ۇلتتىق ستاتيستيكا بيۋروسى 2021 جىلعى ساناق قورىتىندىسى بويىنشا حالىقتىڭ ۇلتتىق قۇرامى جونىندەگى تاقىرىپتىق جيناقتى جاريالادى.

ۇلتتىق ستاتيستيكا بيۋروسى «2021 جىلعى حالىق ساناعىنىڭ» قورىتىندىلارىن جاريالاۋدى جالعاستىرىپ جاتىر. بۇگىن stat.gov.kz سايتىندا (ۇلتتىق ساناقتار بولىمىندە) قازاقستان رەسپۋبليكاسى حالقىنىڭ ۇلتتىق قۇرامى، ءدىنى جانە تىلدەردى مەڭگەرۋى بويىنشا ەكىنشى تاقىرىپتىق جيناق جارىق كوردى.
دەرەكتەر بارلىق قاجەتتى اقپاراتتى ەگجەي-تەگجەيلى زەرتتەي الاتىن تاراپ ءۇشىن قۇندى دەرەككوز بولادى.

قازاقتاردىڭ ۇلەسى 70,4% دەيىن ءوستى

2021 جىلعى ساناق قورىتىندىسى بويىنشا قازاقتار سانى 13,4 ملن ادامدى قۇرادى، 2009 جىلدان بەرگى ءوسىم – 33,7% (10 ملن – 2009 ج.), جالپى حالىق سانىنداعى قازاقتاردىڭ ۇلەسى 63,1%-دان 70,4%-عا دەيىن ءوستى.
سونداي-اق، سانى كوپ ۇلتتار قاتارىنا ورىستار – 2,9 ملن ادام، وزبەكتەر – 614 مىڭ ادام، ۋكرايندار – 387 مىڭ ادام جانە ۇيعىرلار – 290 مىڭ ادام كىردى.

قازاقستاندا قانداي ەتنوستار تۇرادى؟
ساناق قورىتىندىسى بويىنشا ەلىمىزدەگى ەتنوستار سانى 124-ءتى قۇرادى. ولاردىڭ اراسىندا ليۆتەر، ۆەپسىلەر، وروچتار، دولگاندار، دانيالىقتار، ۋدەگەيلەر، تساحۋرلار، مانسىلار، نانايلار، موڭعولدار، سەلكۋپتەر، چۋكچالار، ۋلتا، نيۆحتەر، يجورلار، كەتتەر، كورياكتار، قىرىمشاقتار، نگاناساندار، ساامدار، چۋۆاندار بار.

ايتا كەتەيىك، 2021 جىلعى ساناق راۋندىنىڭ ساۋالنامالارىنا ۇلتتى «كورسەتپەۋ» جاۋاپ نۇسقاسى قوسىلعان. وسىلايشا، 24,8 مىڭ ادام ءوز ۇلتىن كورسەتۋدەن باس تارتقان. سونداي-اق 2021 جىلى ساناق كەزىندە «باسقا ۇلت» جاۋابىن تاڭداعاندار 47,5 مىڭ ادامدى قۇرادى، ال 2009 جىلى مۇنداي ادامداردىڭ 8-ءى بولعان.

الماتى – پوليگلوتتار قالاسى
2021 جىلعى حالىق ساناعى بويىنشا 5 جاستان اسقان حالىقتىڭ 44,9% ەكى ءتىلدى، 28,6% – ءۇش ءتىلدى مەڭگەرگەن. ساناق قورىتىندىسى بويىنشا تاعى 1,7% 4 تىلدە سويلەيدى، 5 ءتىلدى حالىقتىڭ 0,2% بىلەدى. 6 ءتىلدى بىلەتىن پوليگلوتتاردىڭ ۇلەسى 0,1% نەمەسە 8 845 ادامدى قۇرادى.
قىزىقتى دەرەك، ەرلەرگە قاراعاندا 4-5 ءتىلدى مەڭگەرگەن ايەلدەردىڭ ۇلەسى باسىم، سايكەسىنشە 47,9% جانە 52,1%. بىراق 6 جانە ودان دا كوپ ءتىلدى بىلەتىن ەرلەر ۇلەسى، كەرىسىنشە، ايەلدەردىڭ ۇلەسىنەن اسىپ تۇسەدى – 55,6%.
وڭىرلىك بولىنىستە 5 جانە ودان دا كوپ ءتىلدى بىلەتىن پوليگلوتتار الماتى قالاسىندا.
بۇل رەتتە 35,1% نەمەسە 6 042,1 مىڭ ادام اعىلشىن ءتىلىن بىلەدى، ونىڭ 27,6% – ەركىن سويلەيدى.
جاس سەگمەنتىندە اعىلشىن ءتىلىن بىلەتىندەردىڭ ۇلەسى 10-14 جاس جانە 25-29 جاس ارالىعىندا كوپ.

قازاقستاندىقتار قاي ءدىندى ۇستانادى

سوڭعى ەكى ساناق ارالىعىنداعى كەزەڭدە يسلامدى ۇستاناتىن حالىقتىڭ ۇلەسى قاتتى وزگەرگەن جوق – 69,3%، حريستيان ءدىنى – 17,2%، بۋدديزم مەن يۋدايزم – 0,1%.

ەش دىنگە سەنبەيتىندەر ۇلەسى 2,8%-دان 2021 جىلى 2,3%-عا دەيىن تومەندەدى.

ساناق قورىتىندىسى بويىنشا رەسپوندەنتتەردىڭ 11% قانداي دا ءبىر دىنگە قاتىسىن كورسەتۋدەن باس تارتقان. 2009 جىلعى ساناق كەزىندە مۇنداي باس تارتقانداردىڭ ۇلەسى 0,5% بولعان.

قازاقستان رەسپۋبليكاسىنداعى ءبىلىم بەرۋ جونىندەگى كەلەسى تاقىرىپتىق جيناق 6 قاراشادا جاريالانادى.

انىقتاما: ايتا كەتەيىك، الماتى، شىعىس قازاقستان، قاراعاندى وبلىستارى بويىنشا دەرەكتەر ساناق وتكەن ۋاقىتقا، ياعني ولار بولىنگەنگە دەيىن بەرىلگەن. بۇل رەتتە جاڭادان قۇرىلعان وبلىستارداعى حالىق سانى ساناق دەرەكتەرىن ەسكەرە وتىرىپ قايتا ەسەپتەلگەن جانە stat.gov.kz سايتىندا جاريالانعان.

Abai.kz