"دەمپارتيا" وكىلدەرى الماتى اكىمى ەربولات دوساەۆتىڭ ناۋرىزباي اۋدانى تۇرعىندارىمەن كەزدەسۋىنە قاتىسپاق بولعان. جيىن قالقامان-2 شاعىن اۋدانىنداعى №208 مەكتەپ-گيمنازيا عيماراتىندا وتەدى دەپ حابارلانعان. ينگا يمانبايدىڭ ايتۋىنشا، پوليتسيا بەلسەندىلەر كولىكتەن تۇسكەندە كۇشپەن ۇستاپ، ناۋرىزباي اۋداندىق ىشكى ىستەر باسقارماسىنا الىپ كەتكەن.
"بۇعان دەيىن دوساەۆتىڭ الاتاۋ اۋدانى تۇرعىندارىمەن كەزدەسۋىندە ارۋجان دۇيسەباەۆا اكىم وتستاۆكاسىن تالاپ ەتكەن پەتيتسيا تۋرالى سۇراق قويىپ، "ونداعان مىڭ ادام ءسىزدىڭ اكىم بولعانىڭىزدى قالامايدى" دەدى. ەندى ناۋرىزباي اۋدانى تۇرعىندارىمەن كەزدەسۋى الدىندا ۇستاپ اكەتتى. دوساەۆ سىندى، پىكىردى، بەتىنە ايتقان ادامدى كوتەرە المادى. [بەلسەندىلەر] دوساەۆتىڭ تاپسىرىسىمەن قاماۋعا الىندى دەپ ويلايمىن" دەدى ينگا يمانباي ازاتتىققا.
ارۋجان دۇيسەباەۆا ىشكى ىستەر باسقارماسىنا الىپ بارا جاتقان كولىك ىشىندە ۆيدەو ءتۇسىرىپ، پوليتسيا ۇستاعان ساتتە جاراقات العانىن ايتادى.
ناۋرىزباي اۋدانى پوليتسيا باسقارماسى بەلسەندىلەر تۋرالى ازاتتىققا "اقپارات بەرە المايمىز، ءالى الىپ كەلگەن جوق" دەدى. ال ينگا يمانباي بەلسەندى ارۋجان دۇيسەباەۆا مەن ونىڭ ادۆوكاتى جالعاس ساپارحانوۆا پوليتسيا عيماراتى ىشىندە ەكەنىن ايتتى.
26 شىلدەدە الماتى اكىمى ەربولات دوساەۆ الاتاۋ اۋدانى تۇرعىندارىمەن كەزدەسۋ وتكىزدى. كەزدەسۋگە كەلگەن جۇرتتىڭ اراسىندا بەلسەندى ارۋجان دۇيسەباەۆا اكىمنىڭ وتستاۆكاعا كەتۋىن تالاپ ەتكەن پەتيتسيا تۋرالى سۇراق قويدى. دوساەۆ سول كەزدە "اكىم رەتىندە ءسىزدىڭ پىكىرىڭىز مەن ءۇشىن ماڭىزدى شىعار. بىراق جۇمىسىم تۋرالى شەشىمدى مەنى بۇل قىزمەتكە تاعايىنداعان مەملەكەت باسشىسى شىعارادى" دەپ جاۋاپ بەرگەن. اكىمنىڭ وتستاۆكاعا كەتۋىن تالاپ ەتەتىندەر دوساەۆ كەلگەلى قالادا زاڭسىز قۇرىلىس كوبەيگەنىن، جوندەۋدى قاجەت ەتپەيتىن جولدار قايتا كۇرەلىپ جاتقانىن ايتتى.
13 شىلدەدە اكىمگە سۇراق قويۋعا تالپىنعان ازاتتىق ءتىلشىسى دە كەدەرگىگە تاپ بولعان. الماتىدا الەكساندر نەۆسكي ەسكەرتكىشىن اشۋعا كەلگەن ەربولات دوساەۆقا ازاتتىق ءتىلشىسى مەيىرىم باقىتجان سۇراق قويماق بولعان كەزدە ءجۋرناليستى ءبىر توپ ەر ازامات قۇرساۋعا الىپ، كۇشتەپ ۇستاپ تۇرعان. ولار ءجۋرناليستى اكىم كولىگىنە وتىرىپ كەتكەندە عانا بوساتقان.
Abai.kz
