماتىنىڭ ازاتتىققا ايتۋىنشا، بۇل جولى ولارعا «ۆاگنەر» جەكەمەنشىك اسكەري كومپانياسىنىڭ كومانديرلەرى ەمەس، رەسەي قورعانىس مينيسترلىگىنىڭ وكىلدەرى كەلگەن. مينيسترلىك وكىلدەرىمەن كەزدەسۋ 11 تامىزدا وتكەن.

ءبىر جىل بۇرىن «ۆاگنەر» رەسەي تۇرمەلەرىندە جازاسىن وتەپ جۇرگەندەردى، سولاردىڭ ىشىندە تاجىك ازاماتتارىن دا، ۋكرايناعا قارسى سوعىسقا بارۋعا ۇگىتتەي باستادى. سودان بەرى بۇرىن رەسەيلىك تۇرمەلەردە وتىرعان جيىرما شاقتى تاجىكستاندىقتىڭ وسى سوعىستا مەرت بولعانى ءمالىم.

مەدىن قالاسىنداعى 4-كولونيادا وتىرعانداردىڭ ايتۋىنشا، 2022 جىلعى 28 تامىزدا جازاسىن وتەۋشىلەردىڭ ءبىرازىن، سولاردىڭ ىشىندە 100-دەن استام تاجىكستاندىقتى، «ۆاگنەر» اسكەر كومپانياسى سوعىسقا جىبەرگەن. سولاردىڭ دەنى باحمۋت تۇبىندەگى شايقاستا قازا بولعان.

كولونيادا وتىرعانداردىڭ ءبىرىنىڭ ايتۋىنشا، بيىل ولارعا رەسەي قورعانىس مينيسترلىگىمەن كەلىسىم-شارتقا وتىرۋعا، ودان سوڭ سوعىسقا بارۋعا ماجبۇرلەپ جاتىر.

«بىلتىر ءبىزدى ارباپ، ءتۇرلى جەڭىلدىك جاساۋعا ۋادە بەردى. اسا قاتتى ماجبۇرلەگەن جوق. بۇل جولى قالاساڭ دا، قالاماساڭ دا، جاعداي وسىنداي، سوعىسقا بارۋلارىڭ كەرەك دەپ جاتىر» دەيدى جازاسىن وتەۋشى 17 تامىزدا ازاتتىقتىڭ تاجىك قىزمەتىنە.

قاماۋدا وتىرعان تاجىكتەر جاقىندا ولاردى ۋكرايناعا سوعىسقا جىبەرۋى مۇمكىن ەكەنىن ايتىپ، تاجىكستان بيلىگىنەن اراشا سۇرادى.

«مۇنداعىلاردىڭ كوبى التى ايدان باستاپ ءبىر جىلعا دەيىنگى مەرزىممەن وتىر. ءبىز ۋكرايناداعى سوعىستا قىرىلعىمىز كەلمەيدى. ءبىز بيلىكتەن اراشا ءتۇسۋدى وتىنەمىز» دەدى جازاسىن وتەۋشىلەردىڭ ءبىرى.

رەسەيدە ۋكرايناعا قارسى سوعىسۋعا تۇرمەدەگىلەردى عانا ەمەس، ەڭبەك ميگرانتتارىن دا ۇگىتتەۋ ءجۇرىپ جاتىر.

قازىر تاجىكستاننىڭ ناقتى قانشا ازاماتى رەسەي تۇرمەلەرىندە وتىرعانى تولىق بەلگىسىز. بۇرىندارى ولاردىڭ سانى 10 مىڭعا جۋىقتايتىنى ايتىلعان. رەسەي تۇرمەلەرىنەن ۋكرايناعا سوعىسقا قانشا تاجىكستاندىق جىبەرىلگەنى تۋرالى دا مالىمەت جوق.

Abai.kz