ەلىمىز كەشە «رەسپۋبليكا كۇنىن» ەكىنشى رەت مەرەكەلەدى. ەلىمىزدىڭ تۇكپىر-تۇكپىرىندە مەرەكەلىك ءىس-شارالار بولىپ، كوگىلدىر ەكرانداردان پاتريوتتىق تاقىرىپتاعى باعدارلامالار مەن فيلمدەر كورسەتىلدى. سونىمەن، كەشەگى كۇن نەسىمەن ەستە قالدى؟ كەشە بولعان باستى وقيعالار مەن مەملەكەتتىك ماڭىزى بار قالالاردا وتكەن شارالارعا از-كەم توقتالىپ وتەيىك.

(سۋرەت ازاتتىق راديوسىنان الىندى)

بيىلعى «رەسپۋبليكا كۇنى» ۇلتتىق مەرەكەسى قارساڭىندا بىرنەشە قالادا ميتينگ ۇيىمداستىرىلماق بولدى. بىراق ولاردىڭ وتۋىنە جەرگىلىكتى اكىمدىكتەر رۇقسات بەرمەدى. سوعان قاراماستان ءار قالادا كوشەگە شىقپاق بولعان بىرنەشە قارالى كىسىنى پوليتسەيلەر ۇستاپ اكەتىپ جاتتى. جالپى حالىقتان مەرەكەلىك كوڭىل-كۇي سەزىلمەگەنى دە راس.

(سۋرەت اقوردا سايتىنان الىندى)

بۇدان بولەك، «رەسپۋبليكا كۇنى» اقوردادان ماراپات جاۋعان كۇن بولدى. ساتىرلاعان مەدالداردىڭ اراسىنان بۇعىپ وتكەن ادامدار عانا امان ءوتتى دەسەدى جۇرت. سوزباققا سالماي، اقوردا تاراتقان اقپاراتتى الدارىڭىزعا جايىپ سالايىق.

رەسپۋبليكا كۇنى قارساڭىندا پرەزيدەنت قاسىم-جومارت توقاەۆتىڭ جارلىعىمەن ەلىمىزدىڭ الەۋمەتتىك-ەكونوميكالىق، مادەني-رۋحاني دامۋىنا، حالىقتار اراسىنداعى دوستىق پەن ىنتىماقتاستىقتى نىعايتۋعا قوسقان ەلەۋلى ۇلەسى مەن بەلسەندى قوعامدىق قىزمەتى ءۇشىن ءبىر توپ ازامات مەملەكەتتىك ناگرادالارمەن ماراپاتتالدى. ولاردىڭ قاتارىندا ءوندىرىس، بيزنەس، ءبىلىم بەرۋ، دەنساۋلىق ساقتاۋ سالالارىنىڭ كورنەكتى وكىلدەرى، اسكەري قىزمەتشىلەر، قۇقىق قورعاۋ ورگاندارىنىڭ قىزمەتكەرلەرى، سپورتشىلار، ەڭبەك ارداگەرلەرى، مادەنيەت جانە عىلىم قايراتكەرلەرى بار.

(سۋرەت اقوردا سايتىنان الىندى)

سونىمەن، «قازاقستاننىڭ ەڭبەك ەرى» اتاعى 3 ادامعا، «وتان» وردەنى 4 ادامعا، ءى دارەجەلى «بارىس» وردەنى 4 ادامعا، ءىى دارەجەلى «بارىس» وردەنى 3 ادامعا، ءىىى دارەجەلى «بارىس» وردەنى 6 ادامعا، «پاراسات» وردەنى 7 ادامعا تابىستالدى.

پرەزيدەنتتىڭ تاپسىماسىمەن بيىلدان باستاپ «ەل بىرلىگى» وردەنى تاعايىندالدى. اتالمىش سىيلىق ۇلت بىرلىگىن نىعايتۋ جانە قوعامدىق تاتۋلىقتى قامتاماسىز ەتۋ جولىنداعى جەمىستى ەڭبەك ەتكەن جاندارعا تابىستالادى. «ەل بىرلىگى» وردەنىمەن 7 ادام ماراپاتتالدى.

بيىل قۇرمەتتى ماراپاتتار قاتارىنا «قازاقستاننىڭ حالىق جازۋشىسى» جانە «قازاقستاننىڭ حالىق ءارتىسى» اتاقتارى قوسىلدى.

ت.ابدىكۇلى، س.ەلۋباەۆ، ب.نۇرجەكەەۆ، س.سماتاەۆ، ا.اشيروۆ جانە ل.شاشكوۆا «قازاقستاننىڭ حالىق جازۋشىسى» اتانسا، د.احيموۆقا، م.توكارەۆ، د.اقمولدا، ش.ءابىلوۆ، ت.كۇزەنباەۆ، ر.ستامعازيەۆ، د.قۇدايبەرگەن، ا.ۇلكەنباەۆا «قازاقستاننىڭ حالىق ءارتىسى» قۇرمەتتى اتاعىنا يە بولدى.

بۇدان بولەك، «قۇرمەت» وردەنى كەمى 5 ادامعا، ءىىى دارەجەلى «ەڭبەك داڭقى» وردەنى 94 ادامعا، ءىى دارەجەلى «دوستىق» وردەنى 1 ادامعا، «ەرەن ەڭبەگى ءۇشىن» مەدالى 3 ادامعا، «ەرلىگى ءۇشىن» مەدالى 2 ادامعا، «شاپاعات» مەدالى 1 ادامعا، «قازاقستاننىڭ ەڭبەك سىڭىرگەن قايراتكەرى» قۇرمەتتى اتاعى 31 ادامعا، «قازاقستاننىڭ ەڭبەك سىڭىرگەن ۇستازى» قۇرمەتتى اتاعى 1 ادامعا،

قر قۇرمەت گراموتاسى 143 ادامعا تابىستالدى.

اسكەري جانە قىزمەتتىك بورىشىن ۇلگىلى اتقارعانى، زاڭدىلىق پەن قۇقىقتىق ءتارتىپتى قامتاماسىز ەتۋدە، ەلدىڭ ۇلتتىق قاۋىپسىزدىگى مەن قورعانىس قابىلەتىن نىعايتۋ كەزىندە كورسەتكەن ەرلىگى مەن قاجىر-قايراتى ءۇشىن اسكەري قىزمەتشىلەر مەن قۇقىق قورعاۋ ورگاندارىنىڭ وكىلدەرى ءى جانە ءىى دارەجەلى «داڭق» وردەندەرىمەن, ءىى جانە ءىىى دارەجەلى «ايبىن» وردەندەرىمەن, «ەرلىگى ءۇشىن» جانە «جاۋىنگەرلىك ەرلىگى ءۇشىن» مەدالدارىمەن ماراپاتتالدى.

ال مەگاپوليستەردە قالاي اتالىپ ءوتتى، سونى ايتايىق.

(سۋرەت استانا اكىمدىگىنىڭ سايتىنان الىندى)

استانادا رەسپۋبليكا كۇنىن مەرەكەلەۋ اياسىندا وراي ۇكىمەتتىك ەمەس 200-دەن استام مادەني-بۇقارالىق، ءبىلىم بەرۋ، سپورتتىق جانە الەۋمەتتىك ءىس-شارالار ۇيىمداستىرىلدى.

سونىمەن قاتار، ەلوردانىڭ بىرقاتار تۇرعىنى «قۇرمەت» وردەنى،

«ەرەن ەڭبەگى ءۇشىن»، «شاپاعات» مەدالدارىمەن ماراپاتتالدى. بۇدان بولەك، ۇكىمەتتىك ەمەس ۇيىمداردىڭ وكىلدەرىنە دە ماراپاتتار تابىس ەتىلدى.

سونداي-اق، رەسپۋبليكا كۇنىن مەرەكەلەۋ اياسىندا ەلوردا تۇرعىندارى «مەنىڭ ەلىم – مەنىڭ تۋىم!» چەللەندجىن جاسادى. استانانىڭ بەس اۋدانىندا تەرەزەلەر مەن بالكوندارعا جانە كوشە بويىنا 1000-نان استام تۋ ءىلىندى.

(سۋرەت الماتى اكىمدىگىنىڭ سايتىنان الىندى)

ال الماتى قالاسىنىڭ ءار اۋدانىندا تاڭعى 10:00-دەن كەشكى 20:00گە دەيىن وننان استام ءىس-شارا (مەرەكەلىك كونتسەرت، سپورتتىق جارىستار، كورمە، جارمەڭكە) ۇيىمداستىرىلدى. وسىناۋ مەرەكەلىك شارالارعا اكىم ەربولات دوساەۆ باستاپ، قوعام قايراتكەرلەرى، ءماسليحات دەپۋتاتتارى، قالانىڭ شىعارماشىلىق زيالىلارى جانە ت.ب. قاتىستى.

بۇدان بولەك، الماتى قالاسىنىڭ اكىمى ەربولات دوساەۆ اباي اتىنداعى قازاق ۇلتتىق وپەرا جانە بالەت تەاترىنىڭ عيماراتىندا قازاقستان پرەزيدەنتى قاسىم-جومارت توقاەۆتىڭ اتىنان 75 تۇرعىنعا مەملەكەتتىك ناگرادالاردى تاپسىردى. ولاردىڭ ىشىندە دەنساۋلىق ساقتاۋ، ءبىلىم بەرۋ، مادەنيەت، بيزنەس، كولىك سالالارىنىڭ وكىلدەرى، ەڭبەك ارداگەرلەرى، سونداي-اق قوعام جانە ساياسي قايراتكەرلەر بار.

مەملەكەت باسشىسىنىڭ جارلىعىمەن 1 دارەجەلى «بارىس» وردەنىمەن «ق.ي. ساتباەۆ اتىنداعى گەولوگيا عىلىمدارى ينستيتۋتى» جشس ديرەكتورى گەروي جولتاەۆ ماراپاتتالدى. قازاقستاننىڭ ەڭبەك سىڭىرگەن قايراتكەرى قۇرمەتتى اتاعى كومپوزيتور ەلميرا دەحگانيگە مادەنيەتتىڭ دامۋىنا قوسقان ۇلەسى ءۇشىن بەرىلدى.

2 دارەجەلى «ەڭبەك داڭقى» وردەنىمەن «الماتىەلەكتروترانس» جشس اۆتوبۋس جۇرگىزۋشىسى اكىمجان جۇماباەۆ ماراپاتتالدى.

سونداي-اق، قالا اكىمى مەملەكەت باسشىسىنىڭ اتىنان الماتىلىقتارعا «پاراسات»، «قۇرمەت»، 3 دارەجەلى «ەڭبەك داڭقى» وردەندەرىن، سونداي-اق «ەرەن ەڭبەگى ءۇشىن» جانە «شاپاعات» مەدالدارىن  تاپسىردى.

شارادا قازاقستان رەسپۋبليكاسىنىڭ قۇرمەت گراموتاسىن ون ادام يەلەندى.

(سۋرەت الەۋمەتتىك جەلىدەن الىندى)

شىمكەنت قالاسى دا رەسپۋبليكا كۇنىنە وراي بىرنەشە شارا ۇيىمداستىردى. ولاردىڭ ىشىندە سالتاناتتى كەشتەن باستاپ، سپورتتىق جارىستار، بوس جۇمىس ورىندارىنىڭ جارمەڭكەسى دە بار. قالا اكىمى ءتۇرلى سالادا قىزمەت اتقارعان بىرقاتار ازاماتقا «قۇرمەتتى ازامات» اتاعىن بەرىپ، «بارىس»، «پاراسات»، «قۇرمەت»، «ەڭبەك داڭقى» وردەندەرى مەن «ەرەن ەڭبەگى ءۇشىن»، «شاپاعات» مەدالدارىن تابىستادى.

Abai.kz