قىتاي ساپارى: پرەزيدەنت كىمدەرمەن كەزدەستى، قانداي شارالارعا قاتىستى؟
![](https://abai.kz/content/uploads/2023/10/ukpukp-2.jpg)
كەشە، قازان ايىنىڭ 16-سى كۇنى، پرەزيدەنت قاسىم-جومارت توقاەۆ قىتاي حالىق رەسپۋبليكاسىنا رەسمي ساپارمەن باردى. اقوردا تاراتقان اقپاراتقا سۇيەنسەك، ساپار ەكى كۇنگە سوزىلماق.
سونىمەن، مەملەكەت باسشىسى قىتايدا نە ىستەپ ءجۇر، ءدال وسى ساتكە دەيىن كىمدەرمەن كەلىسسوز جۇرگىزىپ، قانداي شارالارعا قاتىستى؟ ءبىز قولدا بار دەرەكتەرگە شولۋ جاساپ كورەلىك.
پرەزيدەنت قاسىم-جومارت توقاەۆ بۇگىن، ياعني قازان ايىنىڭ 17-ءسى كۇنى، قحر توراعاسى سي تسزينپينمەن كەلىسسوز جۇرگىزدى.
قاسىم-جومارت كەمەلۇلى ءسوز باسىندا سي ءتسزينپيننىڭ «ءبىر بەلدەۋ، ءبىر جول» حالىقارالىق ىنتىماقتاستىعىنىڭ III فورۋمىنا قاتىسۋعا شاقىرۋىن زور ىقىلاسپەن قابىل الىپ, قىتايعا تاعى دا ساپارمەن كەلگەنىن اتاپ ءوتتى.
پرەزيدەنت جان-جاقتى ءارى ماڭگىلىك ستراتەگيالىق سەرىكتەستىككە نەگىزدەلگەن قازاق-قىتاي قاتىناستارى قارقىندى دامىپ كەلە جاتقانىنا نازار اۋداردى.
«ءبىز بارلىق باعىت بويىنشا ءتيىمدى مەملەكەتارالىق ىقپالداستىقتى جولعا قويدىق. ءسىزدىڭ بىلتىر قىركۇيەك ايىندا قازاقستانعا جاساعان مەملەكەتتىك ساپارىڭىز ءوزارا بايلانىستاردىڭ بارىنشا نىعايۋىنا تىڭ سەرپىن بەردى. ساپار اياسىندا ەلدەرىمىز اراسىنداعى ىنتىماقتاستىقتىڭ جاڭا «التىن 30 جىلدىعى» باستالدى. مەملەكەتتەرىمىز اراسىنداعى ساۋدا-ساتتىق تابىستى دامىپ كەلەدى. ايتارلىقتاي ءوسىم بار. ينۆەستيتسيانىڭ جالپى كولەمى 21 ميلليارد دوللار بولاتىن 52 بىرلەسكەن جوبا جۇزەگە اسىرىلىپ جاتىر. 2024 جىل قىتايدا قازاقستان ءتۋريزمى جىلى بولىپ جاريالاندى. بۇل وسى سالا ءۇشىن مول مۇمكىندىكتەرگە جول اشادى. ءوزارا مادەني-گۋمانيتارلىق بايلانىستار ءۇشىن قولايلى جاعداي جاسالۋدا. مەملەكەتارالىق قارىم-قاتىناستاردى مۇلدەم جاڭا دەڭگەيگە شىعارۋ ءۇشىن قازاقستاننىڭ دا، قىتايدىڭ دا وراسان زور الەۋەتى بار دەپ سانايمىن. وسى مۇمكىندىكتى پايدالانىپ، قۇرمەتتى توراعا سي تسزينپين، ءسىزدى كەلەسى جىلى قازاقستانعا مەملەكەتتىك ساپارمەن كەلۋگە شاقىرامىن», – دەدى قاسىم-جومارت توقاەۆ.
قحر توراعاسى شاقىرۋىن قابىل العانى ءۇشىن مەملەكەت باسشىسىنا العىس ايتىپ، ءوزارا ءتيىمدى ىنتىماقتاستىقتى نىعايتۋ ماڭىزدى ەكەنىن اتاپ ءوتتى.
كەلىسسوز بارىسىندا تاراپتار ساۋدا-ەكونوميكا، مۇناي-گاز، مۇناي حيمياسى، ەنەرگەتيكا، قارجى، كولىك-ترانزيت، اتوم ونەركاسىبى، ماشينا جاساۋ، تۋريزم، ەلەكتروندى كوممەرتسيا جانە جوعارى تەحنولوگيا سالالارىنداعى جان-جاقتى ىقپالداستىقتى دامىتۋ ماسەلەلەرىن تالقىلادى. مەملەكەتتەر باسشىلارى بىرلەسكەن ينۆەستيتسيالىق جوبالاردى جۇزەگە اسىرۋ، سونداي-اق مادەنيەتارالىق بايلانىستارعا جاعداي جاساۋ ماڭىزدى ەكەنىنە نازار اۋداردى.
بۇدان بولەك، مەملەكەتتەر باسشىلارى حالىقارالىق جانە وڭىرلىك كۇن تارتىبىندەگى وزەكتى ماسەلەلەر جونىندە پىكىر الماستى.
قاسىم-جومارت توقاەۆ پەن سي ءتسزينپيننىڭ كەلىسسوزى ناتيجەسىندە ەكى ەلدىڭ دەلەگاتسيا مۇشەلەرى مىناداي قۇجاتتارعا قول قويدى:
1. قازاقستان رەسپۋبليكاسى ستراتەگيالىق جوسپارلاۋ جانە
رەفورمالار اگەنتتىگى مەن قىتاي حالىق رەسپۋبليكاسى دامۋ جانە رەفورمالار جونىندەگى مەملەكەتتىك كوميتەتى اراسىنداعى ەكونوميكالىق دامۋ سالاسىنداعى الماسۋ جانە ىنتىماقتاستىق جونىندەگى ءوزارا تۇسىنىستىك تۋرالى مەموراندۋم;
2. قازاقستان رەسپۋبليكاسى ۇكىمەتى مەن قىتاي حالىق رەسپۋبليكاسى ۇكىمەتى اراسىنداعى ترانسكاسپي حالىقارالىق كولىك باعىتىن، ونىڭ ىشىندە قىتاي-ەۋروپا قاتىناسىنداعى كونتەينەرلىك پويىزدار ءۇشىن دامىتۋ جونىندەگى كەلىسىم;
3. قازاقستان رەسپۋبليكاسى كولىك مينيسترلىگى مەن قىتاي حالىق رەسپۋبليكاسى دامۋ جانە رەفورمالار جونىندەگى مەملەكەتتىك كوميتەتى اراسىنداعى «تاچەن – اياگوز» تەمىرجولىن سالۋ جوباسى بويىنشا ىنتىماقتاستىقتى بىرلەسىپ دامىتۋ جونىندەگى ءوزارا تۇسىنىستىك تۋرالى مەموراندۋم;
4. قازاقستان رەسپۋبليكاسى ۇكىمەتى مەن قىتاي حالىق رەسپۋبليكاسى ۇكىمەتى اراسىنداعى ترانسكاسپي حالىقارالىق كولىك باعىتىن دامىتۋ جونىندەگى كەلىسىم;
5. قازاقستان رەسپۋبليكاسى اۋىل شارۋاشىلىعى مينيسترلىگى مەن قىتاي حالىق رەسپۋبليكاسى باس كەدەن باسقارماسى اراسىنداعى قازاقستان رەسپۋبليكاسىنان قىتاي حالىق رەسپۋبليكاسىنا راپستى ەكسپورتتاۋ كەزىندەگى فيتوسانيتاريالىق تالاپتار تۋرالى حاتتاما.
قاسىم-جومارت كەمەلۇلى سي تسزينپينمەن كەلىسسوز جۇرگىزگەننەن كەيىن ءوزى ءبىلىم العان بەيجىڭ ءتىل جانە مادەنيەت ۋنيۆەرسيتەتىنىڭ اۋماعىندا ورتا عاسىرلىق فيلوسوف، عالىم ءابۋ ناسىر ءال-فارابيگە ارنالعان ءبيۋستتى سالتاناتتى تۇردە اشۋ راسىمىنە قاتىستى.
اشىلۋ راسىمىنە قحر ءبىلىم ءمينيسترىنىڭ ورىنباسارى ۆان گۋانيان, ۋنيۆەرسيتەتتىڭ پارتيا كوميتەتىنىڭ حاتشىسى ني حايدۋن, رەكتورى دۋان پەن جانە مەملەكەت باسشىسىنا ساباق بەرگەن ۋنيۆەرسيتەت پروفەسسورى ليۋ شيتسين, سونداي-اق قحر مەملەكەتتىك ونەر مۇراجايىنىڭ ديرەكتورى، ءمۇسىن اۆتورى ۋ ۆەيشان قاتىستى.
مەملەكەت باسشىسى، ەڭ الدىمەن، ءال-ءفارابيدىڭ الەمدىك وركەنيەتكە قوسقان زور ۇلەسىنە ايرىقشا توقتالىپ، ەنتسيكلوپەديالىق دەڭگەيدەگى، ياعني جان-جاقتى ءبىلىمى بار ءال-ءفارابيدى زامانداستارى اريستوتەلدەن كەيىنگى «ەكىنشى ۇستاز» دەپ اتاعانىنا نازار اۋداردى.
پرەزيدەنت عۇلاما عالىمنىڭ ەڭبەكتەرى ءاردايىم وزەكتى، ءمان-ماعىناسىن جوعالتپايتىنىن اتاپ ءوتتى
«ونىڭ شىعارمالارى – الەمدىك اقىل-ويدىڭ التىن قورىنا قوسىلعان قۇندى قازىنا. ءال-ءفارابيدىڭ 1150 جىلدىعى يۋنەسكو-نىڭ اتاۋلى كۇندەرىنىڭ جاھاندىق تىزىمىنە ەنگىزىلدى. ءبىز 2020 جىلى وسى مەرەيتويدى ەرەكشە اتاپ وتتىك. حالىقارالىق عىلىمي سيمپوزيۋمدار، كونفەرەنتسيالار ۇيىمداستىرىلدى. مونوگرافيالار مەن جيناقتار باسىپ شىعارىلدى. دەرەكتى فيلمدەر ءتۇسىرىلدى. مۇنىڭ ءبارى ءال-ءفارابيدىڭ ەڭبەكتەرىن تەرەڭ تۇسىنۋگە مۇمكىندىك بەرەدى، ونىڭ مول مۇراسىن جان-جاقتى ناسيحاتتاۋعا جول اشادى. ەندى قىتاي عالىمدارى مەن جاستارىنا فيلوسوف جايلى بىرقاتار عىلىمي ەڭبەكتەر قولجەتىمدى بولادى. وسى قۇندى دەرەكتەرمەن، ەڭ الدىمەن، بەيجىڭ ءتىل جانە مادەنيەت ۋنيۆەرسيتەتىنىڭ وقىتۋشىلارى مەن ستۋدەنتتەرى تانىسا الادى. بۇل – قۋانتارلىق جايت. مەن دە كەزىندە وسى وقۋ ورنىندا تۋرا قىرىق جىل بۇرىن ءبىلىم الدىم. سوندىقتان بۇگىن ءابۋ ناسىر ءال-ءفارابيدىڭ ءمۇسىنىن اشۋ – مەن ءۇشىن زور مارتەبە, – دەدى ول.
پرەزيدەنت بۇدان سوڭ بەيجىڭ لينگۆيستيكالىق ينستيتۋتىندا تاعىلىمدامادان وتكەن كەزىندە وزىنە ءدارىس بەرگەن پروفەسسور ليۋ شيتسينمەن اڭگىمەلەستى.
مۇنان سوڭ مەملەكەت باسشىسىنا ۋنيۆەرسيتەتتە وقىعان كەزىندەگى ءوزىنىڭ ارحيۆ قۇجاتتارىن كورسەتتى.
ءىس-شارا سوڭىندا پرەزيدەنت بەيجىڭ ءتىل جانە مادەنيەت ۋنيۆەرسيتەتىنە ءابۋ ناسىر ءال-ءفارابيدىڭ پورترەتىن سىيلاپ, وسى وقۋ ورنىندا ءبىلىم الىپ جاتقان قازاقستاندىق ستۋدەنتتەرمەن اڭگىمەلەستى.
قاسىم-جومارت توقاەۆ اتالمىش شارادان سوڭ SINOPEC كومپانياسى ديرەكتورلار كەڭەسىنىڭ توراعاسى ما يۋنشەندى قابىلدادى.
اڭگىمەلەسۋ بارىسىندا ءوزارا ىنتىماقتاستىق جانە مۇناي-گاز حيمياسى مەن ەنەرگەتيكا سالالارىنداعى بىرلەسكەن ينۆەستيتسيالىق جوبالاردى جۇزەگە اسىرۋ پەرسپەكتيۆالارى تالقىلاندى.
قاسىم-جومارت توقاەۆ SINOPEC كومپانياسىنىڭ پوليەتيلەن ءوندىرىسى جوباسىنا تولىققاندى سەرىكتەس رەتىندە قاتىسۋى قازاقستاننىڭ اتالعان كاسىپورىنمەن ورنىقتى ىقپالداستىعىنىڭ ايقىن دالەلى ەكەنىن اتاپ ءوتتى. قازاقستان مۇناي-گاز حيمياسىنا قاتىستى الەمدىك دەڭگەيدەگى مۇنداي اۋقىمدى جوبانى بۇعان دەيىن جۇزەگە اسىرماعان. جوبانىڭ جالپى قۇنى – 7,7 ميلليارد دوللار.
«ءبىز كومپانيانىڭ قازاقستان مەن قىتاي اراسىنداعى ەكىجاقتى قارىم-قاتىناستى دامىتۋعا، سونداي-اق ەلىمىزدىڭ مۇناي-گاز سالاسىنا قوسقان ۇلەسىن جوعارى باعالايمىز. ءسىزدىڭ كاسىپورنىڭىزبەن ىنتىماقتاستىقتى نىعايتۋعا مۇددەلىمىز ءارى ءسىزدىڭ كومپانيانى قازاقستاننىڭ ستراتەگيالىق سەرىكتەسى دەپ سانايمىز», – دەدى مەملەكەت باسشىسى.
ءوز كەزەگىندە ما يۋنشەن مەملەكەت باسشىسىنا كومپانيانىڭ 2024 جىلدىڭ ەكىنشى جارتىسىندا زاۋىت قۇرىلىسىن باستاۋعا نيەتتەنىپ وتىرعانىن ايتتى. سونداي-اق اتىراۋ مۇناي وڭدەۋ زاۋىتىنىڭ بازاسىندا تاعى ءبىر ستراتەگيالىق جوبانى جۇزەگە اسىرۋ – تەرەفتال قىشقىلى مەن پوليەتيلەنتەرەفتالات ءوندىرىسى كەشەنىن سالۋ جوسپارىن جەتكىزدى.
بۇدان بولەك، كەزدەسۋدە گەولوگيالىق بارلاۋ جانە جەر قويناۋىن پايدالانۋ, سونداي-اق اتالعان باعىتتا زاماناۋي تەحنولوگيالاردى قولدانۋعا قاتىستى ىنتىماقتاستىق ماسەلەلەرى قاراستىرىلدى.
ەل پرەزيدەنتى بۇگىن YTO Express Co.، Ltd كومپانياسىنىڭ باسقارما توراعاسى يۋ حۋەي دزياونى دا قابىلدادى.
كەزدەسۋ بارىسىندا ەلەكتروندى كوممەرتسيا، كولىك جانە لوگيستيكا سالالارىنداعى ءوزارا ءتيىمدى ىنتىماقتاستىق پەرسپەكتيۆالارى تالقىلاندى.
قاسىم-جومارت توقاەۆ ەلىمىزدە Alibaba, Wildberries, OZON جانە JDcom سەكىلدى ءىرى ماركەتپلەيستەر جۇمىس ىستەپ جاتقانىن اتاپ ءوتتى. قازاقستان 2030 جىلعا قاراي ەلەكتروندى ساۋدا ۇلەسىن جالپى ساۋدا-ساتتىق نارىعىنىڭ 20 پايىزىنا دەيىن جەتكىزۋدى جوسپارلاپ وتىر.
اڭگىمەلەسۋ بارىسىندا پرەزيدەنتكە قىتايدىڭ تەز جەتكىزۋگە ماماندانعان ەڭ ءىرى لوگيستيكالىق وپەراتورلارىنىڭ ءبىرى ءبىزدىڭ نارىققا كەلىپ، ورتالىق ازياداعى باس كەڭسەسىن قازاقستاندا اشۋدى كوزدەپ وتىرعانى جونىندە مالىمەت بەرىلدى. بۇل ۋاعدالاستىق «قازپوشتا» اكتسيونەرلىك قوعامى مەن YTO Express Group اراسىنداعى ىنتىماقتاستىق تۋرالى كەلىسىمگە قول قويۋ اياسىندا بەكىتىلەدى.
«قىتايدىڭ «ءبىر بەلدەۋ، ءبىر جول» باستاماسى اياسىندا ءسىزدىڭ كومپانياڭىزبەن ءوزارا ءتيىمدى ىنتىماقتاستىق ورناتۋ ءۇشىن زور مۇمكىندىگىمىز بار. بۇگىندە ەلەكتروندى كوممەرتسيا – ەكونوميكانىڭ ەڭ جىلدام دامىپ كەلە جاتقان سالالارىنىڭ ءبىرى. الەمدىك ءجىو-ءنىڭ شامامەن 7 تريلليون دوللار قارجىسى وسى سالادان قۇرالادى. قازاقستان ەلەكتروندى كوممەرتسيانى دامىتۋعا ايرىقشا ءمان بەرەدى», – دەدى قاسىم-جومارت توقاەۆ.
يۋ حۋەي دزياو مەملەكەت باسشىسىنا كومپانيانىڭ قازاقستانداعى نەگىزگى جوباسى تۋرالى باياندادى. اتاپ ايتقاندا، كاسىپورىن ەلىمىزدىڭ بىرقاتار وڭىرىندە «ا» ساناتىنا جاتاتىن جوعارىتەحنولوگيالىق مۋلتيمودالدى ورتالىقتار سالۋدى جوسپارلاپ وتىر. مۇنداي ينفراقۇرىلىم تاۋاردى جەدەل وڭدەپ، ونى ەۋروپا وداعى، ەۋرازيالىق ەكونوميكالىق وداق جانە ورتالىق ازيا ەلدەرىنە شىعارۋعا وڭتايلى جاعداي جاسايدى. ال ينتەللەكتۋالدى IT-شەشىمدەردى ەنگىزۋ لوگيستيكا پروتسەسىن تولىقتاي اۆتوماتتاندىرۋعا مۇمكىندىك بەرىپ، ەلەكتروندى كوممەرتسيا تاۋارلارىنىڭ كەدەننەن جىلدام ءوتۋىن قامتاماسىز ەتەدى.
سونىمەن قاتار، مەملەكەت باسشىسى CITIC Group كومپانياسىنىڭ باسقارما توراعاسى چجۋ حەسيندى قابىلدادى.
اڭگىمەلەسۋ بارىسىندا ەنەرگەتيكا، مۇناي حيمياسى ونەركاسىبى جانە باسقا دا ماڭىزدى سالالارداعى ءوزارا سەرىكتەستىكتى نىعايتۋ ماسەلەلەرى تالقىلاندى.
پرەزيدەنتكە CITIC Group كومپانياسى مەن قازاقستاننىڭ بۇعان دەيىن قول جەتكىزگەن ۋاعدالاستىقتارىنىڭ جۇزەگە اسىرىلۋ بارىسى تۋرالى مالىمەت بەرىلدى.
«ءبىزدىڭ تۇراقتى كەزدەسۋلەرىمىز اراداعى ىنتىماقتاستىقتىڭ ستراتەگيالىق سيپاتىن بىلدىرەدى. بيىل مامىر ايىندا CITIC Construction كومپانياسى قازاقستاندىق سەرىكتەستەرىمەن جالپى ينۆەستيتسيا كولەمى 2 ميلليارد دوللار بولاتىن جوبالاردى ىسكە اسىرۋ جونىندەگى 5 قۇجاتقا قول قويدى. ماڭىزدى جوبالاردىڭ ءبىرى – اقتاۋداعى Caspi Bitum زاۋىتىنىڭ مۇناي وڭدەۋ قۋاتىن جىلىنا 1,5 ميلليون تونناعا دەيىن جەتكىزۋ. ماعان «قازمۇنايگاز» بەن CITIC Group اراسىندا ءتيىستى كەلىسىمگە قول قويىلعانى جونىندە مالىمەت بەرىلدى. قۇرىلىس سالاسىندا مول تاجىريبەڭىز بار ەكەنىن ەسكەرسەك، بۇل جوبا ساپالى ءارى قىسقا مەرزىم ىشىندە جۇزەگە اسىرىلادى دەپ ويلايمىن»، – دەدى مەملەكەت باسشىسى.
بۇدان بولەك، كەزدەسۋ بارىسىندا ينۆەستيتسيا جانە اگروونەركاسىپ كەشەنى سالالارىنداعى ىنتىماقتاستىق پەرسپەكتيۆالارى قاراستىرىلدى.
قازاقستان پرەزيدەنتى CRRC سorporation Limited كومپانياسىنىڭ باسقارما توراعاسى ءارى اتقارۋشى ديرەكتورى Cۋن يۋنتسايدى قابىلدادى.
CRRC سorporation Limited كومپانياسىنىڭ باسقارما توراعاسى ءارى اتقارۋشى ديرەكتورى Cۋن يۋنتسايمەن كەزدەسۋ بارىسىندا ماشينا جاساۋ جانە تەمىرجول ترانسپورتى سالالارىنداعى ىنتىماقتاستىق ماسەلەلەرى تالقىلاندى.
قاسىم-جومارت توقاەۆقا «ءبىر بەلدەۋ، ءبىر جول» فورۋمى اياسىندا «قازاقستان تەمىر جولى» ۇلتتىق كومپانياسى مەن سRRC اراسىندا قۇنى 1,3 ميلليارد دوللار بولاتىن ىنتىماقتاستىق تۋرالى كەلىسىمگە قول قويىلاتىنى جايىندا باياندالدى. اتالعان قۇجات بويىنشا 200 مانەۆرلىك جانە ماگيسترالدىق تەپلوۆوزدار ساتىپ الۋ، سونداي-اق قازاقستاندا ينجينيرينگ جانە سەرۆيستىك قىزمەت كورسەتۋ ورتالىقتارىن اشۋ قاراستىرىلعان.
پرەزيدەنت ەلىمىزدىڭ وزىق تەحنولوگيالاردى قولدانۋ جانە تەمىرجول تەحنيكاسىنا قىزمەت كورسەتۋ ورتالىقتارىن اشۋ ارقىلى لوكوموتيۆتەر ءوندىرىسىنىڭ جەرگىلىكتى ۇلەسىن ارتتىرۋعا مۇددەلى ەكەنىن اتاپ ءوتتى. وسى ورايدا مەملەكەت باسشىسى قازاقستاننىڭ نەگىزگى كولىك-لوگيستيكالىق حاب ەكەنىن ايتىپ، سول ارقىلى CRRC كومپانياسىنىڭ ەۋرازيا كەڭىستىگى مەن ەۋروپا نارىقتارىنا شىعا الاتىنىن جەتكىزدى. بۇل رەتتە مەملەكەت باسشىسى كومپانيانىڭ وسى ماقساتتارعا 200 ميلليون دوللار ينۆەستيتسيا قۇيۋ نيەتىن قۇپتادى.
– 20 جىل بويى ءسىزدىڭ كورپوراتسياڭىز ەلىمىزبەن تابىستى ىنتىماقتاستىقتا جۇمىس ىستەگەنى قۋانتادى. وسى جىلدار ىشىندە قازاقستان كومپانيادان 300-گە جۋىق جولاۋشىلار ۆاگونى مەن لوكوموتيۆتەردى، سونداي-اق 6 مىڭ جۇك ۆاگونىن ساتىپ الدى. قازاقستاندا كومپانيانىڭ ونىمدەرى ساپالى ەكەنىن كورسەتتى. ءبىزدىڭ سەرىكتەستىگىمىزدى جاڭا دەڭگەيگە كوتەرۋگە بارلىق مۇمكىندىك بار ەكەنىنە سەنىمدىمىن، – دەدى قاسىم-جومارت توقاەۆ.
ءوز كەزەگىندە سۋن يۋنتساي قازاقستاننىڭ CRRC كومپانياسىنا كورسەتىپ جاتقان قولداۋى ءۇشىن ريزاشىلىعىن ءبىلدىردى. ونىڭ پىكىرىنشە، كاسىپورىن قازاقستان نارىعىندا قىزمەت ەتكەن 20 جىل ىشىندە ءوزارا ءتيىمدى ىنتىماقتاستىق جوعارى دەڭگەيگە كوتەرىلگەن.
CRRC Corporation Limited كورپوراتسياسى الەمدەگى تەمىرجول ترانسپورتىنىڭ ەڭ ءىرى ءوندىرۋشىسى سانالادى جانە الەمدىك لوكوموتيۆ ءوندىرىسى نارىعىنىڭ شامامەن 50 پايىزى قىتاي كومپانياسىنا تيەسىلى.
كەلىسسوزدەر مەن كەزدەسۋلەر جالعاسىپ جاتىر. ءبىز الداعى ۋاقىتتا پرەزيدەنت قاسىم-جومارت توقاەۆتىڭ قىتاي ساپارى جايلى ساراپتامامىزدى وقىرمان تالقىسىنا ۇسىناتىن بولامىز.
Abai.kz