DALA INSIDE دەرەككوزى «ارسەلورميتتال تەمىرتاۋدىڭ» جاڭا ينۆەستورى رەتىندە وتاندىق وليگارحتار - Freedom Holding قوجايىنى تيمۋر تۋرلوۆ پەن نازارباەۆتىڭ كۇيەۋ بالاسى، حالىق بانكتىڭ ماجوريتارلى اكتسيونەرى تيمۋر قۇلىباەۆ قاراستىرىلىپ وتىرعانىن ايتادى. تاراپتار باعا بويىنشا كومپروميسسكە كەلگەن، دەگەنمەن كوممەرتسيالىق مومەنتتەردى ءالى دە بولسا تالقىلاۋ قاجەت. كەلىسسوز وسى ايدىڭ سوڭىنا دەيىن سوزىلماق.

قوس تاراپ تا ۇكىمەتپەن جارتى جىل بويى كەلىسسوز جۇرگىزگەن. كوستەنكو شاحتاسىنداعى سوڭعى تراگەديا لاكشمي ميتتال سۇراعان ساتىپ الۋ اقىسىن كۇرت كەمىتكەندىكتەن، زاۋىتتى ارزانعا ساتىپ الۋدىڭ ءساتى ەندى ءتۇسىپ وتىر. بۇعان دەيىن ميتتال قاراعاندى مەتاللۋرگيا زاۋىتىن 4 ميلليارد دوللارعا باعالاپ كەلسە، 46 كەنشىنىڭ اجالىنان كەيىن تابەتىن بىردەن 1,3 ميلليارد دوللارعا دەيىن كەمىتتى.

مۇنداي اقشا تيمۋر قۇلىباەۆتا بار جانە ول حالىق بانكتىڭ بىرنەشە پاكەت اكتسيالارىن ساتىپ، ءوز كاپيتالىن تاعى تولىقتىرا الادى. ال تۋرلوۆ قۇلىباەۆتاي گيگانت ەمەس، سوندىقتان زاۋىتتى قاقشىپ الامىن دەسە، ينۆەستورلىق سينديكاتتالعان پۋل ۇيىمداستىرىپ، اسىرەسە بولات وتەمۇراتوۆتىڭ كاپيتالىن تارتۋى مۇمكىن.

قاراعاندى زاۋىتى - پايدا اكەلىپ وتىرعان ءوندىرىس وشاعى. تەك وعان وندىرىستىك قاۋىپسىزدىكتى كۇشەيتۋ ءۇشىن كەمى 3 ميلليارد دوللار ينۆەستيتسيا كەرەك. ۇكىمەت جاڭا ينۆەستورعا – «ەندى شاحتالاردا ادام ولمەسىن جانە ەشكىم جۇمىسسىز قالماسىن» دەگەن وتە تۇسىنىكتى جانە قاراپايىم ەكى تالاپ قويىپ وتىر.

بۇعان دەيىن زاۋىتتى رەسەيلىك ينۆەستور ساتىپ الادى (سونىڭ ىشىندە سەۆەرستال) دەگەن پىش-پىش اڭگىمە تاراعان. DALA INSIDE  دەرەككوزى مۇنى ءۇزىلدى-كەسىلدى جوققا شىعارىپ وتىر.

«ورىستار بۇل جوباعا جولامايدى. ميتتال؟ اقوردا ونىمەن سىپايى قوشتاسىپ، ىڭ-شىڭسىز شىعارىپ سالعاندى قالايدى. بيلىككە «ستاتي-2» سكاندالى كەرەك ەمەس. بريتان زاڭناماسىن جاقسى بىلەتىن ميتتالمەن ەرەگەسەر بولساق، ەرتەڭ لوندونعا سۇيرەپ سىلىكپەمىزدى شىعارادى. ءۇندى وليگارحىنىڭ زاڭگەرلەرى شەتىنەن مونستر. حالىقارالىق قۇقىقتى بۇگە-شىگەسىنە دەيىن مەڭگەرگەن بۇلارمەن اشىق شايقاسۋ قاۋىپتى..»، - دەيدى دەرەككوز.

جوعارىداعى ماقالاعا قاتىستى Abai.kz اقپاراتتىق پورتالىنا Freedom Holding Corp ءباسپاسوز قىزمەتى ارنايى تۇسىنىكتەمە بەردى. ءبىز تۇسىنىكتەمەنى قوسا جاريالاپ وتىرمىز: 

«بۇعان دەيىن جاريالانعان تيمۋر تۋرلوۆ «ارسەلورميتتال تەمىرتاۋ» كومپانياسىنىڭ جاڭا ينۆەستورى بولۋى مۇمكىن دەگەن اقپارات شىنايى ەمەس. تۋرلوۆ مىرزا كاسىپورىندى ساتىپ الۋ بويىنشا كەلىسسوزدەر جۇرگىزگەن جوق جانە جوسپارلاعان ەمەس».

Abai.kz