بۇگىن، 2023 جىلى 20 قىركۇيەكتە قر پارلامەنتى ءماجىلىسى الەۋمەتتىك-مادەني دامۋ كوميتەتىنە ەلىمىزدەگى ەرەكشە قورعالاتىن تابيعي اۋماقتار تۋرالى زاڭعا وزگەرىستەر ەنگىزبەكشى بولىپ جۇرگەن  سەناتورلاردىڭ زاڭ جوباسى دە جەتتى...

بۇل زاڭ جوباسى تۋرالى بۇعان دەيىن  ءماجىلىس دەپۋتاتتارى  ابزال قۇسپان مەن باقىتجان بازاربەك  فەيسبۋك پاراقشالارىندا كوتەرگەن ەدى.

قر پارلامەنتى سەناتى دەپۋتاتى و.بۋلاۆكينا «قر كەيبىر زاڭنامالىق اكتىلەرىنە ورمان شارۋاشىلىعى جانە ەرەكشە قورعالاتىن تابيعي اۋماقتار ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى تۋرالى كوميتەت وتىرىسىندا بايانداما جاسادى.

الەۋمەتتىك-مادەني دامۋ كوميتەتى توراعاسى اسحات ايماعامبەتوۆ  بىردەن بۇل زاڭنىڭ قوعامدا قارسىلىققا ۇشىراعانى تۋرالى ايتىپ، بايانداماشى سەناتوردان بۇل جاعدايعا تۇسىنىكتەمە بەرۋدى سۇرادى.

سەنات دەپۋتاتى و.بۋلاۆكينانىڭ جاۋابى ەشكىمدى قاناعاتاندىرا قويمادى.  ءبىز دە بىردەن بۇل زاڭ جوباسىنا قارسىلىعىمىزدى ءبىلدىرىپ، ءسوز سويلەدىك.

قر پارلامەنتى ءماجىلىسى دەپۋتاتى، “اق جول” فراكتسياسى مۇشەسى قازىبەك يسا:

– سەناتور حانىم، ولگا الەكساندرقىزى ءسىزدىڭ بۇل ۇسىنىپ وتىرعان «قر كەيبىر زاڭنامالىق اكتىلەرىنە ورمان شارۋاشىلىعى جانە ەرەكشە قورعالاتىن تابيعي اۋماقتار ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباڭىز بۇعان دەيىن قانشا كوميتەتتەن وتپەي قالعانىن ءبىز جاقسى بىلەمىز. بۇل  زاڭعا زاڭناما كوميتەتىنىڭ ءوزى قارسى بولدى، الەۋمەتتىك جەلىدە دە قارسىلىققا ۇشىراۋدا. ەندى ءبىزدىڭ كوميتەتكە الىپ كەلىپسىزدەر!؟.

بىرىنشىدەن، بۇل ۇيلەردىڭ، اسىرەسە، الماتى قالاسى مەن الماتى وبلىسىنداعى «ىلە الاتاۋى» ەرەكشە قورعالاتىن تابيعي اۋماقتاعى ۇيلەردىڭ ءبارىن  باياعىدا وليگارحتار ساتىپ العان جانە وزدەرى زاڭسىز ءزاۋلىم ۇيلەر سالىپ تاستاعان. ولار ەندى تەك زاڭداستىرۋدى كۇتىپ وتىر.

ەكىنشىدەن، ۇكىمەتكە زاڭ جۇزىندە بۇل قۇقىقتى بەرسەك، ونى كەيىن  باقىلاۋ مۇمكىن بولماي قالادى، ۇكىمەت قاۋلى شىعارعاندا ماجىلىسكە كەلمەيدى. ال زاڭدا وسى اتالعان ادامدارعا عانا قۇقىق بەرىپ (تىزىمدەگى ءۇي يەلەرى) باسقالارعا  بەرمەي، شەكتەۋ قويا المايمىز. ۇكىمەتكە كەرەك پە، سول 100 شاقتى ءۇيدى كوشىرىپ السىن! تەك ەرەكشە قورعالاتىن تابيعي اۋماققا ءتيىسۋشى بولماسىن، قول سۇقپاسىن!

سوندىقتان، بۇل زاڭ جوباسىنان جەكە مۇددەلەردىڭ ءلوببيى بايقالادى دەپ كۇماندانامىز.

قۇرمەتتى دەپۋتاتتار، بۇل زاڭ جوباسىنا قارسى بولۋدى، تەرىس  قورىتىندى شىعارىپ،  قابىلداماۋدى ۇسىنامىن، دەپ،  بۇل زاڭ جوباسىن قابىلداماۋعا شاقىردىق.

ءسوز سويلەگەن ءماجىلىس دەپۋتاتتارى ە.سايروۆ، ە.بەيسەنباەۆ، ق.بەكسۇلتانوۆتار دا بۇل كۇماندى زاڭ جوباسىنا قارسىلىقتارىن ءبىلدىردى.

سەناتور و.بۋلاۆكينانىڭ دا، ەكولوگيا ءبىرىنشى ۆيتسە-ءمينيسترى ن.شاربيەۆ پەن ورمان شارۋاشىلىعى كوميتەتى توراعاسى م.ا. د.تۇرعامباەۆتىڭ دا جاۋاپتارى سەنىمسىز بولىپ، كوڭىل كونشىتپەدى.

ءماجىلىستىڭ الەۋمەتتىك-مادەني دامۋ كوميتەتى دەپۋتاتتارىنىڭ ءبىراۋىزدان قارسى داۋىس بەرۋى ناتيجەسىندە ەرەكشە قورعالاتىن تابيعي اۋماقتار تۋرالى زاڭعا وزگەرىستەر ەنگىزبەكشى بولىپ جۇرگەن زاڭ جوباسى قابىلدانباي قالدى.

بۇل زاڭ جوباسى ەندى قاي جەردەن شىعاتىنىن ءبىر قۇداي ءبىلسىن؟!

قازىبەك يسا

قر پارلامەنتى ءماجىلىسى  دەپۋتاتى

Abai.kz