رەسەيدە ءبىر كەزدە «برات» جانە «برات-2» دەگەن فيلمدەر شىعىپ، كورەرمەندەرى كوپ ۇزدىك دۇنيەلەردىڭ قاتارىنا قوسىلدى.

مازمۇنى تىم قاراپايىم، كادۋىلگى ەشكىمدى دە ايامايتىن بانديتتەر تۋرالى. ال وسىنداعى باستى ءرولدى ورىنداعان سەرگەي بودروۆ دەگەن جاستاردىڭ اسا سۇيىكتى كەيىپكەرىنە اينالدى. ويتكەنى ول سول رەسەي جاستارىنىڭ بويىنداعى ۇلتشىلدىق پەن ءشوۆينيزمدى جاقسى ناسيحاتتاي ءبىلدى. ياعني ولاردىڭ وسال تۇسىن ءدوپ باستى. وزدەرىن باسقا ۇلتتان جوعارى ۇستاتىن مەنمەنشىلدىك قاسيەتىنە قانات ءبىتىردى. ءفيلمنىڭ نەگىزگى ماقساتى دا وسى ەدى.

مۇنى سول كارتيناداعى ءبىر عانا ەپيزودتان ايقىن بايقاۋعا بولادى. بىردە بودروۆقا «برات» دەپ قالعان كاۆكازدىق جىگىتكە قايتارعان جاۋابى ناعىز شوۆينيزم مەن ناسىلشىلدىكتىڭ ايقىن ايعاعى ەدى. ول الگى ەش جازىعى جوق جىگىتكە بەتى شىمىركەمەستەن: «كاكوي تى منە برات، گنيدا چەرنوزادايا» (تۇپنۇسقادا بۇدان دا جامان) دەپ ساسىق ءسوزىن لاق ەتكىزدى. مۇنداي سوزدەردىڭ ورىس جاستارىنىڭ قۇلاقتارىنا مايداي جاعارى ءسوزسىز.

ال مەن وسى ءبىر ۇلتشىلدىقتى قوزدىراتىن ءفيلمدى نەگە ءسوز قىلىپ وتىرمىن دەيسىزدەر عوي؟.. ونىڭ وزىندىك ءبىر اسا قاۋىپتى سەبەبى بار. جاقىندا قوستانايدا وسى ءفيلمدى جنە ونىڭ باستى كەيىپكەرى، دۇنيەدەن ەرتە وزعان، وزدەرى ونى «كەڭەستىك ءارى رەسەيلىك اتاقتى اكتەر ءھام كينورەجيسسەر» سانايتىن سەرگەي بودروۆتى ەسكە تۇسىرۋگە ارنالعان ۇلكەن كونتسەرتتىڭ «وريون» دەگەن مادەنيەت سارايىندا دۇركىرەپ وتكەندىگىن وسىنداعى ورىس ءتىلدى گازەتتەر جارىسا جازىپ جاتىر.

سوندا مۇنى قالاي تۇسىندىك؟ مۇنداعى بودروۆتىڭ تىلەكتەستەرىنىڭ كوزدەگەندەرى نە؟ رەسەي فيلمىندەگى ورىس ۇستەمدىگىن قازاقستاندا ناسيحاتتاۋدىڭ باستاماسى ما؟ سوندا جەرگىلىكتى بيلىك قايدا قاراپ وتىر؟ وسىنداعى قوعامدىق دامۋ مەن مادەنيەت باسقارمالارى بۇلاردى نازار اۋدارۋعا تۇرمايتىن ۇساق-تۇيەك دۇنيەلەر ساناي ما؟

ايتپاقشى، وسى بودروۆ دەگەنىڭ ءوزىنىڭ ءبىر سۇحباتىندا: «سوعىس كەزىندەگى سولداتتىڭ قانداي دا ارەكەتىن ايىپتاۋعا بولمايدى»، - دەپ سوققانى بار. بۇل ءسوز رەسەي سولداتتارىنىڭ ۋكرايناداعى نەشە ءتۇرلى زۇلىمدىقتارىن اقتاۋعا اكەلىپ سوقپاي ما؟

رەسەيدىڭ وكتەمدىك ساياساتى بىزدە وسىلايشا تورگە ورلەپ تۇرعاندا ءبىز ۇلتتىق سانامىزعا تۇرتكى بولاتىن، «مىرجاقىپ. ويان، قازاق!» ءفيلمىن بىردە كورسەتىپ، بىردە كورسەتپەي، وزىمىزبەن-ءوزىمىز الىسىپ جاتىرمىز. وسىدان كەيىن، ايتاتىن ءسوز دە جوق، ءتىپتى.

جايبەرگەن بولاتوۆ

Abai.kz