يزرايلدەگى جاعداي بۇكىل ەلىمىزدى الاڭداتىپ وتىرعانى جاسىرىن ەمەس. ءتىپتى, كەشە عانا «ءبىر قازاقستاندىق جوعالىپ كەتتى» دەگەن اقپارات تاراعان بولاتىن.

وسى ماسەلە قازاق باق-تارىن تولعاندىردى. وزىنە قويىلعان وسى ساۋالعا قاتىستى سىرتقى ىستەر مينيسترلىگىنىڭ رەسمي وكىلى ايبەك سمادياروۆ: «بۇل مۇلدەم شىندىققا جاناسپايدى. ءارى يزرايل بيلىگى تىزىمدە قاتە كەتكەنى ءۇشىن كەشىرىم سۇرادى»، - دەپ مالىمدەدى.

ايبەك سمادياروۆتىڭ ايتۋىنشا قاقتىعىس وشاعىندا زارداپ شەككەن قازاقستان ازاماتتارى جوق.

قازاق بيلىگى قام قىلىپ، يزرايل جەرىندە جۇرگەن قازاقستاندىقتار ارنايى اۋە رەيسىمەن ەلگە جەتكىزەتىنىن اشىپ ايتتى. سوعان بايلانىستى ءدال قازىر يزرايلدە جۇرگەن 118 قازاقستاندىق ەلگە قايتۋعا نيەت ءبىلدىرىپ وتىر.

رەسمي ەمەس دەرەك كوزدەرى بۇل ەلدەگى جەرلەستەرىمىزدىڭ سانى 400-دەن استام بولۋى مۇمكىن دەيدى. قازاقستاننىڭ سىرتقى ىستەر مينيسترلىگىنىڭ رەسمي وكىلى ايبەك سمادياروۆ ازىرگە زارداپ شەككەن نە تۇتقىنعا الىنعان قازاقستاندىقتار جايلى اقپارات جوق ەكەنىن جۇرتقا جەتكىزدى.

قر سىرتقى ىستەر مينيسترلىگىنىڭ رەسمي وكىلى ايبەك سمادياروۆ:

«تەل-اۆيۆتەگى ديپلوماتتارىمىز يزرايلدەگى قازاقستان ازاماتتارىمەن تۇراقتى بايلانىستى جانە ولارمەن ءوزارا جەدە ءىس-قيمىل جاساۋ ماقساتىندا ارنايى مەسسەندجەردە چات قۇردى. قازىرگى ۋاقىتتا وعان يزرايلدە تۇراقتى جانە ۋاقىتشا تۇراتىن 200-گە جۋىق قازاقستان رەسپۋبليكاسىنىڭ ازاماتى قوسىلعان. بۇل چاتتا ءبىزدىڭ وتانداستارىمىز وزدەرىنىڭ ورنالاسقان جەرى تۋرالى حابارلاپ، ديپلوماتتارمەن تىكەلەي بايلانىس ورناتتى. 

ايتا كەتەيىك، يزرايلدەگى قازاقستاندىقتاردى الىپ قايتۋ ءۇشىن «ەير استانا» اۋە كومپانياسى 10 قازاندا رەپاترياتسيالىق رەيس ۇيىمداستىرادى. رەيس الماتى–تەل-اۆيۆ–الماتى باعىتى بويىنشا ۇشپاق. الماتى قالاسىنان ۇشۋ ساعات 08:00-گە، تەل-اۆيۆ قالاسىنان ۇشۋ جەرگىلىكتى ۋاقىت بويىنشا ساعات 12:50-گە جوسپارلانعان. رەيسكە قاتىستى ساۋالداردى help.airastana.com قولداۋ ورتالىعىنا، نە ەكراندا كورسەتىلگەن نومەرلەرگە حابارلاسىپ بىلۋگە بولادى»، - دەپ مالىمدەدى.

Abai.kz