International Partnership for Human Rights (IPHR – ادام قۇقىقتارى بويىنشا حالىقارالىق قىزمەتتەستىك) ۇيىمى فرانتسيا پرەزيدەنتى ەممانۋەل ماكروندى قازاقستان مەن وزبەكستانعا ساپارى بارىسىندا ادام قۇقىقتارى ماسەلەسىن كوتەرۋگە شاقىردى.

IPHR'دىڭ ماكرونعا جولداعان اشىق حاتىندا قازاقستاندا قاندى قاڭتار وقيعالارى كەزىندە زاڭ بۇزعاندار جازاسىز قالعانى، بىلتىر قاراقالپاقستانداعى نارازىلىق اكتسيالارىنان كەيىن جەرگىلىكتى بەلسەندىلەردىڭ، جۋرناليستەردىڭ جانە بلوگەرلەردىڭ قۋعىن كورگەنى جازىلعان. ۇيىم مۇنىڭ ءبارى قازاق جانە وزبەك بيلىگىنىڭ "ساياسي رەفورمالار تۋرالى رەسمي ريتوريكاسىنا قايشى كەلەتىنى" تۋرالى ايتقان.

"IPHR سونىمەن بىرگە ماكروندى قازاق جانە وزبەك ليدەرلەرىنە فرانتسيا مەن ەۋروپا وداعى ادام قۇقىقتارى بويىنشا حالىقارالىق تالاپتاردىڭ ساقتالۋىنا ءمان بەرەتىنىن جانە ىنتىماقتاستىق دامۋ ءۇشىن اتالعان تالاپتاردىڭ ورىندالۋىن كۇتەتىنىن ەسكەرتۋگە شاقىرادى", - دەپ جازىلعان ۇيىم مالىمدەمەسىندە.

ايتا كەتسەك، بۇگىن ماكرون قازاقستانعا رەسمي ساپارمەن كەلدى، ەرتەڭ وزبەكستانعا بارادى.

فوتو: اشىق دەرەككوزدەن

Abai.kz