نازارباەۆتىڭ نەمەرە ءىنىسى، ۇقك توراعاسىنىڭ بۇرىنعى ورىنباسارى سامات ءابىش قۋعىن-سۇرگىننەن امان قالعان، دەپ جازادى DALA INSIDE.

جالعاندى جالپاعىنان باسقان اۋلەتتىڭ وكىلى قازىر تىنىش قانا تۇركيادا تۇرىپ جاتىر. جان-جاعى تاۋمەن قورشاعان ەگەي تەڭىزىنىڭ ەمدىك سۋىنا بالتىرىن مالىپ، كۇن نۇرىنان ءنار الۋدا.

وسى كۇنگە دەيىن بارىمتا-سىرىمتامەن تاپقان كاپيتالى وعان ۋايىم-قايىمسىز ءومىر كەشۋگە مۇمكىندىك بەرەدى.

ساماتتىڭ تۇرىك جەرىنەن تۇراق تابۋىنا پرەزيدەنت ەردوعان مەن تۇرىكتىڭ ۇلتتىق بارلاۋ قىزمەتى (Milli İstihbarat Teşkilatı، MIT) رۇقسات بەرگەن. ساماتتىڭ تۇركيادان وزگە بارار جەر، باسار تاۋى جوق دەسەك، قاتەلەسكەن بولامىز.

نازارباەۆتىڭ نەمەرە ءىنىسى امىرلىكتەردەن، سونىڭ ىشىندە دۋبايدان جىلجىمايتىن مۇلىكتىڭ بىرنەشەۋىن الىپ تاستاعان. تىقىر تاياعانىن سەزسە، الگى جاققا قاس پەن كوزدىڭ اراسىندا تايىپ تۇرادى.

ۇقك؟ «ءۇش ءارىپ» باسشىلىعى ءابىشتىڭ قايدا تۇرىپ جاتقانىن بىلمەيدى ەمەس. بىزدەگى ينسايد بويىنشا ۇقك مەن MIT ابىشكە قاتىستى ورتاق ۇيعارىمعا كەلگەن، ۇدايى اقپارات الماسىپ وتىرادى. ال «اۋلەتتىڭ شيپاسى ءبىتتى...» دەۋگە ءالى ەرتە.

وتىز جىل بويى الەمنىڭ تۇكپىر-تۇكپىرىندەگى ىقپالدى تۇلعالارمەن تىعىز كونتاكتى ورناتقان نازارباەۆ كلانى جاڭا قازاقستاننان ىعار ەمەس.

ساماتتىڭ اعاسى قايرات ساتىبالدى بىلتىرعى جىلدىڭ ناۋرىزىندا دۋبايعا قاشقالى تۇرعان جەردە قۇرىقتالعان. قازىر ول وسكەمەندەگى تۇرمەدە جاتىر. ۇقك-ءنىڭ ەكس توراعاسى ءماسىموۆ تە وسى جەردە جازاسىن وتەۋدە.

Abai.kz