انادولى ەلىنىڭ استاناسى انكارا قالاسىندا تۇرىك رەسپۋبليكاسىنىڭ 100 جىلدىعى، تۇرىكسوي ۇيىمىنىڭ 30 جىلدىعىنا وراي قازاق حالقىنىڭ ءبىرتۋار ازاماتى، تاۋ تۇلعا دىنمۇحاممەد احمەتۇلى قوناەۆتىڭ 111 جىلدىعىنا ارنالعان «بابالار اماناتى» كىتابىنىڭ تۇساۋكەسەر شاراسى ءوتتى.

ونى تۇركياداعى قازاق ەلشىسى ەركەبۇلان ساپيەۆ، تۇرىكسوي باسشىسى سۇلتان راەۆ ۇيىمداستىردى.

شىعارماشىلىقپەن اينالىساتىن مۇعالىمدەر جانە كاسىبي سۇرەتشىلەردىڭ وزىندىك تۋىندىلارى جارىق كورگەن «بابالار اماناتى» ۇلتتىق جوباسى ءتورت تىلدە: قازاق، تۇرىك، ورىس، اعىلشىن تىلدەرىندە باسىلىپ شىقتى.

جيىندا ءسوز العان تۇرىكسوي باس حاتشىسى سۇلتان راەۆ، قازاق ەلشىلىگىنىڭ كەڭەسشىسى مەرەي مۇقاجان، رەسپۋبليكانىڭ ۇزدىك ۇستازى قاناعات كودەكوۆ، د.قوناەۆ زامانىندا قازاق تەلەۆيزياسىنىڭ ءتىلشىسى بولعان، قازاقستاننىڭ ىستانبۇلداعى العاشقى باس كونسۋلى قىزمەتىن اتقارعان، قازاقستاننىڭ ەڭبەك سىڭىرگەن قايراتكەرى ەرجان ءۋايىس د.قوناەۆ اتا تۋرالى ەستەلىكتەرمەن ءبولىستى.

«ۇلى دالا» رقب توراعاسى عابيدەن ادىلبەكۇلى جاكەي قور اتىنان ءبىر توپ قاتىسۋشىلارعا د.قوناەۆ مەدالى ءتوس بەلگىسىن تاپسىردى.

سۇلتان راەۆ مىرزا ۇستاز قاناعات كودەكوۆتى ا.بايتۇرسىنوۆ مەدالىمەن ماراپاتتادى. حالىقارالىق د.قوناەۆ قورىنىڭ القا مۇشەسى، تۇركياداعى ۋاكىلى ەرجان ءۋايىس قور پرەزيدەنتى ەلدار قوناەۆتىڭ اتىنان تۇرىكسوي باسشىسىنىڭ ورىنباسارى سايد يۋسۋپ مىرزاعا قازاق شاپانىن كيگىزدى. كەش سوڭىندا ەلشىلىك د.قوناەۆ اتامىزدىڭ رۋحىنا ارناپ اس بەردى. ەرجان ءۋايىس قۇران باعىشتادى.

قازاق TV ءتىلشىسى ايدوس ءاشىم، حابار 24 ءتىلشىسى مەرۋەرت بەينە تاسپاعا ءتۇسىرىپ، قازاقستان اۋە تولقىنىنان بەرىلدى.

انكاراداعى «كوك تۋ» قازاق مادەني ورتالىعىنىڭ ءتورايىمى ءلاززات ميزالىموگۋلىنا «ۇلى دالا» رەسپۋبليكالىق قورىنىڭ ەستەلىك مەدالى تابىستالدى.

Abai.kz