بۇگىن استانا قالاسى، بەيبىتشىلىك جانە كەلىسىم سارايىندا الەمدىك جانە ءداستۇرلى دىندەر ليدەرلەرى سەزى حاتشىلىعىنىڭ XXI وتىرىسى ءوتىپ جاتىر.  وتىرىس توراعاسى – قازاقستان رەسپۋبليكاسى پارلامەنتى سەناتىنىڭ توراعاسى، الەمدىك جانە ءداستۇرلى دىندەر ليدەرلەرى سەزى حاتشىلىعىنىڭ باسشىسى ماۋلەن اشىمباەۆ.

وسىعان وراي اتالمىش جيىنعا 22 ەلدەن 28 دەلەگاتسيا كەلدى. ولار حاتشىلىق وتىرىسى اياسىندا ءVIى الەمدىك جانە ءداستۇرلى دىندەر ليدەرلەرى سەزىنىڭ قورىتىندىلارى بويىنشا پىكىر الماسىپ، 2023-2033 جىلدارعا ارنالعان دامۋ تۇجىرىمداماسىن تالقىلاماق.

جيىن باسىندا ماۋلەن اشىمباەۆ پرەزيدەنت قاسىم-جومارت توقاەۆتىڭ جيىنعا قاتىسۋشى الەمدىك دىندەر كوشباسشىلارىنا ارناعان ارنايى قۇتتىقتاۋىن وقىپ بەردى.

«بارشاڭىزدى الەمدىك جانە ءداستۇرلى دىندەر ليدەرلەرى سەزى حاتشىلىعىنىڭ 21-ءشى وتىرىسىنىڭ اشىلۋىمەن شىن جۇرەكتەن قۇتتىقتايمىن. بۇل باستاما قىسقا ۋاقىت ىشىندە ءوزىنىڭ وزەكتىلىگىن دالەلدەپ، وركەنيەتارالىق ديالوگتىڭ ماڭىزدى الاڭىنا اينالدى. فورۋم دىندەر اراسىنداعى دوستىق پەن كەلىسىمدى نىعايتۋعا، بۇكىل ادامزاتتىڭ وزەكتى ماسەلەلەرىن شەشۋگە جانە توزىمدىلىكتى ناسيحاتتاۋعا ارقاشان ءوز ۇلەسىن قوسىپ كەلەدى»، - دەلىنگەن قۇتتىقتاۋدا.

مەملەكەت باسشىسى بۇگىنگى تاڭدا گەوساياسي جاعداي ۋشىعىپ تۇرعانىن، تۇس-تۇستان تونەتىن قاۋىپ-قاتەرلەردىڭ كۇشەيىپ كەلە جاتقانىن ايتا كەلە، حالىقارالىق قاۋىپسىزدىكتىڭ جاڭا جۇيەسىن قالىپتاستىرۋ كەرەك ەكەنىنە توقتالدى. ول ءۇشىن بەيبىتشىلىككە شاقىراتىن دۇنيەجۇزىلىك قوزعالىس قاجەت ەكەنىن جانە اتالعان ماسەلەلەردى شەشۋگە رۋحاني كوشباسشىلار ۇلكەن ۇلەس قوسىپ جاتقانىن جەتكىزدى پرەزيدەنت.

قاسىم-جومارت توقاەۆ قۇتتىقتاۋ-ءسوزىن: «وسى ماقساتتا حاتشىلىق سەزدىڭ وتىرىسى ۇيىمداستىرىلادى. قازاقستان ارقاشان دىنارالىق جانە كونفەسسياارالىق ىنتىماقتاستىقتى قولدايدى. الەمدىك جانە ءداستۇرلى دىندەر سەزى حاتشىلىعىنىڭ 21-ءشى وتىرىسىنىڭ بارلىق جەتەكشىلەرىنە جەمىستى جۇمىس تىلەيمىن»، - دەپ قورىتىندىلاعان.

ايتا كەتەيىك، الەمدە كەيىنگى جىلدارى ەلارالىق سوعىس ءورتى ءورشىپ تۇر. رەسەي-ۋكراينا، ارمەنيا-ءازىربايجان، پالەستينا-يزرايل اراسىندا بولعان، بولىپ جاتقان قاقتىعىستارعا دۇنيەجۇزى جۇرتشىلىعى الاڭداپ وتىر. الەمدىك جانە ءداستۇرلى دىندەر ليدەرلەرى سەزى حاتشىلىعىنىڭ XXI وتىرىسىنا ءازىربايجان، پالەستينا، يزرايل ەلدەرىنىڭ دەلەگاتسيالارى دا كەلدى.

امان مامبەتالى، ساياساتتانۋشى:

- الەمدىك جانە ءداستۇرلى دىندەر كوشباسشىلارى سەزى - ءبىز ءۇشىن وتە ماڭىزدى شارا. قازاقستاننىڭ ينيتسياتيۆاسى بويىنشا بيىل 21- سەسسياسى وتۋدە. بۇل باسقوسۋداعى ەڭ وزەكتىسى -كوممۋنيكاتسيا مەن اشىقتىق دەر ەدىم. دۇنيە جۇزىندەگى ءار قوعام سەگمەنتىنىڭ وكىلدەرى كەلىپ، اشىق تۇردە ءوز كوزقاراستارىن بىلدىرەدى. مىسالى ءدال قازىرگى جاعدايدا، دۇنيە جۇزىندەگى ترانسفورماتسيا مەن قيىن قاقتىعىستار بولىپ جاتقان كەزدە، اسىرەسە ءدىن پلاتفورماسىندا قايشىلىقتار ءجۇرىپ جاتقان ۋاقىتتا قازاقستان مەملەكەتىنىڭ استانا قالاسىندا، ەۋرازيا كونتينەنتىنىڭ ءدال ورتاسىندا وسى ماسەلەلەردىڭ تالقىلانۋى تەگىن ەمەس. بۇل تۇتاس قوعامعا، دۇنيە جۇزىندەگى قوعام مەن ءاربىر ازاماتقا اشىق تۇردە جەتكىزىلەتىن مەسسەندج. ءبىز ءبارىمىز قارۋسىز، زاڭ شەڭبەرىنەن شىقپاي، بەيبىت تۇردە اڭگىمە ارقىلى سويلەسىپ ءار كونفليكتىنى شەشە الاتىنداي مۇمكىندىككە يەمىز. ءداستۇرلى ءدىن وكىلدەرى سەزىنىڭ ەكىنشى  فۋنكتسياسى بۇل بولاشاقتا ءبىر-بىرىمەن اشىق سويلەسىپ كوممۋنيكاتسيا كوپىرى ارقىلى بولاشاقتا بۇل كونفليكتىلەردىڭ بولۋىنا جول بەرمەۋ. سەزگە كەلگەن  ءدىن كوشباسشىلارى ءوز كوزىمەن كورگەن، تالقىلاعىن دۇنيەلەردى ءوز قوعامىنا جەتكىزە الادى. دۇنيە جۇزىندەگى ۋشىعىپ تۇرعان دۇنيەلەردى قازاقستان قاشاما جىلدان بەرى بەيبىتشىلىكتىڭ ساياسي  ديپلوماتياسىن ناسيحاتتاۋ جولىن كورسەتىپ كەلەدى. سوندىقتان دا بۇل سەزد ۇلكەن ماڭىزعا يە دەپ ويلايمىن.

Abai.kz