توتەنشە جاعدايلار ءمينيسترى سىرىم ءشارىپحانوۆ قازاقستان شاحتاسىنداعى ءورتتى ءسوندىرۋ قيىنعا ءتۇسىپ جاتقانىن ايتتى. 

«شاحتاعا قاتىستى ايتساق، ول جەردە ترانسپورتەرلىك لەنتا جانعان. وسىنىڭ سالدارىنان وت سول جەردەگى كومىرگە تۇسكەن، سوندىقتان ول ۇزاق ۋاقىت بويى جانادى. ءورتتى ءسوندىرۋ قيىنعا ءتۇسىپ جاتىر. ول جەردە قۇتقارۋشىلاردىڭ تىنىس الۋىنا قيىن بولىپ تۇر جانە كورۋ مۇمكىندىگى شەكتەۋلى. ول جەردە تەمپەراتۋرا دا تىم جوعارى. شاحتادا ءورت ءسوندىرۋ وتە قيىن ەكەنىن بىلەسىزدەر. سوندىقتان ءتيىستى تەحنولوگيالاردى ەسكەرە وتىرىپ، جۇمىستى ورىنداۋ قاجەت»، - دەدى س. ءشارىپحانوۆ ۇكىمەتتە تىلشىلەر سۇراعىنا جاۋاپ بەرە وتىرىپ.

سونىمەن قاتار مينيستر ءورت ناقتى قاشان سوندىرىلەتىنىن ايتا المادى.

«بولجام ايتا المايمىز. مەنىڭ ويىمشا، جاقىن ارادا ءورتتى اۋىزدىقتايمىز»، - دەدى ۆەدومستۆو باسشىسى.

ەسكە سالساق، قاراعاندى وبلىسىنداعى «قازاقستان» شاحتاسىندا ءورت 17 تامىز كۇنى ساعات 10:05-تە تۇتاندى.

اپات كەزىندە جەر استىندا 227 كەنشى بولدى. 222 ادامدى جەر بەتىنە جەدەل كوتەرۋ مۇمكىن بولدى، سەگىزى زارداپ شەكتى.

شاحتانىڭ استىندا قالىپ قويعان بەسىنشى كەنشىنىڭ دەنەسى تابىلدى.

18 تامىزداعى جاعداي بويىنشا مەديتسينا مەكەمەلەرىندە ورتتەن زارداپ شەككەن 11 كەنشى ەم قابىلداپ جاتتى.

ەڭبەك جانە حالىقتى الەۋمەتتىك قورعاۋ مينيسترلىگى ەڭبەك جانە الەۋمەتتىك قورعاۋ كوميتەتىنىڭ توراعاسى تولەگەن وسپانقۇلوۆ ءمالىم ەتكەندەي، «قازاقستان» شاحتاسىنداعى اپات ءۇشىن جاۋاپتى تۇلعا 7 جىلعا دەيىن تۇرمەگە قامالۋى مۇمكىن.

Abai.kz