29 قازاندا تاشكەنتتەگى ءامىر تەمىر داڭعىلىندا پالەستينانى قولداۋ ميتينگىنە قاتىسقان كەم دەگەندە ءۇش ادام 15 تاۋلىككە قامالدى. بيلىك نارازىلىق اكتسياسىنا رۇقسات بەرمەگەن.

"گازەتا.uz" باسىلىمىنىڭ حابارلاۋىنشا، استانانىڭ شايحانتاحۋر اۋداندىق سوتىنىڭ شەشىمدەرىمەن تانىسۋ كەزىندە ءۇش ادامنىڭ جاۋاپقا تارتىلعانى ءمالىم بولعان.

اۋداندىق سوت 30 قازاندا تاشكەنت وبلىسىنىڭ ف. و. (2001 جىلى تۋعان) مەن ب. ي. (2001) ەسىمدى تۇرعىندارىن، سونىمەن بىرگە قاشقاداريا وبلىسىنىڭ م. ح. (1997) ەسىمدى ازاماتىن سوتتاعان.

ولاردىڭ ءبارى «ىشكى ىستەر ورگاندارى قىزمەتكەرلەرىنىڭ تالابىن ورىنداۋدان باس تارتۋى»، «ميتينگ وتكىزۋ ءتارتىبىن بۇزعانى» ءۇشىن جازالانعان.

ەستەرىڭىزگە سالا كەتەيىك، 29 قازاندا تاشكەنتتە پالەستينانى قولداۋ ميتينگىنە قاتىسقان جۇزدەن استام ادام ۇستالعان. قۇقىق قورعاۋشىلار ولاردى ىشكى ىستەر بولىمدەرىنە جەتكىزگەن. ۇستالعان ازاماتتاردىڭ كوبىسى اڭگىمەلەسۋدەن كەيىن بوساتىلعان.

مالىمەتتەرگە قاراعاندا، مۇنداي اكتسياعا قاتىسۋعا استانا تۇرعىندارى عانا ەمەس، كورشى وبلىستاردا تۇراتىن ادامدار دا كەلگەن. اكتسيا وتەتىنى تۋرالى مالىمەت بىرنەشە كۇن بۇرىن الەۋمەتتىك جەلىلەردە تارالعان.

فوتو: اشىق دەرەككوزدەن

Abai.kz