قازاقستان مۇسىلماندارى ءدىني باسقارماسىنىڭ نازارىنا!

قازاقستان مۇسىلماندارى ءدىني باسقارماسىنىڭ نازارىنا!

الماتى قالاسىنىڭ ىرگەسىندە ورنالاسقان، الماتى وبلىسىنا قاراستى ىلە اۋدانى، بورالداي ەلدىمەكەنىندەگى ۆودنيك ىقشام اۋدانىنىڭ تۇرعىندارى قاتتى قورلىق كورىپ وتىر.  ۆودنيك ەلدىمەكەنىندە سالىنعانىنا ون شاقتى جىل بولعان ۇلكەن مەشىت بار، مۇندا ورازا ۇستاپ، ناماز وقيتىن مۇسىلمان ەرەكشە كوپ. جۇما نامازىنا جينالعان جاماعاتتىڭ ءوزى ەكى ۇلكەن بولمەگە سىيماي قالادى. وكىنىشتىسى، مۇنداعى مۇسىلمانداردىڭ قۇقى بۇزىلىپ  قورلانعالى ءبىراز جىل بولعان. ءار جىلى قاسيەتتى رامازان ايى كەلىسىمەن،  ۆودنيكتەگى ەڭ ۇلكەن ماسەلە سۋدان تۋىندايدى. ۆودنيك-1, ۆودنيك-2, ۆودنيك-3 دەپ اتالاتىن مولتەك اۋدانداردا كوپ قاباتتى ۇيلەردەن باستاپ،  جەر ۇيلەرگە سۋ بەرۋ رامازان ايىندا ماقساتتى تۇردە توقتاتىلادى.  ورازا تۇتقان مۇسىلمان بالاسى تاڭعى استى دايىندايتىن مەزگىلدە، ياعني، تاڭعى سارەسىنىڭ ۋاقىتىندا، تاھارات الىپ، عۇسىل قۇيىنىپ، جۋىناتىن كەزدە، تۇنگى ساعات 1:00 مولشەرىنەن سۋ توقتاتىلعاننان باستاپ، كۇن شىققانعا دەيىن سۋ بەرىلمەيدى.  ەڭ سوراقىسى، مۇندا بىرنەشە جىلدان بەرى ءار جۇما كۇنى جۇما نامازىنان بۇرىن، مىندەتتى تۇردە سۋ توقتاتىلادى. مۇنداي قۇبىلىس ماقساتتى تۇردە جاسالىناتىنىن مۇنداعى جۇرتتىڭ بارلىعى بىلەدى. جۇما نامازى اياقتالعاندا سۋ بەرىلەدى. مۇنداعى مۇسىلمان جاماعاتى ءۇشىن بۇل ۇيرەنشىكتى جايت. ولار ءار جىلى قادىر ءتۇنى كەلەردە، سۋ سالاسىن ۇستاپ وتىرعان وتانداستارىمىزعا جالىنىپ، جالبارىنۋمەن كەلەدى. ەڭ "قىزقىتىسى", جۇمادان باسقا كۇندەردىڭ ەشقايسىسىندا كۇندىز سۋ بەرۋ توقتاتىلمايدى. رامازان ايىنان باسقا ايلاردىڭ ەشقايسىسىندا ءتۇن ورتاسىنان تاڭ اتقانعا دەيىن سۋ توقتاماي اعىپ تۇرادى. تاعى ءبىر "عاجابى", مۇنداعى «سۋ قۇدايلارى» قمدب تاراتقان ورازا-ناماز كەستەسىنە قاراپ وتىرىپ، ءبىر مينۋت-ءبىر سەكۋند ارى-بەرى  قالت جىبەرمەي، "قاتەلەسپەي" سۋدى بەرىپ جانە توقتاتىپ وتىرادى. ءار جۇما كۇنى كۇندىز  مىندەتتى تۇردە توقتاتىلاتىن سۋ جۇما نامازى اياقتالعاندا اۆتوماتى تۇردە قوسىلادى. دەمەك، جۇما نامازىنا عۇسىل قۇيىنىپ باراتىن مۇسىلماندار عۇسىل قۇيىنا المايدى. مەشىتتەگى جاماعات "سارى اعاشپەن" تاھارات العان كەزدەرى دە بولعان. رامازان ايى اياقتالىسىمەن سۋدىڭ توقتاۋى دا اياقتالىپ، 24  ساعات ءۇزىلىسسىز سۋ بەرىلەدى.

وسى قىساسقا، وسى قورلىققا توقتاۋ بار ما؟

مىنە، قادىر تۇنىندە تاعى دا قۇبىرداعى سۋدىڭ «قۇدايلارى» جۋاس قازاقتارعا «قارىنىمنىڭ اشقانىنا ەمەس، قادىرىمنىڭ قاشقانىنا جىلايمىن» دەگەن ءسوزىن قايىرا ەسىنە سالدى.

ەلدىڭ، جەردىڭ، مەملەكەتتىڭ يەسىن قورلاعاندا دا، تۋرا وسىنداي قورلاۋعا بولا ما ەكەن؟

Abai.kz